تاجیکستان چیگره‌سیده‌گی شیرخان سوداگرلیک بندری طالبان قولیگه سقوط قیلگنیدن کیین، فعالیت دن قالگن ایدی، بیراق حاضر بو بندر ده سوداگرلیک فعالیتلر قیته باشنلنگن.
مذکور بندر ده کالا وارد و صادر قیله‌دیگن سوداگرلر نینگ ایتیش‌لریچه، اوشبو بندر نینگ امنیتی بوتونلی تامین‌لنگن و فساد هم کامل شکلده نابود بولگن.
اولرنینگ کوپه‌یتیریش‌لریچه، کالا‌لر نینگ صادرات و واردات‌لری عادی بیر شکلده جریانی بار، بیراق بانک‌لرنینگ باغلنگنی باعث، اولرنینگ سودا ساتیغ‌لری گه قیینچلیک ایجاد بولگن.
سوداگرلرگه کوره، سابق حکومت جریانیده مذکور بندر نینگ گمرکیدن کالا ترخیص ایتیلیشی نیچه ساعت دوام تاپه‌دی ایدی، لیکن حاضر بو پروسه ۱۰ یا ۲۰ دقیقه‌ده تکمیل بوله‌دی.
بیزلرنینگ فیسبوک صحیفه‌میزگه باش اورینگ!
عین حالده، شیرخان بندر نینگ واردات و صادرات بولیمی آمری مسعود وحدت نینگ ایتیشیچه، مذکور بندر ده فساد آلدی آلینگن و سوداگرلر حاضر کیله‌جک فعالیت‌لریگه خوشبین دیر.
اونگه کوره، سوداگرلرگه آسان‌لیکلر کوپه‌یگن و بوندن آلدین سوداگرلر نینگ فعالیتی توغریسیده‌گی قیینچلیکلر حاضر اورته‌دن کوتاریلگن.
باشقه بیر تاماندن، قندوز شیرخان بندری ده طالبان گمرک رئیسی مولوی صبغت‌الله نینگ ایتیشیچه، اولر تورلی بولیم‌لرده سوداگرلر اوچون ییترلیچه آسان‌لیک یره‌تیش اوچون سعی و حرکت قیله‌دی.
اونینگ کوپه‌یتیریشیچه، مذکور بندر ده یوقاری تناژ ترازوسی قیته فعال قیلینگن و بندرده‌گی بانک‌لرنینگ قیینچلیک‌لری هم تیزلیککه حل ایتیلیشی ممکن.
ایتیش کیره‌ک که، قندوز نینگ شیرخان بندری تاجیکستان چیگره‌سیده قرار تاپگن که «دوستلیک کوپریگی» نامیده‌گی ۱۲۰ مترلیک بیر کوپریک بیلن مذکور مملکت گه اولنگن و سوداگرلر سوداگرلیک توارلرینی شو یولدن اورته آسیا مملکت‌لریگه انتقال بیره‌دیلر.
