سلاموطندارنینگ تورلی ولایتلرده اونلب ییگیت بیلن اوتکزگن صحبتی اساسیده، یاشلرنینگ اوقیشگه قیزیقیشی فقط نیچه انیق بولیمده چېکلنیب قالگن. اولر اوشبو بولیملرنی تنلش سببینی ایش امکانیتی، یخشی کېلهجگی بارلیگی دیب اتهگنلر. اوشبو گزارشده صحبت قیلگنلرنینگ اکثریتی کمپیوتر ساینس، طبیات و اقتصاد بولیملریده اوقیشگه قیزیقیشلرینی ایتگنلر.
بو گزارشده ۱۲ ولایتده ۴۰ ییگیت بیلن صحبت قیلیینگن. اوشبو یاشلرنینگ ۱۲ نفری طبیات، ۱۰ نفری کمپیوتر ساینس، ۷ نفری اقتصاد، ۵ نفری حقوق و ۳ نفری اېسه ژورنالیزم بولیملریده قیزیقیشلرینی ایتگن. اولرنینگ ایشانچی گه کوره، حاضرگی کونده کمپیوتر ساینس، طبیات و اقتصاد ساحهسیده باشقه بولیملر گه قرهگنده ایش امکانیتی بار شونینگ اوچون بو بولیملرنی اوقیش اصلی ورینتلری صفتیده تنلشگن.
۲۲ یاشر بادغیسلیک محمد صادق، خصوصی بیلیم یورتلردن بیریده کمپیوتر ساینس بولیمی تورتینچی سمستر طلبهسی. اونگه کوره، اقتصادی معما و احتیاجلرینی تأمینلشده قیینچیلیکلر گه قرهمسدن، اوزیگه یخشی کېلهجک توزیش اوچون، کمپیوتر ساینس بولیمینی تنلهگن.
اونینگ ایتیشیچه: «بو بولیمنی اوز علاقهم همده ایش فرصتلری بارلیگی اوچون تنلهدیم. کوپراق سیاسی مسئلهلر و مدیریت بولیمیده قیزیقردیم بیراق بو بولیمیده ایش فرصتلری بارلیگینی اویلب بونی تنلهدیم.»
کنر یشاوچیسی و اقتصاد فاکولتهسی اوچینچی ییل طلبهسی حمادالله همدرد گه کوره، اوشبو بولمیده ایش فرصتلری کوپراق بارلیگی اوچون تنلهگن. اونینگ کوپهیتیریشیچه: «اقتصاد اوقییپمن، بیراق کوپراق کمپیوتر ساینس گه قیزیقردیم. اقتصاد ساحهسیده ایش فرصتلری بارلیگی اوچون بونی تنلهدیم. افغانستانده طبیات، کمپیوتر ساینس و اقتصاد بولیملریده کوپراق ایش فرصتلری بار. اوقیب بیتّیرگن بیرقطار کیشیلر، حتا بعضیلرینینگ ماسترلیک مدرکی بولسهده، اما بولیملری گه تینگ ایش تاپه آلمهیپتیلر.»
بیزلرنینگ فیسبوک صحیفهمیزگه باش اورینگ!
اوشبو گزارشده صحبت قیلگن ۴۰ ییگیتدن، ۱۴ نفری اوقیش گه قیزیقهدیلر؛ بیراق باشقه ۲۶ نفری اېسه، ایش فرصتلری بارلیگی اوچون هېچ علاقهسی بولمهگن بولیملرده اوقیماقدهلر.
۱۹ یاشر ننگرهارلیک عزتالله، اقتصاد فاکولتهسی ایکینچی ییل طلبهسی دیر، حقوق بولیمیده قیزیقهدی، بیراق کېلهجکدن تشویش قیلیب، اقتصاد فاکولتهسینی تنلش گه مجبور بولگن.
اونگه کوره: «توغری ایتسم، بو بولیمنی شخصی علاقه اساسیده تنلهگنیم یوق، بلکه کېلهجکده دولت یا که موسسهلرده ایش تاپیش اوچون. حاضرگی کونده طبیات، کمپیوتر ساینس، اقصاد و تجارت ساحهلریده کوپراق ایش فرصتلری بار.»
