بالهلردن حمایت قیلووچی خلق ارا نهادی نینگ ینگی بیر گزارش آرقهلی اعلان قیلیشیچه، جاری میلادی ییلده افغانستان بوییچه کمیده ۱۰ میلیون بالهنی عاجل یاردمگه نیازی بار.
اوشبو گزارشده ایتیلیشیچه، ۹.۷ میلیون باله شامل ۱۸ میلیون کیشی ۲۰۲۱- ییلده تیریکچیلیک نیازلر جملهدن ییترلیچه آذیق-آوقاتگه قول تاپه آلمسلیک خطری بیلن روپهره دیر.
اوشبو نهاد، ۲۰۲۱- ییلده افغانستان یشاوچیلریگه ۳ میلیارد دالر یاردم بیریلیشینی ایستهگن.
بالهلردن حمایت قیلووچی خلق ارا نهاد نینگ افغانستاندهگی سوزلاوچیسی مریم عطایی نینگ ایتیشیچه، اوشبو یاردملر صورت تاپمهگن صورتده، نیازمند عایلهلرنینگ جدی قیینچیلیکلر بیلن روپهره بولیشلری ممکن.
اونینگ ایتیشیچه، اوروش و کمبغللیکدن زیان کورگنلرگه دقت بولمهگن صورتده، کرونا ویروسی و اوروشلر کوپ قطار عایلهلرنینگ آواره و جایسیز بولیشلریگه سبب بولهدی.
افغانستان بوییچه بالهلردن حمایت قیلووچی خلق ارا نهاد باشلیغی کریس یاماندی نینگ اوشبو گزارشده ایتیشیچه، ژنیو کنفرانسیده ثروتمند مملکتلر تامانیدن افغانستانده وعده قیلینگن یاردملر ییترلی ایمس.
اونینگ ایتیشیچه: «انسان دوستلیک نیازلر کوپهیگن بیر حالده، افغانستانده بولگن یاردم خواطرلی شکلده کمهیگن، بیز یمان وضعیتده قرار تاپگنمیز و یاردملر اهالی نینگ نیازینی تامین قیله آلمهیدی.»
بالهلردن حمایت قیلووچی خلق ارا نهاد تامانیدن نشر قیلینگن گزارشگه کوره، اوتگن ییل جریانیده ۲۰۰۰ باله شامل ۶۰۰۰ کیشی هلاک و یرهلنگن. گزارشگه کوره، اوروشلر سبب، ییلده مینگلرچه کیشی اوی و جایلرینی ترک قیلهدیلر و اوشبو ایش انسان دوسلیک نیازلرنی محدود قیلهدی.
عینحالده، اجتماعی ایشلر وزیرلیگی سوزلاوچیسی عبدالفتاح عشرت احمدزی نینگ ایتیشیچه، افغانستان حکومتی نینگ یاردملری محدود دیر.
بوندن آلدین بیرلشگن ملتلر تشکیلاتی انسان دوستلیک ایشلری بوییچه هماهنگلیک دفتری نینگ اعلان قیلیشیچه، جاری ییلده یاردملرگه نیازی بولگن کیشیلرنینگ سانی ۴ ییل آلدین گه قرهگنده ۶ برابر کوپهیگن.