Asset 1SWN

سلام وطندار

بازاردن دسترخوانگچه؛ اهالی‌نینگ تاریخی اوتگن آزیق-آوقت محصولاتلریدن خواطری

Seller in Kabul City1

کابل شهری‌نینگ ایریم اهالیسی بازارلرده بعضی حاللرده قیمت‌لیک سبب تاریخی اوتگن آزیق-آوقت محصولاتلری ساتیلیشینی ایته‌دیلر. اولر گه کوره، تاریخی اوتگن محصولاتلرنی استعمال قیلگنلری اوچون ساغلیق قیینچیلیگی بیلن دوچ بولیشگن.

کابل شهری‌نینگ ۱۵ ناحیه یشاوچیسی فرزاد یعقوبی، تاریخی اوتگن آزیق-آوقت محصولاتلرینی استعمال قیلگنیدن سونگ ساغلیغی گه سلبی تأثیر قویگن. او شونده‌ی دییدی: «بیر کونی دکانگه باریب، سریغ یاغ (مسکه) و باشقه آزیق-آوقت محصولاتلرینی ساتیب آلدیم. مسکه‌نی اویگه آلیب کیلیب استعمال قیلگنیمدن سونگ، ایکی کون دوامیده مسموم بولدیم، ساغلیغیم یامانلشدی. کیینچه‌لیک اوشبو محصولاتلرنینگ تاریخی اوتگنینی بیلدیم.»

کابل شهری‌نینگ ۱۱ ناحیه یشاوچیسی بولگن هدیه هم شونگه اوخشش حالتنی باشدن کچیرگن. اونینگ ایتیشیچه: «تخمیناً تورت آی آلدین کنسرولنگن بادرنگ تُرشینی استعمال قیلدیم. بیر نیچه ساعت‌دن سونگ کونگلیم اینیب قارنیم قتیق آغری باشله‌دی. کیینچه‌لیک محصولات‌نینگ استعمال قیلیش تاریخی اوتگنینی بیلدیم، اونی ساتیب آله‌یاتگنیمده بونگه اعتبار بیرمه‌گن ایکنمن. اوی شرایطیده دوالنیش فایده بیرمه‌دی. شفاکار گه مراجعت قیلیشگه مجبور بولدیم.»

شو بیلن بیرگه، کابل‌نینگ باشقه بیر قطار اهالیسی، آزیق-آوقت محصولاتلری بازارلریده خبردارلیک و توشونتیریش ایشلرینی کینگه‌یتیریش همده مسئول اداره‌لر تامانیدن نظارت‌نی کوچه‌یتیریشنی طلب قیله‌دیلر.

کابل شهری‌نینگ بیرینچی ناحیه یشاوچیسی احمدنینگ ایتیشیچه، تاریخی اوتگن آزیق-آوقت محصولاتلرینی استعمال قیلیش عاقبتلری حقیده ییتکرمه‌لر آرقه‌لی کوپراق توشونتیریش ایشلری آلیب باریلیشی، مسئول اداره‌لر ایسه بازارلرده ینه‌ده جدی نظارت اورنه‌تیشی لازم.

اونینگ کوپه‌یتیریشیچه: «آدملر تاریخی اوتگن آزیق-آوقت محصولاتلرینی استعمال قیلیش خوفی حقیده کوپراق معلوماتگه ایگه بولیشلری اوچون ییتکرمه‌لر، رادیو، تلویزیون و باشقه وعلاقه واسطه‌لری آرقه‌لی توشونتیریش ایشلری کینگه‌یتیریلیشی کیره‌ک. شو بیلن بیرگه، مسئول اداره‌لر هم بونده‌ی محصولاتلرنینگ بازارلر گه چیقریلیشی‌نینگ آلدینی آلیش اوچون نظارت‌نی کوچه‌یتیریشی لازم.»

کابل‌نینگ ینه بیر یشاوچیسی فیروز مرادی هم، بازارلرده قطعی نظارت اورنه‌تیش، تاریخی اوتگن و صفت‌سیز آزیق-آوقت محصولاتلرینی ساتووچیلرگه نسبتن قانونی چاره‌لر کوریش ضرورلیگینی بیلدیره‌دی. او شونده‌ی دییدی: «تأثیرلی و دایمی نظارت آرقه‌لی مدتی اوتگن آزیق-آوقت محصولاتلری‌نینگ ساتیلیشیگه یول قویمسلیک و اهالی سلامت‌لیگینی یخشی‌راق حمایه قیلیش ممکن.»

