کابل شهری اهالیسی و هیداوچیلری، سونگی ایکی کوندن بیری گاز و یاقیلغی نرخلری اوتگن هفته گه نسبتن سیزیلرلی درجهده آشگنینی ایتهدیلر. کابل دهگی تیل تانکلری تامانیدن سلاموطندار بیلن شریک قیلینگن معلوماتلریگه کوره، اول هر کیلو گاز ۵۵ و ۶۵ افغانیگچه ساتیلردی، بیراق سونگی ایکی کونده بو نرخ ۷۰-۸۰ افغانیگچه کوتریلگن.
شونینگدیک، کابل بازارلریده بیر لیتر پترول نرخی ۷۷ افغانی گه ییتگن. حال بوکی، اوتگن هفته تخمیناً ۶۸ افغانیدن ساتیلهیاتگن ایدی.
تیل تانکلری ایگهلری دوچ کیلهیاتگن ینه بیر معما – رسمی نرخلر و بازاردهگی حقیقی نرخلر اورتهسیدهگی فرق دیر.
اولرنینگ ایتیشیچه، حاضرده اولر گه بیر کیلو گاز ۶۹ افغانیدن هم قیمتراق توشماقده، اما شهر حاکملیگی ساتوو نرخینی ۶۴ افغانی قیلیب بیلگیلهگن. بو هر بیر کیلوگرام اوچون قریب ۵ افغانی ضرر کیلتیرهدی دییدی، تیل تانکلری مسئوللری.
یاقیلغی ماده ساتووچیلری ایران و امریکا اورتهسیدهگی کیسکینلیکلر همده هجوملرنینگ قیته کوچهیشی، شونینگدیک، جهان بازارلریده نفت محصولاتلریگه بولگن طلبنینگ آشیشینی نرخلر کوتریلیشینینگ اساسی سببلری صفتیده کورستماقده.
شو بیلن بیرگه، هیداوچیلر هم گاز و یاقیلغی نرخلرینینگ آشگنیدن شکایت قیلهدیلر. اولرنینگ ایتیشیچه، اوللری هیداوچیلیکدن تاپگن درآمدلری ایندی قالمهگن و بعضاً فقطگینه موترلرنینگ خرهجتلرینی قاپلشگه قوربلری ییتهدی.
کابلده هیداوچیلردن اجمل شوندهی دییدی: «بوندن ایلگری، گاز نرخی ۵۵ یا کی ۵۶ افغانی ایدی بیز اوچون یخشی ایدی؛ اوندن فایده قیلردیک. بیراق حاضر نرخلر آشگن و فایده قیلمهیمیز و فقط گینه مصرفنی قاپلشگه اولگورهمیز. دولتدن نرخلرنی کنترول قیلیشنی سورهیمیز.»
کابل شهریده هیداوچیلردن باشقه بیری عبدالواحدنینگ ایتیشیچه: «بوندن اول، هر کیلوگرام گاز ۵۵ افغانی ایدی، بیراق حاضر ۷۲ افغانی گه ییتگن. پترول نرخی هم آشگن و ۷۷ افغانی گه آشگن.»
شو بیلن بیرگه، گاز ساتووچیلر نرخلر دایمی روشده اوزگریب تورگنینی ایتهدیلر.
کابل شهری اونینچی ناحیهدهگی گاز ساتووچیلردن بیری حشمتالله، حاضرده بیر کیلو گاز نرخی ۸۰ افغانی گه ییتگنینی معلوم قیلهدی.
اونینگ کوپهیتیریشیچه، نرخلر آشگنیدن بیری کوپلب مجازلر ینگی نرخدن خبر تاپگچ، خرید قیلمسدن بوش گاز بالونلرینی اویلریگه آلیب قیتهدیلر.
او شوندهی دییدی: «اوتگن هفته، هر کیلوگرام گاز نرخی ۶۰ و ۶۵ افغانی ایدی، بیراق ایکی کوندن بیری هر کیلو نرخی ۸۰ افغانی گه آشگن. نرخلر آشگنیدن بیری مجازلر کیلیب گاز نرخی قنچه بولگن دیب سورهیدی. ۸۰ افغانی دیسم، کوپینچه یشاوچیلرنینگ قوربی ییتمهیدی؛ گاز بالونلرینی بوش اویلریگه آلیب قیتهدیلر.»
باشقه تاماندن، کابل شهری حاکمیتی مسئوللری هم گاز و یاقیلغی نرخلری آشگنینی تصدیقلسهلرده، بیراق نرخلرنی نظارت قیلیش و تیکشیریش جریانی دوام ایتهیاتگنینی ایتهدیلر.
کابل شهری حاکمیتینینگ مدنی مصلحتچیسی نعمتالله بارکزی، اوشبو اداره بازارنی منتظم روشده کوزهتیب بارهیاتگنی و نرخلرنینگ ینه پسهیشی اوچون سعی-حرکت قیلهیاتگنینی بیلدیرهدی. اونینگ ایتیشیچه: «افسوس بیلن تیل نرخی آشگن، بیراق نرخنامهده بیلگیلنگن قیمتلر عملگه آشیریلهدی و هیچ کیمنینگ حقی یوق تیلنی بیلگیلنگن نرخدن یوقاری ساتسه.»
تأکیدلش جایز کی، گاز و یاقیلغی نرخلرینینگ آشیشیدن تشقری، نرخلرنینگ تیز-تیز اوزگریب توریشی و بیقرارلیگی هم فقرالر اوچون جدی معمالردن بیریگه ایلنگن. فقرالر بیر تاماندن نرخلر نظارت قیلینیشینی، ایکینچی تاماندن ایسه شهرنینگ برچه حدودلریده بیر خیل نرخلر عدالتلی طرزده قوللنیلیشینی سورهیدیلر.
