کابل حاکمی محمدیعقوب حیدری نینگ مخدره ماده‌گه قرشی کوره‌ش خصوصیده میدیالرنینگ اورنی نامیده اوتکزیلگن کنفرانسده، مخدره ماده‌گه قرشی کوره‌شیش توغریسیده ایچکی ایشلر وزیرلیگی نینگ ایش‌لریدن تنقید قیلگن. اونینگ ایتیشیچه، مخدره ماده‌گه قرشی کوره‌شیش اوچون بولگن برنامه‌لر عمل‌گه آشیریلمه‌گن.
جناب حیدری‌گه کوره، ایچکی ایشلر وزیرلیگی نینگ مخدره ماده‌گه قرشی کوره‌ش بولیمی اورین باسرلیگی‌ده کینگ شکلده فساد بار و اوشبو اداره نظارتی نقشی‌نی یخشی شکلده انجام بیره آلمه‌گن.
کابل حاکمی نینگ ایتیشیچه، ایچکی ایشلر وزیرلیگی تامانیدن یخشی شکلده کنترل بولمه‌گنی سبب، اهالی قولایلیک بیلن مخدره ماده‌گه قول تاپه آله‌دی. اونینگ کوپه‌یتیریشیچه، کابل پولیس قومندانلیگی نینگ بیرقطار رسمی‌لری مخدره ماده نینگ توزیع و ساتیشی‌گه عیب‌لنگن.
کابل حاکمی نینگ ایتیشیچه، کابل بیرقطار تومن‌لریده مخدره ماده عمده شکلده ساتیله‌دی، لیکن ایچکی ایشلر وزیرلیگی اونینگ عامل‌لرینی قولگه آلیش اوچون هیچ‌قنده‌ی سعی وحرکت قیلمه‌گن.
اونینگ ایتیشیچه، کابل نینگ یالغیز ایکی تومنیده کمیده ۲ مینگ جریب ییر مخدره ماده ایکیلیشی‌گه اجره‌تیلگن و مخدره ماده ایشلب چیقاریلیشی و قاچاقی دن کوپراق دولت‌گه قرشی قوراللی گروه‌لر فایده‌لنه‌دی. اونینگ ایتیشیچه، دولت گه قرشی گروه‌لر مخدره ماده قاچاقی آرقه‌لی ییلده ۴۰۰ میلیون دالر درآمد قیلهدیلر.
بیراق، ایچکی ایشلر وزیرلیگی نینگ مخدره ماده‌گه قرشی کوره‌ش معینیتی ملکی بولیمی اورین باسری فاضل وسیط نینگ ایتیشیچه، اوشبو اداره مخدره ماده ایکیلیشی و قاچاقی‌گه قرشی جدی شکلده مبارزه قیلگن.
عین‌حالده، ساغلیق‌نی سقلش وزیرلیگی مسوول‌لری نینگ ایتیش‌لریچه، کون اوتیش بیلن مخدره ماده‌گه چلینگن‌لرنینگ سانی کوپه‌یب بارماقده. اوشبو وزارت رسمی‌لری، مسوول نهادلردن، مخدره ماده‌نی نابود قیلیش اوچون جدی شکلده سعی و حرکت قیلیش‌لرینی سوره‌گنلر.
