انسان حقوقی ایرکین کمیسیونی، افغانستانده باله‌لر وضعیتی نینگ یمان بولگنیدن خواطر بیلدیرگن.
اوتگن “سه‌شنبه” کونی انسان حقوقی ایرکین کمیسیونی نینگ بیر گزارش آرقه‌لی اعلان قیلیشیچه، جاری ییلده اوروش‌لر نتیجه‌سیده باله‌لرنینگ تلفاتی کمه‌یگن، لیکن قوراللی اوروش‌لرده باله‌لرنینگ حضوری ۲۵% و تعلیم دن محروم قالگن باله‌لرنینگ سانی ۱۶% کوپه‌یگن.
اوشبو نهاد مذکور گزارشده مملکت ۲۸ ولایتیده ۳ مینگ و ۸۰۷ ایرکک و ۱ مینگ و ۵۰۹ قیز شامل ۵۳۱۸ باله دن بیلن صحبت اوتکزگن.
مذکور گزارشده ایتیلیشیچه، افغانستانده حاضر ده هم باله‌لر جنجل‌لرگه قربان بوله‌دی. گزارش‌گه کوره، ۱۳۹۹- ییلده ۱۲۶ باله دولتی کوچلر و طالبان گروهی قطاریده فعالیت قیله‌ریکن و بو جمله‌دن ۷۶.۲% طالبان قطاری و ۱۵% ایسه دولتی کوچلر قطاریده ایکن.
گزارش گه کوره، اوتگن ییل‌گه قره‌گنده امنیتی کوچلر و طالبان گروهی قطاریده باله‌لردن عسکر آلیش ۲۸% کوپه‌یگن. ۱۳۹۸- ییلده یالغیز ۹۰ باله امنیتی کوچلر و طالبان قطاریده فعالیت قیله‌ریکن.
انسان حقوقی ایرکین کمیسیونی‌گه کوره، افغانستانده اوروش‌لرگه حضوری بولگن باله‌لرنینگ سانی ۲۵% کوپه‌یگن.
صحبت اوتکزیلگن ۵ مینگ و ۳۱۸ باله جمله‌سیدن ۱ مینگ و ۳۹۱ ته‌سی تورلی زوروانلیکلرگه قربان بولگن و بو رقم ۱۳۹۸- ییل‌گه نسبتن ۱۶% کوپه‌یگن.
۱۳۹۹- ییلده ۴۵% باله روحی زوروانلیک، ۴۳.۶% باله فزیکی زوروانلیک، ۳.۲% باله اقتصادی زوروانلیک و ۲.۴% باله جنسی زوروانلیک‌که قربان بولگن و شونینگدیک، ۵.۷% باله باشقه تورلی زوروانلیکلر جمله‌دن لفظی، روحی، فزیکی، اقتصادی و جنسی زوروانلیک‌که قربان بولگن.
انسان حقوقی ایرکین کمیسیونی تامانیدن نشر قیلینگن گزارش‌گه کوره، ۵۹۸ باله جمله‌سیدن ۱۱۲ ته‌سی توفیف دوریده زوروانلیک آستیگه قرار تاپیب و اولر بیلن یمان شکلده یول باریلگن.
شونینگدیک، ۲۰۰ باله، تعیین‌لنگن زمان دن کوپراق قماققه قولگنی‌نی بیلدیرگن، لیکن ۲۸۶ باله انسان حقوقی نینگ نقض ایتیلیشی خصوصیده صحبت قیلمه‌گن.
انسان حقوقی ایرکین کمیسیونی نینگ گزارشی‌گه کوره، جاری ییلده ناتینچلیک، ایش بیلن شغل‌لنیش و عایله تامانیدن ممانعت ایجاد ایتیلگنی سبب، باله‌لرنینگ تعلیم دن محروم قالیشی اوتگن ییل‌گه قره‌گنده کوپه‌یگن.
