سلام‌وطندار نینگ افغانستان ۲۶ ولایتیده ۴۱۲ خاتین قیز بیلن اوتکزگن تیکشیروی اساسیده، بو تیکشیرو گه اشتراک ایتگن‌لردن ۸۴ فایزی همجنسلری تامانیدن زورهوانلیکّه دوچ بولیب و ۱۶ فایزی تیکشیرو نینگ سوال‌لری گه جواب، هم‌جسن‌لری تامانیدن حاضرگچه هیچ قنده‌ی زورهوانلیکّه روپه‌ره بولمه‌گنلرینی معلوم قیلگنلر.
اوشبو تیکشیرو ده همجنسلری تامانیدن زورهوانلیکّه دوچ بولگنلرینی ایتگنلر دن ۹۱ فایزی روحی زوره‌وانلیک، تورت فایزی فزیکی زوره‌وانلیک و باشقه تورت فایزی هم ایکیله تور زوره‌وانلیک (فزیکی و روحی) گه روپه‌ره بولگنلرینی ایتگنلر.
تیکشیرو ده اشتراک ایتگنلر دن بیری باشقه عیال تامانیدن روحی زورهوانلیکّه دوچ بولیب و گزارش ده اسمی ذکر بولمسلیک شرطی بیلن سلام‌وطندار گه ایتیشیچه: «مسخره قیلیش ممکن کیچیک مسئله کورینسه؛ اما سیز توشینمه‌ی‌سیز باشقه‌لر حقارت کوزی بیلن قره‌ب و عیب نی سیز گه توقه‌دیلر، بو حس سیزنی یوره‌ک دن اولدیره‌دی. ابه‌م نینگ قیزلری هر دایم مینی سیمیزلیگیم اوچون مسخره قیلیب بدقواره و بد هیکل دیب اته‌یدیلر.»
شونینگدیک، زوره‌وانلیک دن جبرلنگن عیاللر بیلن اوتکزیلگن صحبت اساسیده، زوره‌وانلیک بیلن روپه‌ره بولگن ۳۴۴ عیال دن، ۱۸۲ عیال (۵۳ فایز) یشش اوی ده و ۱۹۴ عیال (۴۷ فایز) تشقری ده زوره‌وانلیک نی تجربه قیلگنلر.
شونینگدیک، یشش اوی ده زورهوانلیکّه دوچ بولگن عیاللر نینگ ۴۲ فایزی آته نینگ اویی و ۵۸ فایزی تورموش قوریش دن کیین ایری نینگ اویی ده روحی و فزیکی زوره‌وانلیک بولگنینی معلوم قیلگنلر.
آته نینگ اویی ده زورهوانلیکّه دوچ بولگن عیاللر نینگ ایتیشلریچه، ترتیب بیلن ۵۶، ۲۸، ۱۰، ۲ و بیر فایز عمه، ینگه، مامه، آنه و اوگه‌ی آنه تامانیدن زورهوانلیکّه دوچ بولگنلر.
تیکشیرو ده اشتراک ایتگن قیزلر دن شریفه نینگ سلام‌وطندار نینگ ایتیشیچه، باله‌لیک و یاش‌لیگی آنه‌سی نینگ عمه‌سی بیلن اوروشیده اوتگن و حتا بو تارتیشوولر آته و آنه‌سی نینگ اجره‌لیشی گه یقینله‌گندی.
شونینگدیک، ایری نینگ اوی ده زورهوانلیکّه دوچ بولگن عیاللر نینگ ۸۳ فایزی قین‌آنه و قین‌سینگل، ۱۵ فایزی آوسین و بیر فایزی هم کونداش نی زوره‌وانلیک عاملی دیگنلر.
تیکشیرو معلومات‌لری گه کوره، یالغیز عایله‌وی قرابت عیال گه نسبتن عیال نینگ زوره‌وانلیک عاملی ایمس، زوره‌وانلیک قربانی بولگن ۳۴۴ خاتین قیز دن ۱۶۲ تهسی تشقری ده زوره‌وانلیک نی تجربه قیلگنلر.
بو تیکشیرو ده اشتراک ایتگن وظیفه‌دار ۵۵ فایز خاتین قیزلر، ایش جایی ده همکسبی تامانیدن اینگ آغیر زورهوانلیکّه روپه‌ره بولگنلرینی ایتگنلر. ۸ فایز عیاللر ایش بویروچیلری تامانیدن و ۱۵ فایزی هم تعلیمی جای‌لر و عیال اوقتووچیلری تامانیدن روحی و فزیکی زورهوانلیکّه دوچ بولگنلرینی معلوم قیلیشگن.
بو تیکشیرو ده عیال گه نسبتن عیاللر نینگ زوره‌وانلیک دلیلی تیکشیریلگن، ۲۵ فایزی بخیل‌لیک و اجتماعی ناسالم رقابت‌لر، ۴ فایزی مردسالارلیک و تینگ‌سیزلیک فرهنگی، بیر فایزی حقوق‌لری دن آگاهی‌سیزلیک و سوادسیزلیک و ۶۹ فایزی هم اوشبو برچه موردلرنی «باله‌لیک دن آلیب نا سالم تربیت، زور دن تورموش گه چیقریش، روحی قیینچیلیک و شخصی مستقل‌لیک» نی عیال گه نسبتن عیاللر نینگ زوره‌وانلیک دلیلی دیب بیله‌دیلر.
