طبیعی آفتلر گه قرشی تیارگرلیک کوریش ملی اداره، مملکتنینگ ۱۰ دن آرتیق ولایتیده اوتگن اوچ کونده یوز بیرگن سوو تاشقینلریده ۱۶ کیشی اولگن و ۱۰ دن آرتیق کیشی یرهلنگنینی بیلدیرهدی.
طبیعی آفتلر گه قرشی تیارگرلیک کوریش ملی اداره سوزلاوچیسی یوسف حماد، حاضرگه قدر بیر مینگ ۸۵۰ کیشی سوو تاشقینلری طفیلی جبرلنگن و ۲۱۹ عایله آواره بولگنینی بیلدیرگن.
او شوندهی دییدی: «حاضرگچه ۱۶ کیشی اولگن و ۱۱ کیشی یرهلنگن و ۲۷۵ یشش اوی بوتونلی، بیر مینگ ۵۵۸ اوی قسمی شکلده، ۲۰۹ کیلومتر سرک، ۱۱ دکان بوتونلی، ۱۸ دکان قسمی شکلده بوزیلگن. بیر مینگ ۲۰۰ دن آرتیق حیوان تلف بولگن. جمعی شکلده بیر مینگ ۸۵۰ عایله جبرلنگن و ۲۱۹ عایله هم آواره بولگن.»
طبیعی آفتلر گه قرشی تیارگرلیک کوریش ملی اداره سوزلاوچیسی گه کوره، حاضرگچه جبرلنگن بعضی کیشیلر گه نقدی یاردم، آزیق-آوقت وباشقه ضروری نرسهلر ترقهتیلگن و بو جریان همان دوام ایتماقده.
تورلی ولایتلرده سوو تاشقینلریدن جبرلنگن عایلهلردن بیرقطاری، قیشنینگ ساووغیده آچیق فضاده تیریکچیلیک قیلماقده و بوندهی احوال اولرنی ایریم قیینچیلیک بیلن دوچ قیلگنلرینی ایتهدیلر.
فراه ولایتی خاکسفید تومنی یشاوچیسی عبدالصمد، یشش اویی سوو تاشقینی طفیلی بوزیلگن و ایندی خیمه آستیده حیات کیچیرماقده ایتیشیچه، هوا ساووقلیگی و ایچیملیک سوو یوقلیگی سببلی بالهلری کسل بولگن.
اونگه کوره: «بوغدای، ایدیش، کمپل، حویلی و برچه بویوملرنی سوو آلیب کیتدی. کوپ عذاب چیکدیک. مسئوللر کیلیب بیز گه خیمه ترقهتدی. ۵۰ کیشی بیر خیمه آستیده میز. قندهی حوصله قیلهیدیک؟ هوا ساووغیده تشقریده یاتهمیز. دولتدن بیز گه باشپنه قوریب بیریشنی ایستهیمیز.»
فراه خاکسفید تومنی یشاوچیلریدن محمدتوفیق، سوو تاشقینلریدن جبرلنگنلردن باشقه بیری. او، کورسهتیلگن یاردملر ییترلی بولمهی و قیش ساووغیدن امان قالیش اوچون تیز و کوپراق یاردم بیریلیشینی سورهیدی.
او شوندهی دییدی: «اکثریت امکانیتلریمیز یوق بولگن. باشقه عایلهلر بیلن خیمه آستیده حیات کیچیرماقدهمیز. یاردم کورسهتیلگن بیراق شفاف ایمس و آدملرنینگ یاردم گه احتیاجی کوپ.»
باشقه ولایتلر جملهدن بدخشانده سوو تاشقینلریدن جبرلنگنلر، دستلبکی احتیاجلرینی تأمینلش اوچون هیچ نرسهلری بولمهی و تیزلیک بیلن یاردم کورسهتیلیشینی سورهیدیلر.
بدخشانده سونگی سوو تاشقینلریدن جبرلنگن عبدالله شوندهی دییدی: «سوو تاشقینلریدن کوپ جبرلنگدیک. یشش اوییمیز بوزیلگن و کیچیک ایناغمنی قولدن بیردیک. یاردم کورسهتیلمهگن. اوشبو ساووق هواده کوپراق یاردم کورسهتیلیشنی ایستهیمیز.»
سونگی کونلرده فراه، بدخشان، فاریاب، کاپیسا، پروان، بادغیس، هلمند، قندهار، دایکندی و ارزگان کبی ولایتلر قار یاغیشی و سوو تاشقینی گواهی بولگن.
بیرلشگن عرب امیرلیگی، قطر و سوریه تشقی ایشلر وزیرلیکلری، علیحده بیانیه ترقهتیب سونگی کونلرده مملکتده یوز بیرگن سوو تاشقینلریده قربان بولگنلرنینگ عایلهلری بیلن قیغوداشلیک بیلدیرگن.
