بیرلشگن ملتلر تشکیلاتینینگ انسانسیورلیک یاردملرنی هماهنگ قیلووچی ادارهسی افغانستان بولیمی (اوچا) گه کوره، افغانستان شرقینینگ بیر قطار بولیملریده یوز بیرگن سونگی سوو تاشقینلرده، ۲۶ کیشی اولیب و ۲۴ کیشی یرهلنگن.
مذکور نهادنینگ بوگون (۳۱-سرطان، چهارشنبه)، بیر گزارش آرقهلی ایتیشیچه، توستدن یوز بیرگن سوو تاشقینلر نتیجهسیده، نورستان مرکزی پارون شهریده ۲۳ کیشی و ننگرهار ولایتی تورخم حدودیده اوچ کیشی اولگن. اوچا گه کوره، سوو تاشقینلرده شونینگدیک پارون ده ۱۵ کیشی و ننگرهار ده توقیز کیشی یرهلنگن.
گزارشده کیلیشیچه، شونینگدیک لغمان ولایتی الینگار تومنیده یوز بیرگن سوو تاشقینلرده ایکینچیلیک ییرلر و سووغاریش سیستملری ضرر کورگن. بیرلشگن ملتلر تشکیلاتینینگ انسانسیورلیک یاردملرنی هماهنگ قیلووچی ادارهسی افغانستان بولیمیگه کوره، پارون ده یوز بیرگن سوو تاشقینلر اویلر و عمومی آستقورمهلرگه کینگ کولملی ضررلرنی ییتیشتیریب و قریب بیر مینگ عایلهنینگ سوودن فایدهلنیش امکانیتینی قیینچیلیک بیلن روپهره قیلگن.
بیرلشگن ملتلر تشکیلاتیگه تیگیشلی بو نهادنینگ اورغولشیچه، سوو تاشقینلریدن جبرلنگنلر فوقالعاده یاردملر جملهدن باشپنه، آزیق-آوقت محصوللری، طبی خذمتلر، روحی و اجتماعی خذمتلر و باشقه کیرهکلی نرسهلرگه نیازلری بار.
اسلام امیرلیگی حادثهلرگه قرشی کورهش ادارهسی، اوتگن کون پارون ده یوز بیرگن سوو تاشقینلرده ۲۳ کیشی اولگنی، ۸۰ کیشی یرهلنگنی و قریب ۱۰۰ کیشینینگ لادرک بولگنینی معلوم قیلگن ایدی. بو ادارهگه کوره، جبرلنگن منطقهلر وضعیتینی تیکشیریش اوچون بیر هیئت نورستان کیتگن.
