اوتگن کون آمریکا ملی خوفسیزلیک کینگشی نینگ استراتیژیک ارتباطلر هماهنگ قیلووچیسی جان کربی، رسانه‌لر بیلن اوتگزگن صحبت‌لریده ایتگن که، مملکتی حاضر ایسه اسلامی امارت نینگ رسمیت گه تانیش اوچون هیچ برنامه‌سی یوق.
اوتگن هفته افغانستان بوییچه روسیه خاص نماینده‌سی ضمیر کابلوف روسیه تامانیدن اسلامی امارت نینگ رسمیت گه تانیلیشی خصوصیده احتمال بارلیگی نی بیلدیرگنی بیرحالده، جان کربی نینگ بیاناتی مطرح بولگن.
سیاسی ایش بیلرمان‌لردن قطاری نینگ سلام‌وطندار گه ایتیش‌لریچه، اسلامی امارت دنیا جماعه ایسته‌کلریدن هیچ بیری نی عمل گه آشیرمه‌گن.
بیزلرنینگ توییترده هم تعقیب قیلینگ!
سیاسی ایش بیلرمان‌لردن بیری ویس ناصری نینگ ایتیشیچه، اسلامی امارت ۱۰ آی جریانیده افغانستان نینگ اداره قیلیشی اوچون هیچ ظرفیتی یوقلیگی نی بیلدیرگن. اونگه کوره، اسلامی امارت بیلن مملکت‌لردن قطاری نینگ رابطه قوریشی، افغانستان اهالی‌سی گه یاردم بیریش اوچون صورت تاپه‌دی و هیچ بیر مملکت اسلامی امارت نینگ رسمی شکلده رسمیت گه تانیش اوچون حاضر ایمس.
سیاسی ایش بیلرمان‌لردن باشقه بیری خلیل‌احمد نادم نینگ سلام‌وطندار گه ایتیشیچه، همه‌شمول حکومت دنیا جماعه تامانیدن بیان بولگن اینگ اونملی ایسته‌کلردن دیر که، حاضرگچه اسلامی امارت تامانیدن عمل گه آشیریلمه‌گن.
جناب نادم نینگ ایشانچی گه کوره، اوشبو حکومت نینگ آمریکا رسمیت گه تانیمه‌گنی یانیده، اسلامی امارت بیلن رابطه‌لری یخشی بولگن روسیه، چین و ایران کبی مملکت‌لر هم اسلامی امارت نی رسمیت گه تانیمه‌گن.
باشقه بیر تامان‌دن، خلق‌ارا رابطه‌لر بیلرمانی و بیلیم یورت اوقیتووچیسی محمود اضطرابی نینگ سلام‌وطندار گه ایتیشیچه، آمریکا بیلن رقیب بولگن مملکت‌لردن قطاری اسلامی امارت نینگ رسمیت گه تانیش اوچون بیراز ایجابی نتیجه کورستگنلر.
بیزلرنینگ فیسبوک صحیفه‌میزگه باش اورینگ!
اونگه کوره، اوشبو مملکت‌لر اسلامی امارت نینگ رسمیت گه تانیگنلری صورت‌ده، آمریکا افغانستان ده اوز منفعت‌لری نی نظر گه آلیب اسلامی امارت نی رسمیت گه تانیشی ممکن.
بوتوغریده اسلامی امارت مسئوللری نینگ فکری نی آلیش ایسته‌دیک؛ بیراق موفق بولمه‌دیک. گرچند افغانستان ده اسلامی امارت نینگ قدرت گه ایرشگنیدن ۱۰ آی اوتگن، بیراق حاضرگچه اوشبو حکومت هیچ بیر مملکت تامانیدن رسمیت گه تانیلمه‌گن.
