جمهورلیک ریاستی بیر اعلامیه ترقه‌تیب اعلام قیلیشیچه، ایران جمهوررئیسی سیدابراهیم رئیسی، جمهوررئیس محمداشرف غنی بیلن اوچره‌شیب و مذکور مملکت تشقی سیاستی ده افغانستان نینگ خاص اورنی بار دیگن.
اعلامیه‌ده کیلیشیچه، اوشبو اوچره‌شوو بوگون توشدن آلدین ایران پایتختی تهران ده صورت تاپگن. جمهورلیک ریاستی نینگ اعلامی اساسیده، بو اوچره‌شووده ایکی تامان همکارلیکلر و ایکی مملکت آره‌سیده علاقه‌لر کینگه‌یشی خصوصیده سوزلشگن.
مذکور اوچره‌شووده سیدابراهیم رئیسی تینچلیک اوچون منطقوی اجماع توغریسیده‌گی سعی و حرکتلر و افغانستان دولتی‌دن حمایت دوام تاپیشی اوستیگه اورغوله‌گن. ایران جمهوررئیسی سونگی ایکی دهه یوتوقلری و جمهوریت سقله‌نیشی اوچون افغانستان اهالیسیدن مملکتی نینگ حمایتی نی اعلام قیلگن.
بیزلرنینگ فیسبوک صحیفه‌میزگه باش اورینگ!
عین حالده، محمداشرف غنی تورلی بولیم‌لرده ایران نینگ همکارلیک‌لریدن قدردانلیک قیلیب و اقتصادی قوشمه همکارلیکلر و ایکی مملکت آره‌سیده علاقه‌لر کینگه‌یشی اوستیگه اورغوله‌گن.
محمداشرف غنی ایران جمهوررئیسی نینگ تحلیف مراسمی گه شرکت قیلیش اوچون دولتی یوقاری مرتبه‌لی بیر هیأت ییتکچیلیگده بوگون ایران سفر قیلدی. مذکور سفر ده جمهوررئیس نینگ جمهورلیک ریاست ایکینچی اورین‌باسری سرور دانش، تشقی ایشلر وزیرلیگی محمد حنیف اتمر و جمهورلیک ریاست دفتری نی عمومی باشلیغی عبدالمتین بیک همراه‌لیک قیله‌دی.