شونینگدیک، ۲۴ یاشر غور یشاوچیسی رابعه رحیمی، روانشناسلیک بولیمیده اوقیشگه قیزیقر ایدی، لېکن بیلیم یورتلر ایشیگی قیزلر یوزیگه یاپیقلیگی اوچون قیزلرنینگ اوقیشگه حقی بولگن بولیملردن بیری نرسنگلیکنی اوقیش گه مجبور بولگن.
بیزلرنینگ «ایکس» ترماغی ده هم تعقیب قیلینگ!
اونینگ کوپهیتیریشیچه: «کوپراق روانشناسلیک بولیمیده قیزیقهمن؛ بیراق چېکلاولر طفیلی دوام اېتّیره آلمهدیم، ایش فرصتی بارلیگی اوچون نرسنگلیکنی تنلهدیم، حاضرگی کونده طبیات بولیملریده یخشی ایش فرصتلری بار.»
جمعیتشناسلرنینگ تأکیدلشیچه، یاشلرنینگ اوقییاتگن بولیملرده قیزیقمسلیگی، شخصی و اقتصادی ترقیات گه تأثیر قوییشی ممکن؛ بو ایش جمعیت رواجلنمسلیگیگه آلیب کېلهدی.
جمعیتشناس راشد صدیقی گه کوره: «جامعه رواجلنیشی اوچون، دولت ییریک سطحده اقتصاد نقطهی-نظردن اوزلرینی اوزی تأمینلش اوچون تخصص گه دقت قیلیشی کېرهک ، یاشلر قیزیقهدیگن فاکولتهلریگه اوقیشی لازم. یاشلر قیزیقمهیدیگن بولیملرنی تنلشی شبههسیز جامعه گه سلبی گه تأثیر قویهدی.»
روانشناسلردن بیرقطارینینگ ایشانچی گه کوره، یاشلرنینگ اوقییاتگن فاکولتهلریگه قیزیقمسلیگی، وقت اوتیشی بیلن اضطراب، علاقهسیزلیک و ناراضیلیک کبی روحی قیینچیلیکلر گه آلیب کېلهدی.
روانشناس محمدالله بلوچنینگ ایتیشیچه، یاشلرنینگ قیزیقهدیگن بولیملرنی اوقیشی اولرنینگ روحی سلامتلیگی و اوقیشگه قیزیقیشلری گه تأثیری بار و بو علاقه بولمسه روحی قیینچیلیک و قیزیقیش کمهیشیگه سبب بولهدی.
اونینگ ایشانچی گه کوره: «یاشلر قیزیقمهیدیگن بولیملرنی تنلسه، استعداد، ایشلش و توانالیگی کمهیشیگه سبب بولهدی و میهسینینگ طبیعی اېستهگیگه قرشی عمل قیلسه شو درجهده روحی قیینچیلیگی کوپهیب و اوزینی اولدیریش فکر اونگه تاپیلهدی.»
سۉنگی ییللرده تحصیلی بولیملرده یاشلرنینگ قیزیقیش یا که قیزیقمسلیگی بارهسیده سرپرست حکومت عالی اوقوو وزیرلیگینینگ فکر-ملاحظهسینی اورگهنیشنی ایستهدیک، بیراق جواب قیتریش گه حاضر بولمهدی.
شو بیلن بیرگه، سۉنگی ییللرده ایش و اجتماعی ایشلر وزیرلیگی نیچه مرته یاشلر اوچون ایش فرصتلری یرهتیلیشیگه تأکیدلهگن، بیراق کوپینچه یاشلر اوقیب بیتّیرگن بولیملریده ایش فرصتی یوقلیگی اوچون اوقیش یونهلیشینی اوزگرتیریش گه مجبور بولگنلر. عینحالده، دنیا بانکینینگ سۉنگی گزارشی اساسیده، افغانستاندهگی یاشلر آرهسیده ایشسیزلیک میزانی قریب ۲۵ فایز گه آشگن و هر تورت ییگیتدن بیری بیکار و اولرنینگ اکثریتی، نارسمی و درآمدی آز لوازملرده ایشلش گه یوز کېلتیرگن.
