ناتینچلیک، قشاق‌لیک و ایش‌سیزلیک باعث افغانستان یشاوچی‌لریدن مینگ‌لرچه‌سی اولکه نی ترک قیلیب و باشقه مملکت‌لرده قیین وضعیت ده حیات کیچیره‌دیلر.
افغانستان مهاجرلریدن کوپینچه‌سی، تینچ و اوروش دن اوزاق بیر حیات گه ایریشیش اوچون ناقانونی مهاجرلیک نینگ قیینچیلیک‌لرینی قبول قیله‌دیلر، بیراق مقصد گه ایریشگن‌لریدن کیین تیل نی بیلمه‌سلیک و شونگه اوخشش اونلرچه باشقه قیینچیلیکلر بیلن دوچ کیله‌دیلر.
کرونا ویروسی اروپا ده یشه‌یدیگن افغانستانلیک مهاجرلرنینگ رنجی نی نیچه برابر قیلگن. اروپالیک مملکت‌لرده یشه‌یدیگن افغانستان مهاجرلریدن بیری محمد دیر. محمد «مستعار آت» بغلان ولایت مرکزی پلخمری شهری نینگ یشاوچیسی دیر. او، ۶ ییل دن بویان سویس نینگ اوزاق ییرلریدن بیری ده حیات کیچیره‌دی. محمد، حیات نی اوتکزیش و بیر لقمه نان تاپیش اوچون بیر بنا ده ایشچی صفتیده ایش قیله‌دی.
او سوئیس گه ییتیشگنی و ناقانونی مهاجرلیک نینگ قیینچیلیک‌لری توغریسیده بونده‌ی دیدی: «بیزلر اولکه نی ترک قیلیب و ایران کیلگنی‌میزدن بویان کوپینچه قیینچیلیک‌لرنی کوردیک، بیر کرولا موتر ده کمیده ۱۲- ۱۳ کیشی نی جایلشتیره‌دی ایدیلر؛ بیزلر آچ و سووسیز کوپ یول‌لرنی پیاده یوریب و ییگولیک نان و سووی‌میز یوق ایدی. شونینگدیک یوللرگه پولیس‌لر بیلن دوچ کیلیش و اوق اصابت قیلیش قورقینچی هم بار ایدی. کوپ قیینچیلیکلر بیلن ترکیه کیلدیک و غرق بوله‌دیگن کیمه‌لر بیلن اوزیمیز نی سویس گه ییتیشتیردیک.»
مذکور کیشی کرونا ویروسی زمانیده مهاجرلرنینگ وضعیتی توغریسیده ایتیشیچه، بو ویروس جریانیده اولرگه ییترلیچه ساغلیک خذمتلر ییتیشمه‌یدی ایکن. اونگه کوره، سوئیس دولتی کرونا ویروسی نینگ سیناوگه آلیش اوچون ۸۰ الی ۹۰ فرانک پول آله‌دی.
او کرونا ویروسی زمانیده حیات قیینچیلیگی توغریسیده سلام‌وطندارگه ایتیشیچه: «مین اوزیم گه شبهه‌لندیم و کرونا ویروسی نی چک قیلیش اوچون اولر ۸۰ الی ۹۰ فرانک پول آلدی. بولرگه علاوه اولر اهالی نی حق و ناحق جریمه قیلیش اوچون حرکت قیله‌دی ایدی و مهاجرلردن کوپینچه‌سی جریمه بوله‌دی ایدی. بیزلرگه ۵ کیشی بیر ییرگه بولمه‌سین دیب آگاه‌لنتیره‌دی ایدی، بیراق بیزلر ایش قیلیش اوچون بیر ییرگه بولیب و جریمه توله‌شگه زورلنه‌دی ایدیک. ایش قیلمه‌گن صورتده خرچی‌میزنی تاپه آلمه‌یدیک»
محمد، سویس گه حیات کیچیریش دن راضی ایمس. او ایشچی‌لرنینگ حقوقی و سوئیس دولتی نینگ ایش قانونی توغریسیده ایتیشیچه، درآمدلری نینگ اوچ فایزی دن یالغیز بیر فایزی نی قولگه کیلتیره‌دی و باشقه ایکی فایز سوئیس دولتی نینگ خزینه‌سیگه کیته‌دی.
حامد رحمانی، اروپا ده یشه‌یدیگن باشقه بیر افغانستانلیک مهاجر دیر. جناب رحمانی سویدن گه ییتیشیش اوچون کوپ خوف و خطرلرنی باشدن اوتکزگن.
او، ناقانونی مهاجرلیک نینگ خطرلری و قیینچیلیک‌لری توغریسیده ایتیشیچه: «بیزلر اولکه نی ترک قیلگندن بویان کوپ قیینچیلیک‌لرنی کوردیک. ایران دن اوتیب ترکیه کیلدیک و یونان کیتیش اوچون ۷۰ کیشی بیر کشتی گه میندیک، کشتی کوپ آغیر بولگنی اوچون ایچی سوودن تولدی و بیزلر کشتی نی بیر آز ینگیل قیلیش اوچون بیک‌لریمیز نی سووگه تشله‌دیک، عیاللر و باله‌لر کوپ یمان وضعیت گه قرار تاپگن ایدی و بیزلر بو وضعیت نی کوریب کوپ قیغولندیک. نهایتده خداوند نینگ لطفی بیلن یونان دن سویدن گچه کوپ قیینچیلیک‌لرنی کورمه‌دیک.»
حامد، سویدن ده یشه‌یدیگن مهاجرلرنینگ وضعیتی نی کوپ یمان دیب و کرونا زمانیده سویدن دولتی تامانیدن ساغلیک خذمتلر ترقه‌تیلیشی دن راضی ایمس.
شونده‌ی بیرحالده، بغلان ده مهاجرلر ریاست نماینده‌سی محمدحیدر حازم نینگ ایتیشیچه، کرونا ویروسی رواجله‌نیشی بیلن مهاجرلردن قطاری اروپالیک مملکت‌لردن اولکه گه قیتگن. حازم گه کوره، سویدن، دانمارک، فرانسه و آلمان مملکت‌لریدن بغلان گه قیتگن مهاجرلرگه، مهاجرلر ریاستی و باشقه یاردم بیرووچی نهادلر تامانیدن هیچ قنده‌ی یاردم بیریلمه‌گن.
جناب حازم گه کوره، مذکور مهاجرلر کرونا کسل‌لیگی زمانیده اروپالیک مملکت‌لردن زوردن چیقاریلگن ایکن. باش‌پناه ایزلاوچیلر یخشی بیر حیات گه ایریشیش اوچون عمرلرینی صرف قیلگن، بیراق حاضر بوش قول بیلن قیته‌دن اولکه گه قیتگن.
