بیرلشگن ملت‌لر تشکیلاتی نینگ باله‌لردن حمایت قیلووچی صندوقی یا-ده یونیسف، ینگی بیر گزارش آرقه‌لی افغانستانده بشری وضعیت نی خواطرلنترووچی عنوان قیلگن.
اوشبو نهاد تامانیدن نشر ایتیلگن گزارشده ایتیلیشیچه، افغانستانده یوز بیرگن سونگی تحولات دن کیین، اوشبو مملکت یشاوچی‌لری دستلبکی ماده‌لرنی تیارلش خصوصیده جدی قیین‌چیلیک بیلن روپه‌ره بولگن.
بیرلشگن ملت‌لر تشکیلاتی نینگ باله‌لردن حمایت قیلووچی صندوقی‌گه کوره، قوروقچی‌لیک غذایی مصونیت یوق‌لیگی گه سبب بولگن.
شونینگدیک، بیرلشگن ملت‌لر تشکیلاتی نینگ انسان دوستلیک یاردم‌لرنی هماهنگ قیلووچی دفتری یا-ده اوچا نینگ ایتیشیچه، افغانستان انسانی بحران بیلن روپه‌ره بولماقده.
اوشبو نهاد نینگ افغانستان وضعیتیدن خواطر بیلدیریب ایتیشیچه، ایکی کیشی‌دن بیری آذیق-آوقات نی قیردن و قنده‌ی تامین قیلیشی‌نی بیلمه‌یدی.
اوچا نینگ توییتر صحیفه‌سیده یازیشیچه، ۴ باله‌دن بیرته‌سی و ۴ حامله عیالدن بیرته‌سی سوء‌تغذیه گه چلینگن.
بیرلشگن ملت‌لر تشکیلاتی نینگ انسان دوستلیک یاردم‌لر نی هماهنگ قیلووچی دفتری گه کوره، افغانستان نینگ ایکی یشاوچی‌سیدن بیرته سینی عاجل انسان دوستلیک یاردم گه نیازی بار.
بیراق، اسلامی امارت فرهنگی کمیسیونی اعضاسی احمد‌الله وثیق نینگ ایتیشیچه، اقتصادی قیین‌چیلیک‌لرنی حل قیلیش اوچون سعی و حرکت‌لرنی دوامی بار و تیزلیککه نیازمندلر عایله‌لرگه یاردم بیریلیشی ممکن.
بوندن آلدین هم خلق ارا تشکیلات‌لری افغانستانده بشری وضعیت یمان بولگنیدن خواطر بیلدیرگن ایدیلر. دنیا غذایی برنامه‌سی تامانیدن نشر ایتیلگن گزارش گه کوره، افغانستان یشاوچی‌لریدن ۶۰% حاد آچ‌لیک بیلن روپه‌ره بولگن و اوشبو مملکت یشاوچی‌لریدن ۹۷% نی جاری ییل یکونلنیشی‌گچه فقر چیزیغی آستیگه قرار تاپیشی ممکن.
