قندوز ولایتیدن امنیتی بیر منبع نینگ کیم‌لیگی سیر قالیش‌نی ایسته‌ب سلام‌وطندارگه ایتیشیچه، طالبان گروهی اوشبو ولایت نینگ امنیتی پوسته‌لریدن اوچووچی‌سیز اوچاق واسطه‌سی بیلن ویدیو آلگنیدن کیین کوپینچه هجوم‌نی اویوشتیره‌دیلر. اوشبو منبع‌گه کوره، طالبان گروهی تامانیدن حاضرگچه قندوز ولایتی نینگ امام‌صاحب تومنیده تورت مرته اوچوچیسیز اوچاق اوچیریلگن.
منبع نینگ کوپه‌یتیریشیچه، بوندن اوچ کیچه آلدین طالبان گروهی‌گه تیگیشلی بولگن اوچوچیسیز اوچاق، قندوز ملی خوفسیزلیک ریاستیدن ویدیو آلیش جریانیده امنیتی کوچلر تامانیدن اوققه توتیلگن و اوچوچیسیز اوچاق غایب بولگن.
منبع نینگ ایتیشیچه، اوتگن ییل امنیتی کوچلر طالبان گروهی‌گه تیگیشلی بولگن ۲ اوچوچیسیز اوچاق‌نی شهر مرکزیده هدف آستیده قرار بیرگن ایدیلر. منبع گه کوره، اوچوچیسیز اوچاققه کمره و پارتلش ماده‌لر ییرلشتیریلگن.
اوشبو منبع نینگ سوزیگه کوره، اوچوچیسیز اوچاق ویدیو آلگنیدن کیین قندوز ولایتی امام صاحب تومنیده‌گی چیگره پولیس کوچلری کندکی‌ده پارتلش ماده ییرلشتیریلگن موتر پارتله‌تیلگن.
عین‌حالده، قندوز ولایتی کینگش عضوی محمد یوسف ایوبی نینگ ایتیشیچه، قندوز ولایت مقام بناسی اوستیگه اوچوچیسیز اوچاق واسطه‌سی بیلن هجوم اویوشتیریلگن.
قندوز ولایت امنیتی مسئوولری، اوچووچی‌سیز اوچاق‌لرنینگ فعالیتی توغریسیده فکر بیلدیرمه‌گن. بیراق قندوز حاکمی سوزلاوچیسی عصمت‌الله مرادی، طالبان گروهی نینگ زمانه‌وی قورال‌لر و اوچووچی‌سیز اوچاق‌لر بیلن تجهیزلنگنینی بیلدیرگن.
عین‌حالده، حربی ایش بیلرمانلردن بیری عتیق‌الله امرخیل‌نینگ ایتیشیچه، طالبان گروهی نینگ اوچووچی‌سیز اوچاق‌لری کیچکینه ماین نینگ کوتاریب و ۲۰۰ مترگچه هدف‌نی اوره آله‌دی.
حربی ایش بیلرمنلردن باشقه بیری جاوید کوهستانی نینگ ایتیشیچه، طالبان گروهی نیچه ییل آلدین هلمند ولایتیده شونده‌ی اوچاقلردن فایده‌لنگن ایدی.
طالبان گروهی حاضرگچه بو توغریده هیچ بیر فکر بیلدیرمه‌گن.
قندوز مملکت شمال شرقی‌ده جایلشگن ناتینچ ولایت لردن بیری دیر و طالبان گروهی اوشبو ولایت نینگ کوپ قطار تومن‌لریده فعالیت قیله‌دی.
