سلام‌وطندار نینگ ۲۴ بیزه‌تووچی عیال بیلن اوتکزگن صحبتی اساسیده، سرپرست حکومت تامانیدن عیاللر نینگ گوزه‌للیک سالون‌لری یاپیلیشیدن کیین، بیزه‌تووچی عیاللردن بیرقطاری مملکت نی ترک ایتیش مقصدیده سعی‌وحرکت قیلماقده‌لر.
اوشبو گزارش‌ده صحبت اوتکزیلگن عیاللردن ۷۵ فایزی، یالغیز عایله سرپرستی بولیب، عیاللر گه سرپرست حکومت تامانیدن یره‌تیلگن ینگی چیکلاولر سبب، حاضر ایسه یامان اقتصادی و روحی قیینچیلیک بیلن روپه‌ره بولگنلر.
بیوه عیاللر، ییتیم قیزلر و ایرکک‌لری قرری‌لیک یا که ناگران‌لیک باعث ایشلش توانی بولمه‌گن خاتین-قیزلر، اوشبو گزارش‌ده اولر بیلن صحبت اوتکزیلگن بیزه‌تووچی عیاللر ارا شامل دیر.
بیش ییل‌دن بویان مکروریان منطقه‌سیده گوزه‌للیک سالونی بولگن اوچ باله سرپرستی ناجیه عمری، اوشبو یول آرقه‌لی باله‌لری نینگ خره‌جتینی تامین قیلر ایکن.
اونینگ ایتیشیچه، گوزه‌للیک سالون‌لری نینگ یاپیلیشی بیلن، باله‌لریدن مالی حمایت قیلیش اوچون هیچ بیر درآمدی یوق و حاضر ایسه ییتیم باله‌لری بیلن یامان اقتصادی و روحی قیینچیلیک بیلن دوچ بولگن.
ناجیه نینگ کوپه‌یتیریشیچه: «حاضرگی قیینچیلیک باعث بیز یامان احوال ده قالگن‌میز، مین اوچ ییتیم باله‌م بیلن قنده‌ی قیله‌ی، حمایت قیله‌دیگن هیچ کیمیم یوق. اوی اجاره‌سی، آزیق-آوقات موضوع‌سی و باشقه تعلیم و تحصیل مسئله‌سینی، بیزهتووچیلیک بیلن تأمینلر ایدیم.»
منطقه‌سیده‌گی گوزه‌للیک سالون‌لریدن بیری نینگ مسئولی نسا سعادتی، آلتی کیشی‌لیک عایله سرپرستی دیر. تورموش اورتاغی بیلی‌دن فلج بولگن اوشبو عیال نینگ ایتیشیچه، بیزه‌تووچی عیاللر خصوصیده سرپرست حکومت تامانیدن یره‌تیلگن ینگی چیکلاو‌لردن کیین، نیمه قیلیب و کیم‌دن یاردم ایسته‌ش نی بیلمه‌یدی.
بیزلرنینگ فیسبوک صحیفه‌میزگه باش اورینگ!
اونینگ کوپه‌یتیریشیچه: «تورموش اورتاغیم ایش قیله آلمه‌یدی. انه شوو سبب، برچه اوی مسئولیتی مینی بوینیم‌گه.»
آته‌سی اولگن و آنه‌سی فلج بولگن ییتیم قیزلردن ماسوا احمدی نینگ ایتیشیچه، او عایله نیازلرینی بیزهتووچیلیک یولی آرقه‌لی تامین قیلر ایکن و حاضر ایسه ایشینی قولدن بیریب و برچه عایله اعضاسی بیلن خواطرده دیر.
اونینگ کوپه‌یتیریشیچه: «بیزهتووچیلیک یولی آرقه‌لی عایله‌م نینگ نیازلرینی تامین قیلر ایدیم، چونکه آته‌م قریب ۵ ییل آلدین کسل‌لیک طفیلی وفات قیلگن و اکه‌م یوق. آته‌م اولگنی‌دن کیین، آنه‌م روحی قیینچیلیک تاپگنی سبب، مغزی خسته‌لیک سبب بیر تامانی فلج بولدی.»
بولر گه علاوه، بیزهتووچیلیککه یوز کیلتیرگن تورموش اورتاغلری ایش‌سیز یا که تعلیم‌دن محروم قالگن خاتین-قیزلر، سرپرست حکومت نینگ ینگی بویروغی‌دن کیین، یامان اقتصادی وضعیت و روحی قیینچیلیک بیلن روپه‌ره بولگنلر.
