حقوقشناس و دین عالملری، عیاللرنینگ ایشلشینی اولرنینگ شرعی و قانونی حقی بیلیشسه-ده، دایکندیده ایریم عیاللر حیاتدهگی باسیملر، اوی-روزغار مسئولیتلری و عنعنوی قرهشلر تورموش گه چیققنیدن همده آنه بولگنیدن کیین ایشینی دوام ایتتیریشیگه اساسی توسیق بولهیاتگنینی ایتهدیلر.
روانشناسلرنینگ تأکیدلشیچه، ایشنی مجبوراً ترک ایتیش عیالنینگ روحی سلامتلیگیگه سلبی تأثیر کورستهدی. چونکی ایش نهفقط درآمد منبعی، بلکی عیالنینگ شخصی اوزلیگینی شکللنتیروچی عامللردن بیری هم دیر.
شونینگدیک، دایکندیده امر معروف و نهی منکر مسئولی عیال تدبیرکالر اوچون قولی و خوفسیز شرایط یرهتیلگنینی ایتیشسه-ده، ولایتدهگی ایریم عیاللر هنوز اوز کسبینی دوام ایتتیریش یولیده معمالر موجودلیگیدن شکایت قیلماقده.
شکیلا ۲۵ یاشده، نیلی شهریده اوقیتووچی بولیب ایشلهگن. او آنه بولگنیدن سونگ ایرینینگ عایلهسی قرشیلیگی سببلی ایشینی ترک ایتیشگه مجبور بولگن. او شوندهی دییدی: «اولرنینگ مین ایشیمنی ترک ایتیش اوچون ایتگن سببی شوندهی ایدی: سین فرزندلی بولدینگ، آنهسن. بوتون اعتبارینگنی فرزندینگنی تربیهلشگه قرهتیشینگ کیرهک. حاضرچه سین اوچون ایشلش یا کی وظیفه گه ایگه بولیش شرط ایمس.»
۳۵ یاشلی فاطمه احمدی ایسه بیر موسسهده ایکی ییل ایشلهگنیدن و اوچینچی فرزندی توغیلگنیدن سونگ، ایرینینگ عایلهسی اونگه ایشینی دوام ایتتیریشگه رخصت بیرمهگنینی ایتهدی. او شوندهی دییدی: «اوچینچی فرزندیم توغیلگچ، ایریمنینگ عایلهسی ایچکی موسسهلردن بیریده ایشیمنی دوام ایتیریشیمگه رخصت بیرمهدی. مین او ییرده قریب ایکی ییل خادم بولیب ایشلهگندیم. اولر ایندی اوی و اوچ نفر فرزند مسئولیتی سینینگ زمهنگنده، کوپراق وقتینگنی اویده اوتکزیشینگ کیرهک دییشدی. ایریمنینگ فکری هم شوندهی ایدی.»
لیلا رحیمی، ۲۵ یاشده، تورموش گه چیققنیدن سونگ ایرینینگ عایلهسی اونگه ایشلشنی دوام ایتتیریش گه رخصت بیرمهگنینی ایتهدی. او شوندهی دییدی: «داروخانهلردن بیریده قابله صفتیده ایشلردیم و ایشیمنی جوده یخشی کورردیم. بیراق تورموش گه چیققنیمدن کیین ایریمنینگ عایلهسی، ایندی اویدن تشقریده ایشلهشینگه احتیاج یوق، عیالنینگ وظیفهسی اوی-روزغار ایشلرینی قیلیش و اویده قالیش.»
شو بیلن بیرگه، متخصصلرنینگ ایتیشیچه، عیاللر شریعت و قانون نقطهی نظریدن ایشلش، مالیهوی مستقللیک همده مُلکه ایگهلیک قیلیش حقوقیگه ایگه. دایکندیده حقوقشناس محمدرضا محمدی شوندهی دییدی: «انسان حقوقلری و خلقارا حجتلر نقطهی نظریدن ایش قیلیش جنسیدن قطعی نظر هر بیر انساننینگ اساسی حقوقلریدن بیری دیر. عیاللرنی ایشلشدن محروم قیلیش اولرنینگ انسانی و اساسی حقوقلرینینگ بوزیلیشی حسابلنهدی. عیاللرنینگ ایش بیلن تأمینلنیشی و اجتماعی فعالیتی مملکتده عملدهگی قاعدهلر، رهبریت فرمانلری و شریعت حکملری دایرهسیده ترتیب گه سالینهدی.»
