اوتمیش‌لرده هرات مملکت نینگ تینچ ولایت‌لریدن بیری سنله‌دی ایدی، بیراق حاضر باشقه ولایت‌لر کبی طالبان نینگ جدی هجوم‌لریگه شاهد دیر.
بوگون (دوشنبه ۲۳- حمل) هرات تینچ‌اهالیسی نینگ سقله‌یدیگن ایش گروهی، مدنی نهادلردن قطاری بیلن خبری بیر ییغین اوتکزیب بو ولایتده طالبان هجومی و تینچ‌اهالی تلفاتی کوپه‌یگنیدن خواطر بیلدیریب ایتیشیچه، اوتگن ییل میزان آیی‌دن بویان طالبان گروهی و امنیتی کوچلر آره‌سیده یوزبیرگن آتیشمه‌ده، ۷۳ تینچ‌اهالی هلاک ایتیلگن.
مذکور گروه اعضالریگه کوره، بو پیتده باشقه ۳۱۷ تینچ‌اهالی هرات شهری و تومن‌لریده یره‌لنگن. اولر اوروش تامان‌لریدن تینچ‌اهالی بوندن آرتیق تلفاتی کورمه‌سلیگی اوچون اوروش قانون‌لری نینگ نظرگه آلیش‌لرینی سوره‌گن. هرات تینچ‌اهالیسی نینگ سقله‌یدیگن گروهی گه کوره، شونینگدیک یالغیز اوتگن ۲۳ کونده بو ولایتده ۵ تینچ‌اهالی هلاک و باشقه ۷۱ کیشی ایسه یره‌لنگن.
شونینگدیک مذکور گروه نینگ باشقه بیر اعضاسی سیداشرف سادات، طالبان هجومی کوپه‌یگنی توغریسیده ایتیشیچه، بو زوروانلیکلردن ۹۰ فایزی یشش ییرلرده یوز بیرده‌دی. جناب سادات اوروش تامان‌لری اینیقسه طالبان دن رمضانی آیی مناسبتی بیلن زوروانلیکلردن قول تارتیش‌لرینی سوره‌گن.
اوتگن ۶ آیده تینچ‌اهالی تلفاتی کوپه‌یگن بیرحالده، مملکت حربی‌لریگه هم آغیر تلفات ییتیشگن. مسئوللرنینگ بیاناتی اساسیده، سونگی آیلرده شیندند، پشتون‌زرغون، چشت، گلران، کشک کهنه، کهسان و غوریان تومن‌لری طالبان گروهی نینگ جدی هجوم‌لریگه شاهد بولگن کیم نتیجه‌ده، امنیتی کوچلر و طالبان گروهی گه آغیر تلفات ییتیشگن.
