هرات ولایتیده ییر آستی سوولری سطحینینگ پسهیشی اوشبو ولایتنینگ مینگلب اهالیسی حیاتی و تیریکچیلیگینی خوف آستیده قالدیرگن. هراتنینگ ایریم اهالیسی قودوقلر و سوو منبعلرینینگ قوریب قالیشی نتیجهسیده دهقانچیلیک ییرلریدن ایریلگنینی همده بو حالت اولرنی اوز اویلرینی ترک ایتیشگه مجبور قیلهیاتگنینی ایتهدیلر.
هرات ولایتی زیرکوه تومنینینگ «عمارت» قیشلاغی یشاوچیسی عبدالحمید، قورغاقچیلیک و سوو آزلیگی سببلی قیشلاغینی ترک ایتیب، هرات شهریگه کیلگنینی ایتهدی. او شوندهی دییدی: «بیز قریب مینگته عایله ایدیک، شوندن ۵۰۰ گه یقین عایله هرات شهریگه کوچیب کیلدی، قالگنلرینینگ بیر قسمی ایسه شیندند گه کیتدی. برچه ییرلر، باغ و باغچهلر قوریب قالدی. ایچیملیک سووینی هم جوده قیینچیلیک بیلن تاپردیک.»
هرات ولایتی ادرسکن تومنی «جلوگیرک» قیشلاغی یشاوچیسی بولگن محمد اربابزاده، ایچیملیک سووی و دهقانچیلیک اوچون سوو یوقلیگی قیینچیلیگی بیلن دوچ دیر، اگر بو حالت دوام ایتسه، قیشلاغینی ترک ایتیشگه مجبور بولیشینی ایتهدی. اونگه کوره: «قیشلاغیمیزده ۸۰ ته عایله بار ایدی، اولرنینگ برچهسی باشقه بیر قیشلاققه کوچیب کیتدی. حاضر بو قیشلاقده ۱۵۰ کیشی یشهیپمیز. اگر وضعیت شو طرزده دوام ایتسه، بیز هم بو حدودنی ترک ایتیشگه مجبور بولهمیز.»
هرات ولایتی گذره تومنیدن بولگن عبدالقدیر صدیقی، قیشلاق اهالیسی، اوشبو ولایتده سوو منبعلری قوریب قالگنینی و ضرور سوونی تاپیش اوچون ساعتلب پیاده یوریشگه مجبور ایکنینی ایتهدی. او شوندهی دییدی: «بوتون قیشلاقده نلکشلیک بولگن ایدی، بیراق حاضر قوریب قالگن. آدملر ۵۰۰ متر اوزاقلیکدن ریکشاگه باریب سوو آلیب کیلهدیلر.»
هرات یشاوچیلری، اسلام امیرلیگیدن ایچیملیک سوونی تأمینلش، سوو منبعلرینی تیکلش و یوزه گه کیلگن وضعیتنی باشقریش بوییچه، چارهلر کوریشنی سورهیدیلر. ادرسکن تومنی ینه بیر یشاوچیسی عبدالباسط غفوری شوندهی دییدی: «عمومی بیر قودوق قزیب بیریشسین، هیچ بولمهگنده ایچیملیک سووی تاپیلهدیگن بولسین. اینگ کتته معما – ایچیملیک سوو مسئلهسی. یگانه طلبهمیز ایچیملیک سوو بیلن تأمینلش.»
باشقه تاماندن، هریرود دریا حوزهسی ریاستی مسئوللری، سونگی اوچ ییل ایچیده هراتده ییر آستی سوولری سطحی ۱۰ مترگچه پسهیگنینی ایتهدیلر. هرات ولایتی هریرود دریا حوزهسی ادارهسینینگ تخنیک مصلحتچیسی عبدالله احمدی شوندهی دییدی: «اکثریت قودوقلر گه مِتر قوندیرهمیز، تا کی آدملر سوود احتیاط بیلن فایدهلنسین. ایکینچیدن قودوق قزیشنی ایستهگن هر بیر کیشیگه فقط تامدن آقیب توشهدیگن یامغیر سووینی توپلش اوچون مخصوص قودوق قزیشنی توصیه قیلهمیز.»
شو بیلن بیرگه، هراتده ایکینچیلیک بوییچه ایریم بیلرمانلر، سوو منبعلری کمهیشی دوام ایتیشی اطراف-محیط، ایکینچیلیک تیزیمی و قیشلاق اهالیسی حیاتیگه کینگ کولملی سلبی تأثیر قیلیشی حقیده آگاهلنتیرهدیلر.
هرات ولایتیده ایکینچیلیک بوییچه بیلرمان حامد الهام، ییر آستی سوولریدن فایدهلنیشنی باشقریش و سوو منبعلرینی مستحکملش ضرور دییدی. اونگه کوره: «چوقور قودوقلر قزیشنی منع قیلیش، سوونی توپلش و اونینگ آقیم تیزلیگینی کمهیتیریش اوچون کیچیک سوو توغانلری قوریش، سوو آقیمینی باشقروچی توغانلر برپا ایتیش همده یامغیر سوولرینی ییغیش اوچون هراتده آست قوریلمه قودوقلر قزیش ضرور.»
سونگی ییللرده افغانستانده قوروقچیلیک و یاغینگرچیلیکنینگ کمهیشی کوزهتیلماقده؛ بو حادثه مملکت فقرالری، اینیقسه دهقانلرنینگ حیاتیده جدی قیینچیلیکلرنی یوزه گه کیلتیرگن.



