مملکت یشاوچیلری، بازارلرده آزیق-آوقت و باشقه نرسهلر نرخی آشیشی و اقتصاد ضعیفلیگی اوچون ساتیب آلالمسلیکدن شکایت قیلماقدهلر. تورلی ولایتلردن بیرقطار یشاوچیلر، سونگی ایکی آی ایچیده اینیقسه یاغ و برنج قیمتی سیزیلرلی درجهده آشیب و ساتیب آلیش گه قورب ییتمسلیگینی ایتهدیلر.
بدخشانلیک شمسالرحمان و کابل یشاوچیسی نیکبخت، نرخ-نوالر آشیشی بیلن اقتصادی باسیملری کوپهیگنینی بیلدیرهدیلر.
شمسالرحمان شوندهی دییدی: «آزیق-آوقت نرخی آشگن ساتیب آلیشگه قوربیمیز ییتمهیدی؛ مثال اوچون ۱۰ لیترلیک یاغ ۸۰۰ افغانی ایدی ایندیلیکده ۱۲۰۰ افغانی گه آشگن و بیر بوجی برنج هم اوچ مینگ افغانیدن آشگن. اقتصادیمیز ضعیف و دولتدن آزیق-آوقت نرخ-نوالرینی کنترول قیلیشنی ایستهیمیز.»
کابللیک نیکبختنینگ ایتیشیچه: «بیر روپیه ایکی روپیه گه قچان ساتیب آلیش ممکن؛ ایشانینگ اوییده هیچ نرسه میز یوق؛ نانواییدن بیران دانه نان آلیب بارهمن، شکر، یاغ و یاقیلغی مادهمیز یوق.»
احصائیه و معلومات ملی ادارهسینینگ معلوماتیگه کوره، اوشبو ییل عقرب آییده آزیق-آوقت نرخی ۲.۳ فایز و باشقه نرسهلر نرخی ۱.۲ فایز آشگن.
اوشبو ادارهنینگ معلوماتلری اساسیده، اوشبو ییل قوس آییده آزیق-آوقت نرخی عقرب آیی گه نسبتن ۴.۲ فایز آشگن و هر آی نرخ-نوالر آشیشیدن درهک بیرهدی.
احصائیه معلوماتلریگه کوره، قوس آییده، دان محصولاتلری نرخی ۳.۵ فایز، یاغ نرخی ۱۳.۹ فایز و ناآزیق-آوقت نرخی ۱.۹ فایز بیر آی اولی گه قرهگنده آشگن.
شو بیلن بیرگه، بادغیس و لغمان یشاوچیلریدن بیرقطاری، هر آی اوتیشی بیلن نرخ-نوالر آشیشیدن شکایت قیلیب و دولتدن بازارنی کنترول قیلیشنی سورهیدیلر.
بادغیسلیک سمیرنینگ ایتیشیچه: «آلدین یاغنی ۸۵۰ دن ۹۰۰ افغانی ساتیب آلردیک ایندی ۱۱۵۰ افغانیگچه آشگن گوریچ نی سابقلری ۲ مینگ ۵۰۰ افغانیگچه آلردیک ایندی ۳ مینگچه آشگن، ساتیب آلیش قیین.»
شو بیلن بیرگه، لغمان یشاوچیلریدن بولمیش حجرتالله شوندهی دییدی: «قیمتلر آشگن ساتیب آلیشگه قوربیمیز ییتمهیدی، فقط اون نرخی اونچه قیمت ایمس؛ یاغ قیمت بولگن. دولتدن بازارده نرخ-نوالرنی کنترول قیلیشنی ایستهیمیز.»
ساتوچیلردن بعضیلری گه کوره، سونگی ایکی آی ایچیده برنج و یاغ قیمتی سیزیلری درجهده آشگن؛ بیراق اون نرخی گه اونچهلیک فرق کیلمهگن.
کابل شهریده دکاندار سیدآغا، سونگی ایکی آیده یاغ نرخی ۵۰۰ افغانیگچه و بیر بوجی گوریچ نرخی ۶۰۰ افغانیگچه آشگن.
او شوندهی دییدی: «اون نرخی اونچه فرق قیلمهگن ۱۴۰۰ دن ۱۴۲۰ افغانی قیمت بولگن، بیر پیپ یاغ ۲ مینگ افغانی، بیر بوجی برنج ۲۹۰۰ و ۳ مینگ افغانی گه آشگن و اقتصاد ضعیفلیگی اوچون ساتیب آلیشگه قوربیمیز ییتمهیدی.»
اسلام امیرلیگی اقتصاد وزیرلیگی، بوندن اول دنیا بازارلریدهگی اوزگریشلر طفیلی افغانستان بازارلریده نرخ-نوالر قیمت بولگن دیب، قیمتلر آشیشیدن تشویش بیلدیرمسلیک کیرهک دیگن.
ایتیش ضرور کی، سونگی آیلرده پاکستان بیلن سودا بوتون یونهلیشلری یاپیلیشی و افغانستان سودا یوللری اوزگریشی، قوشنی مملکتلردن مینگلب افغانستانلیک قیتیشی بیلن، آزیق-آوقت، دارو و یشش جای قیمتی سیزیلری درجهده آشگن.
