بیر هفته آلدین سلام‌وطندار، طالبان گروهی قندوز ولایتی نینگ اوروشیده اوچووچی‌سیز اوچاقدن استفاده قیلگنی حقیده گزارش ترقه‌تگن ایدی. حاضر مملکت ملی خوفسیزلیک کینگشی، طالبان گروهی باشقه ولایت‌لرده هم اوچووچی‌سیز اوچاقدن استفاده قیلیشی و شونینگدیک اوشبو اوچووچی‌سیز اوچاقلرنینگ آلدینی آلیش اوچون سعی و حرکت قیلیش‌لرینی بیلدیرگن.
قندوز ولایتیدن امنیتی بیر منبع نینگ ایتیشیچه، طالبان گروهی اوشبو اوچووچی‌سیز اوچاق‌لرنی قطار سوداگرلر آرقه‌لی بگرام کمپیده‌گی امریکالیک حربی‌لردن ساتیب آلگنلر و قطارینی هم تاجیکستان چیگره‌سی آرقه‌لی قولگه کیلتیرگنلر.
اوشبو منبع گه کوره، طالبان نینگ قولیده‌گی اوچووچی‌سیز اوچاقلر هجوم اویوشتیریش و بمب آتیش گه قادر دیر و نهایتده ۲۰۰ متر گچه هدف قرار بیره آله‌دی.
پکتیا ولایتیدن امنیتی بیر منبع نینگ ایتیشیچه، طالبان گروهی اوشبو اوچووچی‌سیز اوچاق‌لردن استفاده قیلیش بیلن، یاسین کمپی، مموزی منطقه‌سی و روحانی بابا کمپی اوستیگه بمب آتگن.
انه‌شوحالده، پکتیا پولیس کوچلری نینگ امنیه قوماندانی لطف‌الله کامران، طالبان هجومی نی تصدیق‌لب ایتیشیچه، طالبان قوللنه‌دیگن نیرسه اوچووچی‌سیز اوچاق بولمه‌سی ممکن.
بوندن آلدین فاریاب ولایتی نینگ حاکمی نقیب‌الله فایق هم، طالبان گروهی اوروش‌لرده اوچووچی‌سیز اوچاق‌لردن استفاده قیلیش‌لرینی ایتگن ایدی.
جناب فایق نینگ ایتیشیچه، اوشبو اوچووچی‌سیز اوچاقلر بمب آتمه‌یدی، بلکیم جاسوس‌لیک قیله‌دی.
طالبان گروهی ینگی و زمانوی جهازلرگه قول تاپیشی ینگی بیر موضوع ایمس و بوندن آلدین هم بو توغریده قطار گزارشلر ترقه‌تیلگن ایدی.
