اشرف غنی نینگ قاچیشی و طالبان نینگ کابل گه کیریشیدن کمیده اوچ هفته اوتیشی بیلن، یشاوچی‌لردن قطاری ایش و کارلرینی قولدن بیرگن و روزگارنی اوتکزیش اوچون کوپنیچه قیینچلیکلر بیلن روپه‌رو بولگنلر.
دولتی نهادلر ایشلاوچی‌لری اداره‌لر یاپیلگنی و ایش‌لری نینگ تعطیل بولگنیدن خواطر بیلدیریب و ایتیش‌لریچه، تقدیرلری نابیللی دیر و کیله‌جک اوچون هم هیچ بیر امیدلری یوق دیر.
ایشلاوچیلر درآمدلری یوقلیگیدن شکایت قیلیب ایتیش‌لریچه، عایله خره‌جتی نی قیینچلیک بیلن تأمینله‌یدیگن معاش دن هم حاضر محروم بولگنلر.
دولتی نهادلر ایشلاوچی‌لریدن جمیل جویا و شاه محمود اندیشور نینگ ایتیش‌لریچه:
«مین اوزیم اویگه نان کیلتیره‌دیگن یالغیز شخص ایدیم، باشقه شخصی ایشیم یوق ایدی و یالغیز دولتی وظیفه ایدی، حاضر بیکار و ناامید من. کیله‌جگی‌میزنی نیمه بولیشی هیچ بیللی ایمس، بیر تاماندن ایش یوق و ایش بولگنده هم معاش یوق. همه نیرسه نتیجه‌سیز دیر. وضعیت حاضر حاضر کوپ یمان بولگن.»
«دوست‌لریم دن خبر آلدیم، اولر باشقه مملکت‌لرگه کیتگن یا قاچاقی و یا هم قانونی. قالگن کیشی‌لر ایسه ایش قیلیش اوچون هیچ قیزیقمه‌یدی. شو یوزه‌دن بیزلرنی و اداره‌لرگه ایشله‌یدیگن باشقه کیشی‌لرنی تقدیری بیللی ایمس. نه ایش‌لری بار و نه هم معاش‌لری.»
بیزلرنینگ فیسبوک صحیفه‌میزگه باش اورینگ!
ایشلاوچی‌لردن باشقه بیری دیر که طالبان کیلیشی بیلن وظیفه‌سینی قولدن بیرگن. اونینگ ایتیشیچه، روزگاری نی اوتکزیش اوچون قالین توقیش و قول صنعت‌لریگه یوز کیلتیرگن.
«باشقه‌لرگه محتاج بولمه‌سیمیز و آچ قالمسلیگیمیز اوچون، اویده قولیمیزدن کیله‌دیگن ایش نی قیلیش گه مجبورمیز، مین ۱۶ ییل درس اوقیب و ماسترلیک درسی نی هم اوقیماقده ایدیم که طالبان کیلیشی بیلن همه‌سی کیتدی و تمام بولدی.»
بیراق طالبان نینگ ایتیش‌لریچه، ایش‌لرنی قیته باشله‌نیشی و نهادلرنینگ آچیلیشی بیر آز زمان آلیشی ممکن و ایشلاوچیلر ینگی حکومت تشکیل ایتیلیشی نی کوتیب توریش‌لری کیره‌ک.
طالبان سوزلاوچی‌لریدن بیری بلال کریمی: «اولر ینگی حکومت تشکیل ایتیلیشی نی کوتیب توریش‌لری کیره‌ک. رسمی اداره‌لرنی ایش گه باشله‌شی بیر آز زمان آله‌دی. انشاالله همه نیرسه یخشی بوله‌دی و کیله‌جکده هر کیم اوز ییری نی تاپه‌دی.»
طالبان اداره‌لردن قطاری گه سرپرست تعیین قیلیب و قطار بولیم‌لرده فعالیت عادی بیر شکلده دوام تاپگن بیرحالده، بیراق نهادلردن کوپینچه‌سی رهبرلیککه موجود خلا باعث، حاضرگچه یاپیق قالگن و ایشلاوچیلر ایسه اداره‌لرگه کیره آلمه‌یدی.
