بلخ ده ۹ یاشر عبدالرووف ناملی باله نینگ قوییب یوباریلمه‌گنی اوچون یولگه قوییلگن ناراضلیک نمایش‌لرنینگ دوامیده، عیاللردن قطاری مذکور ولایت انسان حقلری ایرکین کمیسیونی دفتری برابریده اعتراض قیلگن.
عبدالرووف نینگ آنه‌سی زهره، اوغلی نینگ کیله‌جگی خصوصیده خواطر گه دیر. اونینگ ایتیشیچه، اوغلی کیلگوسی ییل ده ۱۰ یاشر بوله‌دی و مکتبی نینگ درس‌لریگه ییتیشیشی کیره‌ک.
مذکور آنه جمهوررئیس غنی دن اوغلی نینگ اوغیرلاوچیلر قولیدن آزاد قیلیشی نی سوره‌گن.
بو باله نینگ عایله‌سی عبدالرووف نی قوییب یوباریلیشی توغریسیده حکومت نینگ ایش‌لریدن تنقید قیلیب ایتیشیچه، اوغلی نینگ اوغیرلنیشی گه قولی بولگن ۳ کیشی حکومت تامانیدن اوشلب آلینیب و ینه قوییب یوباریلگن.
اولرنینگ اورغولشیچه، عبدالرووف کیلگوسی ییل حمل آیی گچه قوییب یوباریلمه‌گن صورتده، انسان حقلری کمیسیونی دفتری برابریده تحصن خیمه قوریش‌لری ممکن.
باشقه بیر تاماندن مملکت شمالیده انسان حقلری ایرکین کمیسیونی مسئوللری، مذکور باله اوغیرله‌نیشی نی اساسی قانون و انسان ارزش‌لریگه قرشی دیب و حکومت دن بو باله قوییب یوباریلیشی اوچون کوپراق حرکت قیلیشی نی سوره‌شگن.
۹ یاشر عبدالرووف کمیده ۵ آی آلدین مکتب تامان کیته‌دیگن بیرچاغده مزارشریف شهریده اوغیرلندی. بو باله عایله‌سی نینگ ایتیشیچه، حاضر آدم اوغیرلاوچیلر عبدالرووف نی قوییب یوباریلیشی بدلی ده ۲ میلیون و ۲۰۰ مینگ دالر طلب قیلگن.