کابل نینگ مکروریان منطقه‌سیده جایلشگن «نایس گوزه‌للیک سالونی» مسئولی رویا عثمانی، سلام‌وطندار بیلن اوتکزگن صحبتیده ایتیشیچه، توزوم اوزگرگنیدن کیین ایش‌سیز بولگن و حاضر ایسه برچه اوی خرجتی اونینگ زمه‌سیگه دیر.
اونینگ کوپه‌یتیریشیچه: «حاضر ایسه اوزیم و تورموش اورتاغیم بیکار میز. تورت نان‌خور باله‌م بار. خدا گه ایشانینگ که ایرتنگ‌دن آخشم‌گچه ایلشب تور روپیه تاپر ایدیک. گوزه‌للیک سالون‌لری یاپیلیشی بیلن اقتصادی احوالیمیز کیسکین‌لشگن.»
بغلان نینگ پلخمری شهری‌ده «شام‌پاریس گوزه‌للیک سالونی» ده ایشله‌یدیگن (مستعار اسملی) نرگس نینگ ایتیشیچه، گوزه‌للیک سالون‌لری نینگ یاپیلیشی بیلن، روحی قیینچیلیککه چلینگن.
اونینگ کوپه‌یتیریشیچه: «حاضر ایسه کوپینچه روحی قیین‌چیلیک‌لر گه دوچ کیلگنمیز. برچه عیاللر نی بیر قفس گه تشلب و باغله‌گنلر، باشقه قاچیش گه هیچ یول یوق. حاضرگی حکومت‌ده عیاللر اوچون هیچ نرسه کوریلمه‌یدی. ایشی‌میز نی قولی‌میزدن آلدی. حاضر ایسه قیینچیلیک و قارانغی‌لیکده قالگن میز.»
شونینگدیک پغمان تومنی بیزه‌تووچیلریدن فاطمه نینگ ایتیشیچه: «اقتصادی قیین‌چیلیک‌دن هم کوپراق، روحی قیینچیلیک نی اورته گه کیلتیرگن. اوی‌ده ایش‌سیز اولتیره‌دیگن عیاللردن ایمس ایدیک، ایشلر ایدیک.»
قیزلر نینگ تعلیم‌دن محروم بولگنی‌دن کیین، بیزهتووچیلیککه یوز کیلتیرگن، کابل شهری‌ده بیزه‌تووچیلردن باشقه بیری نجمه صمدی نینگ ایتیشیچه، عیاللر ایشی اوچون باشقه هیچ قنده‌ی یول قالمه‌گن.
اونینگ کوپه‌یتیریشیچه: «۱۲-صنف اوقووچیسی ایدیم و تورت یریم آی‌دن کیین سیناولر اوتکزیلیشی کوتیلر ایدی، اسلام امیر‌لیگی قدرت گه ایریشدی و تورت یریم آی‌دن کیین آلینه‌دیگن سیناو‌دن فارغ قیلدیلر. تقدیرسیز قالدیک، درس یوزینی باشقه کورمه‌دیک. ینه هم شو ایشیم بارلیگی گه خوش ایدیم. حاضر گوزه‌للیک سالون‌لری نی هم یاپدیلر.»
شونده‌ی بیرحالده، بیزه‌تووچی عیاللردن باشقه بیر قطاری سلام‌وطندار بیلن اوتکزگن صحبت‌لریده ایتیشلریچه، عیاللر گه سرپرست حکومت نینگ ینگی چیکلاو‌لری بیلن، مملکت نینگ ترک قیلیش گه مجبورلر.
کابل نینگ غرب تامانیده‌گی بیزه‌تووچی عیاللردن عزیزه قاسمی نینگ ایتیشیچه، هیچ بیر یول قالمه‌گن و مملکت نی ترک قیلیش گه مجبور دیر.
اونینگ کوپه‌یتیریشیچه: «باشقه هیچ یول قالمه‌دی، پول هم یوق، بیراق ینه هم بیر یول و چاره تاپیب و مملکت نی ترک قیلیش اوچون سعی و حرکت قیله‌من.»
بیزلرنینگ توییترده هم تعقیب قیلینگ!
عین حالده، گوزه‌للیک سالون‌لر اوچون یره‌تیلگن ینگی چیکلاو‌لردن کیین، ناقانونی شکلده ایران گه کیتگن مهتاب افتخار نینگ ایتیشیچه: «کوپ قیین‌چیلیک‌لر بیلن بو ییر گه کیلدیم. افغانستان‌لیک‌لر بو ییرده گوزه‌للیک سالونی آچه آلمه‌یدیلر. اوزلرینگیز بیله‌سیزلر که برچه سرمایه‌میز نی صرف‌له‌گن ایدیک، اوزلرینگیز شاهد که باشی‌میز گه قنده‌ی وضعیت کیلدی.»