دین عالمی حکمتالله عارفی ایسه، اسلام دینی دایرهسیده عیاللرنینگ ایشلشیگه هیچ قندهی شریعی توسقینلیک یوقلیگینی، عیاللر ایش قیلیش و اوز درآمدلریگه ایگهلیک قیلیش حقوقیگه ایگه ایکنینی ایتهدی. اونگه کوره: «دین نقطهی نظریدن عیاللرنینگ ایشلشی و اقتصادی فعالیتی یوقاری اورینگه ایگه. بو بارهده نهفقط هیچ قندهی شریعی توسقینلیک یوق، بلکی اسلام عیاللرنینگ مالیهوی مستقللیگی و مُلکه ایگهلیک قیلیش حقوقینی جوده مهم و ضرور مسئله دیب بیلهدی.»
روانشناس احسانعلی سعادت، هم عیاللرنینگ مجبوراً ایشدن چیتلهتیشی فقط اقتصادی معما ایمسلیگینی، بلکی اولرنینگ روحی سلامتلیگیگه هم چقور تأثیر کورسهتیشی ممکنلیگینی بیلدیرهدی. او شوندهی دییدی: «ایشنی مجبوراً ترک ایتیش عیاللرنینگ روحی سلامتلیگیگه سیزیلرلی تأثیر کورسهتیشی ممکن. ایش فقط درآمد منبعی ایمس، بلکی اولرنینگ شخصی اوزلیگینینگ بیر قسمی دیر و انسانلرده اوزینی فایدهلی حس قیلیش همده جمعیتدهگی اشتراک تویغوسینی شکللنتیرهدی.»
شو بیلن بیرگه، دایکندی ولایتی امر معروف و نهی منکر ریاستینینگ نشرات بوییچه مسئولی سیدروحالله گوهری گه کوره، اوشبو اداره گه تیگیشلی نهادلر بیلن همکارلیکده عیال تدبیرکارلر اوچون قولی و خوفسیز شرایط یرهتگنینی ایتهدی. او شوندهی دییدی: «امر معروف و نهی منکر و شکایتلرنی تینگلش ریاستی، محتسبلر مسجدلر همده علمالر، نفوذلی شخصلر، محله وکیللری و مسجد اماملری بیلن اوتکزیلگن اصلاحات ییغیلیشلری آرقهلی عیاللرنینگ عایلهوی مسئولیتلرینی سقلشگه اعتبار قرهتیب کیلماقده. او دایما عیاللرنینگ اساسی وظیفهلری، یعنی کیلهجک اولاد تربیهسی و عایلهوی مسئولیتلرینی آدملر گه ییتکزیشگه حرکت قیلهدی. اگر اسلام شریعتی دایرهسیده ایشلشی اوچون مناسب و خوفسیز محیط موجود بولسه، بو بارهده البته همکارلیک قیلهدی.»
سونگی ییللرده اجتماعی شرایطلرنینگ اوزگریشی نتیجهسیده عیاللرنینگ ایش بازاریدهگی اشتراکی اولگیگه نسبتن کمهیگن بولسه-ده، کوپلب عایلهلرده اوی-روزغار مسئولیتلری، فرزندلریگه غمخورلیک قیلیش و عنعنوی قرهشلر کبی باشقه عامللر هم عیاللرنینگ تورموش گه چیققنیدن و آنه بولگنیدن کیین ایشینی دوام ایتتیریش یا کی ترک ایتیش قراریگه تأثیر کورستگن. حقوق و روانشناس ساحهسی متحصصلری فکریچه، عیاللرنینگ اقتصادی فعالیتینی دوام ایتتیریشی نهفقط عایلهنینگ تورموش شرایطینی یخشیلشگه، بلکی اولرنینگ مالیهوی مستقللیگینی سقلش، اوزیگه بولگن ایشانچینی آشیریش و روحی سلامتلیگینی یخشیلشگه هم یاردم بیرهدی.