شو بیلن بیرگه، جمعیت‌شناس و روان‌شناس‌لر دن بیرقطاری عیال گه نسبتن عیاللر نینگ زوره‌وانلیک قیینچیلیگی باره‌سیده سلام‌وطندار نینگ تیکشیروینی خوش قرشی‌لسه ده؛ بیراق تیکشیرو ده اشتراک ایتگنلر نینگ ۸۴ فایزی همجنسلری تامانیدن زورهوانلیکّه دوچ بولیشینی افسوس‌لنرلی دیب و مملکت بویلب زوره‌وانلیک نی یوق ایتیش اوچون جدی اقدام بولیشی کیره‌ک دیدیلر.
جمعیت‌شناس راشد صدیقی گه کوره، عیاللر نینگ سوادسیزلیگی و حقوق‌لریدن آگاه‌سیزلیگی عیال گه نسبتن عیاللر نینگ زوره‌وانلیک اصلی عاملی سنله‌دی. صدیقی جنابلری نینگ ایشانچی گه کوره، عیال گه نسبتن عیاللر نینگ زوره‌وانلیگی جمعیت ده نیچه قتلملی عاقبتی بولیب و آره‌لریده ایشانچ‌سیزلیکّه سبب بولیشی ممکن.
عین‌حالده، روان‌شناس لیزا حق‌جو نینگ ایتیشیچه، هم‌جنس تامانیدن حقارت بولیش عیال نینگ روحی قیینچیلیگینی تهدید قیلیب و هم‌جنس تامانیدن دهشتلی زوره‌وانلیک زمینه‌سینی یره‌تیشی ممکن.
باشقه تاماندن، عیال حقوقی فعاللری عیال گه نسبتن عیاللر نینگ زوره‌وانلیک معماسی گه دقت‌سیزلیک دن خواطر بیلدیریب ایتیشلریچه، بو زوره‌وانلیک‌لر کوپه‌یگن حالده عیاللر اوچون حقوقی مبارزه‌لر اساسینی سُست قیلیب و عیاللر نی کوپراق ایرکک‌لر تامانیدن زوره‌وانلیک بولیش گه دوچ قیله‌دی.
عیال حقوقی فعاللریدن نجمه فرهمند، بو معما دن افسوس‌لنیب ایتیشیچه، عیال هم‌جنس تامانیدن روحی یا که فزیکی زورهوانلیکّه دوچ بولسه، در حقیقت زورگو ایرکک‌لر گه بو جنس‌نی ایسته‌گنلرینگیز کبی اوستیگه زوره‌وانلیک قیلیشینگیز ممکن دیب «زیگنال» یوباریش دیر.
عیاللر گه قرشی تورلی زوره‌وانلیک‌لر بولیشیدن عین‌حالده خواطر بیلدیریلماقده، حقوقی ایش بیلرمان‌لر نینگ ایشانچی گه کوره، مملکت سابق توزومی ده عیال گه نسبتن عیاللر نینگ زوره‌وانلیگی حقیده اعتبار قره‌تیلمه‌گندی.
سابق محکمه ده عیال گه قرشی زورهوانلیکّه چیک قوییش بولیمی ایشلاوچیسی زهره الیاسی نینگ ایتیشیچه، بو ریاست نینگ محکمه‌لری افغانستان نینگ ۳۴ ولایتیده فعال ایدی؛ بیراق عیاللر گه قرشی زوره‌وانلیک عاملی کوپراق ایرکک‌لر ایدیلر؛ عین‌حالده قضیه تیکشیریلیشی بیلن زوره‌وانلیک اصلی عاملی عایله ده‌گی عیال ایکن‌لیگی انیق‌لنگن.
شو بیلن بیرگه، مدافع وکیللر دن نورسما سادات گه کوره، عیاللرنی قوللب-قوتلاوچی نهادلر بیکار قیلینیشی بیلن جمعیت ده تورلی عامللر بیلن زوره‌وانلیک تورلری کوپه‌یشی ممکن. او نینگ ایشانچی گه کوره، محکمه‌لرده عیاللر آوازی ایشیتیلمه‌ی دیگن مملکت ده زوره‌وانلیک هر قنده‌ی عامل تیکشیریلمه‌ی و زوره‌وانلیک میزانی آشیشی گه سبب بوله‌دی.
بیراق سرپرست حکومت مسئوللری نینگ ایتیشلریچه، افغانستان ده عیاللر شامل برچه نینگ حقوقی اسلام قاعده‌لری اساسیده تامینلنگن و عیال گه نسبتن عیاللر نینگ زوره‌وانلیک معماسی سرپرست حکومت نینگ سیاست‌لری گه هیچ قنده‌ی باغلیق‌لیگی یوق. اسلام امیرلیگی سوزلاوچیسی ذبیح‌الله مجاهد نینگ سلام‌وطندار گه ایتیشیچه، بو معما عایله‌لر گه باغلیق و اولر عیاللر بیر-بیری بیلن قنده‌ی یانده‌شیشنی اورگه‌تیش‌لری کیره‌ک.
بو تیکشیرو معلومات‌لری عیاللر گه قرشی زوره‌وانلیک قتلم‌لرینی آچیقله‌یدی، نیچه کون آلدین سلام‌وطندار عیاللر نینگ زوره‌وانلیک‌لرینی انیقلش اوچون تیکشیرو یولگه قویگن ایدی، بو تیکشیرو ده اشتراک ایتگن هر ۴ عیال دن ۳ تهسی زوره‌وانلیک بیلن روپه‌ره‌لیگینی ایتگنلر؛ افغانستان ده عیاللر گه قرشی زوره‌وانلیک رقمی کوپ‌لیگیدن درک بیره‌دی.