افغانستان ده اسلام امیرلیگی حاکمیتیدن کیین، دولت ادارهلریده عیال خادملری کیینگی امرگچه ایش دن بوشهتیلگن؛ بیراق سرپرست حکومت مسئوللری نیچه مراتبه بو عیاللر منفک بولمهگن؛ بلکه اوی گه اولتیریب و آیلیکلری ترتیبلی روشده تولنیشینی ایتگنلر.
سرپرست حکومت سوزلاوچیسی ذبیحالله مجاهد، بو حکومت نینگ حاکمیت تیپهسیگه کیلیشی بیرینچی ییلی ده ییتکیرمهلر بیلن اوتکزگن صحبتیده: «هیچ بیر اداره ده هیچ بیر عیال منفک بولمهگن، غیر حاضر بولیشمهیدی و آیلیکلری اویلری گه تولنیشنی» ایتگن ایدی.
شو بیلن بیرگه، سلاموطندار نینگ دولت ادارهلری ۱۸ عیال خادمی بیلن اوتکزگن صحبتی اساسیده، اولر نینگ ۱۵ نفری رسمی روشده و باشقه اوچ نفری قرارادای طرزده دولت ادارهلریده ایشلر ایدیلر و توزوم اوزگریشی بیلن منفک بولیشگن.
سلاموطندار نینگ معلوماتی گه کوره، بو عیاللر نینگ تورت نفری ایچکی ایشلر وزیرلیگی، اوچ نفری باش قارهلاوچیلیک ادارهسی، ایکی نفری ایش و اجتماعی ایشلر وزیرلیگی، ایکی نفری جمهورلیک ریاستی ایش ادارهسی، ایکی نفری مارشال محمدقسیم فهیم نظامی بیلیم یورتی، بیر نفری مالیه وزیرلیگی و باشقه بیر نفری ایسه بیلیم اورگهتیش معینیتی نینگ رسمی خادملری بولگنلر.
شونینگدیک، بیر نفری عدلیه وزیرلیگی، بیر نفری صناعت و سوداگرلیک وزیرلیگی و باشقه بیر نفری باش قارهلاوچیلیک ادارهسی نینگ قراردادی خادمی بولگن، مملکت دهگی سیاسی اوزگریش دن کیین لوازملریدن منفک بولگنلر.
مملکت ده سونگی سیاسی اوزگریش دن کیین باش قارهلاوچیلیک ادارهسیده رسمی لوازمی دن منفک بولگن برشنا نیازی نینگ ایتیشیچه: «اسلام امیرلیگی نه فقط بیز نی سابق وظیفه گه باریش اوچون رخصت بیرمهیدی؛ بلکه باشقه بولیملر گه قویمهیدی و حاضر برچهمیز تقدیرسیز میز؛ برچهمیز اوی عیالی بولگنمیز؛ تیریکچیلیک احوالیمیز کونسهیین آغیرلشماقده و بیرقطاریمیز عایله سرپرستی ایدیک، بوگون بیر لقمه نان اوچون همه حیران و سرگردان.»
جمهورلیک ریاستی ایش ادارهسی نینگ رسمی خادمی تهمینه قیومی، حاضر لوازمی دن منفک بولگن ایتیشیچه: «مین ۱۰ ییل ایش ادارهسیده تورلی بولیملر جمله دن مکاتبات، خاص اسناد آرشیفی و تحلیل هدایات مسئولی اولهراق رسمی طرز ده وظیفه اجرا قیلدیم. مین شامل باشقه اناث همکسبلریمیز دلیلسیز منفک بولدیک.»
بو عیاللر نینگ ۱۴ نفری منفک بولیب و درآمدلرینی قولدن بیرگندن کیین اقتصادی قیینچیلیک بیلن دوچ بولگنلرینی معلوم قیلگنلر. ایکی بیوه عیال شامل اولر نینگ سکیز نفری عایله سرپرستی ایکنلرینی ایتگنلر.
