غور ولایتی کسلخانهسینینگ قیزهمیققه چلینگن بالهلرگه مخصوص مراقبتلر بولیمی، ینگیلیکده بو کسللیک ترقهلگنی سبب مذکور ولایتنینگ تورلی بولیملریدن دوالنیش اوچون بو کسلخانهگه کیلتیریلگن بالهلردن توله دیر.
شوندهی بیرحالده، مذکور بالهلرنینگ عایلهلری گه کوره، بالهلری باشده سینهبغل کسللیگی و کیین ایسه قیزهمیققه چلینگن.
غور یشاوچیسی و قیزهمیققه چلینگن بالهسینینگ دوالنیش مقصد کسلخانه گه آلیب بارگن جمعهگلنینگ ایتیشیچه: «بالهم کسل بولگن، کسلخانهگه کیلتیردیم سینهبغل بولگن دیدیلر و کیین ایسه قیزهمیققه چلینگن دیدیلر. کوپ ایسیتمهسی بار ایدی و خارش قیلهر ایدی. حاضر شکر وضعیتی یخشیراق بولگن.»
بیزلرنینگ فیسبوک صحیفهمیزگه باش اورینگ!
شونینگدیک اوشبو ولایت یشاوچیلریدن باشقه بیری محمدعلی، قیزهمیق کسللیگی سبب بالهسینینگ کسلخانهگه بستری بولگنی نی بیان قیلیب و ایتیشیچه: «کسلخانهدن قیشلاققه کیلگنیمیزدن اون کون بولهدی، بالهمیز کسل بولدی و ناآرام ایدی. ینه کسلخانهگه آلیب باردیک، باشده سینهبغل دیدیلر و کیین ایسه قیزهمیق دانهلری چیقدی و کیلتیریب بستر قیلدیک.»
غور ولایتی کسلخانهسی بالهلر بولیمی مسئولی، بو ولایتده بالهلر آرهسیده قیزهمیق کسللیگی ترقهلگنیدن خواطر بیلدیریب و ایتیشیچه، قویاش جاری ییل باشلنگنیدن حاضرگچه ۴۵۰ باله بو کسللیککه چلینیب و اولر ارا ایکی باله اولگن.
غور ولایتی کسلخانهسی بالهلر بولیمی متخصصی محمدموسا الفت، بو ولایتده قیزهمیق کسللیگی ترقهلگنی سببینی ییل باشیده سوو تاشقینلر یوز بیرگنی، عایلهلرنینگ آگاهیلیک سطحی آزلیگی و قیزهمیققه قرشی ایملنمسلیک دیگن.
اونینگ ایتیشیچه: «قیغو بیلن بو ییل اوتگن ایکی ییلگه نسبت، غور ولایتیده قیزهمیق ترقهلیشی و ولایتی کسلخانه گه مراجعت قیلووچیلر کوپهیگن. بونینگ تورلی سببلری بار که اینگ اونملیسی اوزاق منطقهلرده بالهلرنینگ قیزهمیققه قرشی ایملنمسلیگی دیر. باشقه بیر سببی ایسه سوو تاشقینلر دیر که ایچیملیک سوو منبعلرینی خراب قیلدی.»
باشقه بیر تاماندن، غور ساغلیقنی سقلش ریاستی مسئوللرینینگ ایتیشلریچه، قیزهمیق کسللیگی کوپراق مرغاب، تیوره و شهرنینگ باشقه بولیملریده ترقهلیب و بو ریاست مذکور کسللیکنینگ کوپراق ترقهلمسلیگی اوچون ساغلیق تیملرینی اوشبو بولیملرگه تعیینلهگن.
بیزلرنینگ «ایکس» ترماغی ده هم تعقیب قیلینگ!
غور ساغلیقنی سقلش ریاستی اورینباسری حسامالدین حامینینگ سلاموطندار گه ایتیشیچه: «برچه ساغلیق مرکزلریمیزده قیزهمیق واکسینی بار و اهالی باریب بالهلرینی واکسین قیلدیره آلهدیلر که کیلهجکده قیزهمیققه چیلینگن کسلیمیز بولمسه. شونینگدیک اوچ ییلده بیر مرته اوتکزیلهدیگن واکسین کمپاینی دیر که قیغو بیلن بو ییل یوق ایدی و کیلهسی ییلده پلان بار که انشاءالله دونرلر همکارلیگیده اوتکزسهک.»
غور ولایتیده ساغلیقنی سقلش مسئوللری، بالهلرده ریزش، قتیق ایسیتمه، اشتهاسیزلیک، یوتل و تیریگه قیزیل دانهلر چیقیشینی قیزهمیق کسللیگی علایملریدن دیگنلر.
اولر عایلهلردن بو علایملرنی کورگنلری صورتده، بو کسللیکنینگ کوپراق ترقهلمسلیگی اوچون بالهلرینی دوالنیش مقصد ساغلیق مرکزلریگه انتقال بیریشلرینی ایستهگن.
