ایران رسمیلری اسرائیل هجوملری نتیجهسیده ملی خوفسیزلیک کینگشی کاتبی علی لاریجانی هلاک بولگنینی تصدیقلب، کیسکین جواب قیتریلیشینی معلوم قیلدیلر.
ایران اسلام انقلابی قوریقچیلری بیاناتیگه کوره، اسرائیلنینگ هوا ضربهلری عاقبتیده لاریجانی بیلن بیرگه اونینگ اوغلی مرتضی همده خوفسیزلیک خذمت بوییچه معاونی علیرضا بیات هم هلاک بولگن.
معلوم قیلینیشیچه، لاریجانی تهران یقینیدهگی پردیس تومنیده جایلشگن قیزینینگ اوییده بولگن وقتده هجومگه اوچرهگن. او ییرده اوغلی، یاردمچیلریدن بیری و بیر نیچه تنساقچیلری (دستیار) بیلن بیرگه بولگن.
اسلام انقلابی قوریقچیلری بیاناتیده، اوشبو حادثه «جوابسیز قالمسلیگی» تأکیدلنیب، لاریجانی و باشقه هلاک بولگنلر اوچون «انتقام» آلینیشی ایتیلگن.
ایران جمهور باشلیغی مسعود پزشکیان هم مذکور واقعه گه مناسبت بیلدیریب، عیبدارلر قتیق جزالنیشینی تأکیدلهگن. او شوندهی دیگن: «ایران زمینینینگ شهیدلری قانی بیلن قوللرینی بولغهگنلر مقرر روشده جزا گه تارتیلهدی.»
علی لاریجانی هسته مذاکره بوییچه سابق وکیل و ایران عالی رهبریگه یقین سیاسی رهبرلردن بیری صفتیده تنیلگن. او سونگی بار ۱۳ مارچ کونی تهرانده اوتکزیلگن قدس کونی تدبیرلریده کورینیش بیرگن ایدی.
شو کونی امریکا تامانیدن ایراننینگ یوقاری لوازمدهگی عملدارلری جملهدن لاریجانی حقیده معلومات اوچون ۱۰ میلیون دالرگچه مکافات اعلان قیلینگنی خبر قیلینگن.
علی لاریجانی، قویاش ۱۴۰۴ ییل، ۲۶ حوت، اسرائیل حربی کوچلرینینگ هجومی نتیجهسیده ایرانده اولدیریلدی.