مالیه وزیرلیگی نینگ منفک بولگن خادمی پری رسولی گه کوره: «دولت ادارهسیده ایشلر ایدیم حکومت قولشیدن کیین مالیه وزیرلیگی برچه عیال خادملرینی منفک قیلدی. تیریکچیلیک شرایطیمیز یخشی ایمس ایتیش گه اویلهمن. عایله سرپرستی هم اوزیم من؛ آته-آنهم قریگن، بیر یتیم بیلن بیر بیوه سینگلیم بار و بیر ناگران سینگلیم بار. بولر نینگ مسئولیتی مینی زمهم گه دیر.»
ایچکی ایشلر وزیرلیگی نینگ منفک بولگن خادمی گیسو گیتی نینگ ایتیشیچه: «اقتصادی قیینچیلیک کوپ دیر. بیر کسل آنهم بار احوالی یخشی ایمس؛ ضعیف دیر؛ بیر ناگران ایناغم بار و باشقه اوزیم من. عایله سرپرستی هم اوزیم من.»
بو گزارش ده صحبت قیلگن هیچ بیر عیال نینگ رسمی وظیفهسی و ترتیبلی درآمدی یوق. بولر نینگ ۱۷ نفری بوتونلی ایشسیز و بیر نفری اویلر گه باریب ایشلش گه یوز کیلتیرگن.
(مستعار اسملی) حمیرا، ایش و اجتماعی ایشلر وزیرلیگی نینگ عامه ارتباطلر ریاستی نینگ رسمی خادمی ایدی و منفک بولیشیدن بیر ییل اوتماقده. حاضر باشقهلر نینگ اویی گه باریب ایشلش گه یوز کیلتیرگن بو عیال نینگ ایتیشیچه، کیچیک بالهلری نینگ نفقهسینی تامینلش اوچون ناچیز پول عوضی گه مردم نینگ اویلری گه باریب ایشلهیدی.
باشقه تاماندن، مذکور عیاللر نینگ آلتی نفری گه کوره، حکومت نیچه آیلیک حقوقلرینی تولمهگن. باش قارهلاوچیلیک ادارهسی نینگ بیر خادمی، مارشال محمدقسیم فهیم حربی بیلیم یورتی نینگ ایکی خادمی، بیلیم اورگهتیش معینیتی نینگ بیر خادمی، ایچکی ایشلر وزیرلیگی نینگ بیر خادمی و صناعت و سوداگرلیک وزیرلیگی نینگ بیر خادمی منفک بولگنلر ارا شامل دیر ایتیشلریچه، اولر نینگ برچه حقوقلری تولنمهگن و بو ادارهلر اولر دن قرضدار.
مارشال محمدقسیم فهیم بیلیم یورتی و بیلیم اورگهتیش معینیتی نینگ رسمی خادملریدن خاتمه و شکریه نینگ ایتیشلریچه، منفک بولگنلریدن ایکی ییل اوتگچ؛ لیکن حکومت اولر نینگ نیچه آیلیک حقوقلرینی تولمهگن.
بوتوغریده سرپرست حکومت مسئوللری نینگ فکر-ملاحظهسینی اورگهنیش اوچون تلاش قیلدیک؛ بیراق اولر دن بیرقطاری جواب قیتریش گه حاضر بولمهدیلر.
برچهسی بیلن، ایش و اجتماعی ایشلر همده صناعت و سوداگرلیک وزیرلیکلری سوزلاوچیلری نینگ سلاموطندار گه ایتیشلریچه، پروژهلر کمهیشی، مالی قیینچیلیک و خادملری نینگ ایش توانالیگی اساسیده، رسمی و قراردادی خادملریدن بیرقطاری منفک بولگن.