باشقه تاماندن، ایریم آزیق-آوقت محصولاتلری ساتووچیلری‌نینگ ایتیشیچه، تاریخی اوتگن محصولاتلرنی تشله‌یدیلر یا کی آلگن کمپنیه‌لر گه قیتره‌دیلر.

کابل شهری‌نینگ ۱۱ ناحیه‌سیده آزیق-آوقت ساتووچی رامش شونده‌ی دییدی: «اگر بیرار محصولات‌نینگ تاریخی کم قالگن بولسه، اونی امکان قدر تیزراق ساتیشگه حرکت قیله‌میز. اما تاریخی اوتگن بولسه، محصولات‌نی تشله‌یمیز.»

شو بیلن بیرگه، شفاکارلر تاریخی اوتگن و بوزیلگن آزیق-آوقت محصولاتلرینی استعمال قیلیش انسان سلامت‌لیگیگه ضرری بارلیگینی ایته‌دیلر.

شفاکار محمدولی محمدی‌نینگ ایتیشیچه، تاریخی اوتگن آزیق-آوقت محصولاتلرینی استعمال قیلیش تنه گه ضرری بار. او شونده‌ی دییدی: «مدتی اوتگن آزیق-آوقت محصولاتلرینی استعمال قیله‌دیگن کیشیلر هضم قیلیش تیزیمیده‌گی معمالردن تشقری، ینه‌ده جدی اسارتلر گه هم دوچ کیلیشی ممکن. آغیر حالتلرده بو معمالر ایچکلرنینگ کوچلی میکروبی بولیشیگه آلیب کیلیشی ممکن.»

شو بیلن بیرگه، کابل بلدیه‌سی مسئوللری بازارلر نظارت قیلینه‌یاتگنینی همده صفت‌سیز و تاریخی اوتگن آزیق-آوقت محصولاتلری ساتیلیشی‌نینگ آلدینی آلیش بوییچه چاره-تدبیرلر آلیب باریله‌یاتگنینی بیلدیره‌دی.

کابل بلدیه‌سی‌نینگ مدنی ایشلر بوییچه مصلحتچیسی نعمت‌الله بارکزی گه کوره، بازارلرنی ترتیب گه سالیش گروه‌لری و اطراف-محیط‌نی باشقروچیلری منتظم روشده بازارلرنی نظارت قیلیب باره‌دی. او شونده‌ی دییدی: «بو باره‌ده کابل شهری‌نینگ تورلی ناحیه‌لریده تیگیشلی بولیملر تامانیدن بازارلرنی ترتیب گه سالیش بوییچه تیکشیرولر اوتکزیلماقده. حاضرده شهرنینگ تورلی ناحیه‌لریده بازارلرنی ترتیب گه سالیش و اطراف-محیط‌نی محافظه قیلیش بوییچه ۲۲ ته بولیم فعالیت یوریتماقده. اولر بازارلر و سودا مرکزلرینی منتظم روشده تیکشیریب باره‌دی.»

افغانستان‌ده تاریخی اوتگن و صفت‌سیز آزیق-آوقت محصولاتلری‌نینگ ساتیلیشی همان یشاوچیلر سلامت‌لیگی بیلن باغلیق اساسی تشویشلردن بیری بولیب قالگن. مسئوللرنینگ معلوم قیلیشیچه، اوتگن ییل دوامیده کابل شهری بازارلریدن قریب ۲۰۰ مینگ کیلوگرام تاریخی اوتگن و صفت‌سیز آزیق-آوقت محصولاتلری ییغیب آلینیب و یوق قیلینگن.

کلیدی کلمه‌لر: // // // //

شریک قیلینگ:
خبر اوقووچی
تیگیشلی خبرلر و تحلیل‌لر

سلام‌وطندار خبرلری و گزارش‌لری نینگ اجتماعی ترماق‌لردن تعقیب قیلینگ:

توییتر

تلگرام