سونگی ییللر انرژی و گازلی ایچیملیکلر، افغانستاننینگ یاشلریدن قطاری آرهسیده اینگ کوپ صرفلنهدیگن محصوللردن بیریگه اَیلنگن. آسان شکلده قولگه کیلیش امکانیتی و نسبتاً ارزان نرخی سبب، اولردن قطاری هر کونی بو محصوللردن فایدهلنهدیلر.
کابل یشاوچیسی و فایدهلنووچیلردن بیری بولمیش امیدنینگ ایتیشیچه، چرچهگنی پیتلر همده اویغاق قالیش اوچون گازلی ایچیملیکلردن فایدهلنهدی. اونینگ کوپهیتیریشیچه: «کوپراق اویغاق قالیش، چرچهگنینی کیتگزیش و دقتنی کوچهیتیریش مقصد، انرژیدن فایدهلنهمن. شونینگدیک آز پول گه ساتیب آلالهمیز و میوهلرگه قرهگنده فایدهلنیشی هم قولی دیر.»
شونینگدیک کابل یشاوچیلریدن باشقه بیری هوسی، آوقتنی یخشیراق هضم قیلیش اوچون گازلی ایچیملیکلردن فایدهلنیشینی ایتهدی. «فکرمچه انرژی و گازلی ایچیملیکلر آوقتنی یخشیراق هضم قیلیش اوچون فایدهلی دیر و مین اوزیم جودهیم خوشم کیلهدی و حتا بیر هفتهده ایکی یا-ده اوچ مرته ایچهمن.»
هر کونی بیر یا-ده ایکی ته انرژی ایچهدیگن هرات یشاوچیسی ذبیحالله بایرامینینگ ایتیشیچه: «کوپراق دوستلر بیلن بولگنیمیز، شهردن تشقریگه چیقیش و کوپ آوقت ییگنیمیزده انرژی و گازلی ایچیملیکلردن ایچهمن.»
انرژی و گازلی ایچیملیکلر اهالی آرهسیده کینگ ترقهلگنی بیرحالده، شفاکارلر اونینگ تیش و آغیز سلامتلیگی عاقبتلری گه نسبت آگاهلنتیرهدیلر. آغیز و تیش بوییچه شفاکاری لطفالله رسولی، آغیزنی تنه سلامتلیگی اوچون بیر ایشیک دیب و ایتیشیچه، اوشبو محصوللرنینگ صرفلش تنه اوچون ضررلی دیر. اونینگ کوپهیتیریشیچه: «انرژی و گازلی ایچیملیکلر تیشلرگه تورتته اساسی سیزیلرلی تاثیر کورستهدی؛ بو ایچیملیک تیش میناسی اورتهدن کیتیشی، تیشلر چوریشی، ایسیقلیک و ساووقلیککه حساسیت قیلیشی همده تیشلرده لکه تاپیلیشیگه سبب بولهدی.»
اوشبو شفاکارگه کوره، تیشنینگ دستلبکی چوریشی دوالنیشی ممکن، بیراق گازلی ایچیملیکلرنینگ حددن تشقری صرفلنگنی نتیجهسیده بوزیلگن تیش میناسی، طبیعی شکلده قیته توزهتیلمهیدی.
شونینگدیک بیر قطار فایدهلنووچیلر تجربهلری هم بو محصوللرنینگ سلبی تاثیرلرینی کورستهدی. کابل یشاوچیسی بولمیش عمراننینگ ایتیشیچه، گازلی ایچیملیکلردن فایدهلنیش سبب ساغلیق قیینچیلیکلرگه روپهره بولگن. «اوتمیشده درس اوقیش جریانیده انرژیلردن فایدهلنهر ایدیم که تیش آغریق و اویقو قیینچیلیگیگه سبب بولیب و شونینگدیک معدهم اسیدی کوپهیشی و کوییشیگه چیلنگن ایدیم.»
کابل یشاوچیلریدن باشقه بیری پاکیزهنینگ ایتیشیچه: «انرژی و گازلی ایچیملیکلردن فایدهلنمهیمن؛ چونکه اونینگ مزهسیدن خوشم کیلمهیدی و شونینگدیک معدهمنینگ کوییشیگه سبب بولهدی.»
بو بیلن بیرگه، تیش شفاکارلریدن باشقه بیری نرگس قاریزادهنینگ اورغولشیچه، حتا انرژی و گازلی ایچیملیکلرنینگ صفتی، قیمتی یا-ده برندی، اولرنینگ ضررسیزلیگی معناسیگه بولمهی و ضرری کمهیشی اوچون اوندن صرفلنیشنینگ کمهیشی کیرهک. «قاریزادهنینگ کوپهیتیریشیچه: «اوشبو ایچیملیکلر صرفلنیشی کمهیتیریلسین، آغیزده کوپ سقلنمهسین، نی بیلن ایچیلسین و ایچیلگنیدن کمیده ۳۰ دقیقه کیین تیشلر یوویلسین؛ چونکه اسید آرقهلی ملایم بولگن مینا یوزیگه بیردن مسواک تارتیش، کوپراق ضرر ییتیشتیره آلهدی.»
شفاکارلرنینگ اورغولشیچه، انرژی و گازلی ایچیملیکلرنی اورنیده سوو، سوت، چلاو و میوهلردن فایدهلنیش و ساغلیق توصیهلرنی رعایت قیلیش، آغیز و تیش سلامتلیگیگه ضرر یتیش خوفینی سیزیلرلی درجهده کمهیتیریشی ممکن.