ایش و اجتماعی ایشلر وزیرلیگی سوزلاوچیسی سمیعالله ابراهیمی گه کوره: «هیچ کیم اسلام امیرلیگی نینگ اجازه بیرمسلیگی اوچون منفک بولمهگن؛ بیر قطار خادملر توانالیگی و لیاقتی گه قرهب منفک بولگنلر.»
صناعت و سوداگرلیک وزیرلیگی سوزلاوچیسی آخوندزاده عبدالسلام جواد نینگ ایتیشیچه: «پروژهلر ده ایشلهیدیگنلر نینگ ایشی پروژه ایشی یکونلنیشی بیلن بیتهدی، بو برچه گه معلوم. اولر نینگ آلیب قالیش ممکنسیز، پروژهلر ایشی باشلنسه هر بولیمدهگی خادم بیلن علاقه قوریب چقیرهمیز.»
باشقه تاماندن، سرپرست حکومت ایچکی ایشلر وزیرلیگی سوزلاوچیسی بسمالله حبیب، بو وزیرلیک دهگی عیال خادملری منفک یا که منفک بولمسلیگی حقیده هیچ نرسه دیمسه ده؛ بیراق پولیس صفی ده عیاللر نینگ حضورینی جدی نیاز بیلهدی. «افغانستان اسلامی بیر مملکتلیگی اوچون پولیس صفی ده عیاللر نینگ حضوری مهم دیر حاضر ایچکی ایشلر وزیرلیگی و پولیس کوچلری صفی ده ۲۰۰۰ مینگ عیال بار و عملی طرز ده وظیفه اجرا قیلیشماقده. دولت ادارهلری و پولیس صفی ده عیاللر حضوری سیزیلگن حالده، اولرنی استخدام قیلیش گه حرکت قیلینهدی.»
برچهسی بیلن، اقتصادی ایش بیلرمانلردن بیرقطاری تورلی ادارهلرده عیاللر حضوری کمهیشینی نه فقط عایلهلر نینگ اقتصادی اوستیگه سلبی تاثیر بیلهدیلر بلکه مملکت نینگ اقتصادی اوستیگه کته سلبی تاثیر قویشیگه ایشانهدیلر.
اقتصادی ایش بیلرمان شاکر یعقوبی گه کوره:«افسوس بیلن عیاللر نینگ منفک بولیشی عایلهلر نینگ اقتصادی اوستیگه تاثیر قیلهدی بو معما حتا مملکت نینگ اقتصادی اوستیگه سلبی تاثیر قیلیشی ممکن.»
عیال حقوقی فعاللری جمعیت ده عیاللر حضورینی جدی نیاز دیب و سرپرست حکومت دن جمعیت ترقیاتی و اقتصاد تیکلهنیشی اوچون عیاللر گه ایش فرصتلری یرهتیلیشینی سورهیدیلر.
عیال حقوقی فعالی یلدا عزیزی گه کوره: «سرپرست حکومت دن دولت ادارهلریدن منفک بولگن عیاللر نی قیته چقیریشنی ایستهیمیز، چونکه ملَکهلی عیاللر کوچ و هر ساحه ده تحصیل قیلیشگن اولر نینگ بیلیمی و تجربهلریدن فایدهلنیش کیرهک.
عیال حقوقی فعاللریدن باشقه بیری فروزان داوودزی نینگ ایتیشیچه: «اسلام امیرلیگی دن جمعیت بقاسی و ترقیاتی اوچون اولر نینگ تجربهلریدن فایدهلنیشنی ایستهیمیز اولر گه ایش رخصتی بیریلسین و محدود امکانیت و محدود ساحهلرده ایشلهیدیگن عیاللر گه یاردم یا که برنامه نظر گه آلینیشی کیرهک.»
عینحالده، سرپرست حکومت سوزلاوچیسی ذبیحالله مجاهد اوزگریشلردن کیین عیاللر گه تینچ و مصوون فضا یرهتیلگونچه، دولت ادارهلری خادملری اویلری گه قالیب و آیلیکلری تولنیشینی ایتگن ایدی.