شونده‌ی بیرحالده، سوداگرلیک بیرلشمه‌سی ایشلاوچیسی و بیزهتووچیلیک نماینده‌سی رها حسنی، مملکت بویلب عیال بیزه‌تووچیلر سانینی ۱۲ مینگ دیب ایتیشیچه، هر بیر گوزه‌للیک سالونی‌ده کمیده ۵ کیشی ایشلر ایدیلر.
اونگه کوره، عیاللر نینگ گوزه‌للیک سالون‌لری یاپیلیشیدن کیین، قریب ۶۰ مینگ عیال ایش‌سیز بولگن.
اونینگ کوپه‌یتیریشیچه: «افغانستان بویلب ۱۲۰۰۰ عیال بیزهتووچیلیک بیلن مصروف ایدیلر، گوزه‌للیک سالون‌لری نینگ یاپیلیشی بیلن، اورته شکلده حساب قیلگنی‌میزده هر سالون‌ده ۵ ایشلاوچی ایشلر ایدی، حاضر قریب ۶۰۰۰۰ عیال ایش‌سیز بولیب و درآمدلرینی قولدن بیرگنلر. اولردن هر بیری عایله سرپرستی ایدی و عایله خره‌جتینی تامین قیلر ایدی.»
باشقه بیر تاماندن، عیال حقوق فعاللری نینگ ایتیشلریچه، سرپرست حکومت عیاللر اقتصادی خصوصیده بدیل بیر برنامه‌سی بولمه‌گنی بیرحالده، کون اوتیشی بیلن عیاللر فعالیتی زمینه‌سی نی کمه‌یتیره‌دی.
عیال حقوقی فعالی زینب رضایی نینگ ایتیشیچه، چیکلاولر بیکار قیلینیب و عیاللر گه ایش حقی بیریلیشی کیره‌ک.
اونینگ کوپه‌یتیریشیچه: «بو چیکلاولر بیکار قیلینیب و عیاللر اساسی حقوق‌لریدن فایده‌لنیش اوچون اولر گه ایش حقی بیریلیشی کیره‌ک.»
شونینگدیک عیال حقوقی فعال‌لریدن باشقه بیری ثریا پیکان نینگ ایتیشیچه: «حکومت بو قرار نی آلگن پیتده، بو قرار‌دن آلدین اولر اوچون اقتصادی پلان تنظیم قیلیشی کیره‌ک ایدی یا که اولر گه باشقه بیر ایش نظر گه آلیشی کیره‌ک ایدی، قیغو بیلن حاضرگی حکومت‌ده بو مسئله‌لر موجود ایمس.»
بولر گه علاوه، سرپرست حکومت نینگ امر بالمعروف و نهی عن‌المنکر وزیرلیگی سوزلاوچیسی محمد‌صادق عاکف مهاجر، عیاللر نینگ گوزه‌للیک سالون‌لری یاپیلیش سببی نی، حکومت تامانیدن بیزه‌تووچیلر گه بیریلگن ۱۴ ماده‌لیک لایحه قانون‌لری، رعایت بولمسلیگی عنوان قیلگن.
عین‌حالده، سلام‌وطندار بیلن صحبت اوتکزگن بیزه‌تووچی عیاللردن کوپ قطاری، اوشبو لایحه خصوصیده خبر‌سیز‌لیکلرینی ایته‌دیلر.
جناب مهاجر نینگ ایتیشیچه: «گوزه‌للیک سالون‌لری یاپیلیشیدن آلدین۱۴ ماده‌لیک بیر لایحه یوبارگن ایدیک، اونی بیرلشمه گه یوبارگن ایدیک و بیرلشمه ایسه اونی برچه گوزه‌للیک سالون‌لری گه یوبارگن ایدی. مذکور لایحه‌ده، قاش تیریلمسلیگی، ساچ قیرقیلمسلیگی و بویلمسلیگی، تیرناق بویلمسلیگی وهکذا یازیلگن ایدی.»
آلتینچی صنف‌دن یوقاری قیزلر نینگ تعلیم‌دن محروم ایتیلیشیدن ۲ ییل اوتیشی و شونینگدیک بیلیم یورت‌لر و دولتی و نادولتی نهاد‌لرده قیزلر و عیاللر نینگ تحصیلی و ایشی تقیقلنگن بیرحالده، سرپرست حکومت تامانیدن عیاللر نینگ گوزه‌لیک سالون‌لری یاپیلگن.
