سلاموطندارنینگ ۱۳ نفر ایشلاوچی و طلبه یاش بیلن اوتکزگن صحبت نتیجهلری شونی کورستهدی کی، اوقیش بیلن بیر وقتده ایشلش، کسبی تنلاودن کوره کوپراق اقتصادی ضرورت حسابلنهدی.
اوشبو گزارشده صحبت قیلگن برچه یاشلر، ایشلهمسدن اوقیشگه دوام بیره آلمسلیکلرینی ایتهدیلر. بیلرمانلرنینگ فکریچه، بو ایش یخشی باشقریلگن حالده یاشلرنینگ کسبی و انسانی سرمایهسینی آرتیریش گه یاردم بیرهدی.
کابلدن اقتصاد فاکولتهسیده طلبه عبیدالله شهباز گه کوره، افغانستاندهگی یاشلر اوقیشگه دوام بیریش اوچون ایشلش گه مجبورلر. او شوندهی دییدی: «بیکار بولسنگیز اوقی آلمهی سیز، اوقیماقچی بولسنگیز ایشلهی آلمهی سیز، پول تاپه آلمهسنگیز اوقیشدن قالهسیز، افغانستانده کیلهجگیمیز نامعلوم. کیلهسی کون نیمه بولیشینی هیچ کیم ایته آلمهیدی.»
۲۳ یاشلی نورزیه بهادری لیسانس ایتیشیچه، پنجشیر ولایتیدهگی کلینیکلردن بیریده قابله صفتیده ایشلش یانیده، آنلاین طرزده ماسترلیکنی هم اوقیماقده. اونگه کوره: «شخصی مصرف و تعلیم خرهجتلرینی کلینیکده ایشلش بیلن تأمینلهی من، بعضی پیتلر احتیاجلریم و تعلیم پولینی تولش گه مالیهوی قیینچیلیک بیلن دوچ بولهمن بیراق سعی-حرکت قیلیب دوام بیردیم اوقیش یانیده ایشلهی من درآمدیم آز فقط کوندهلیک و تعلیم خرهجتی گه بولهدی اما اوقیش گه دوام ایتتیریشیم اوچون یاردم بیرهدی.»
باشقه تاماندن اوشبو یاشلرنینگ ۴ نفری – عایله احتیاجلرینی تأمینلش زمهلریده دیر و هر قندهی حالتده ایشلش گه مجبور، بیراق یخشی کیلهجک اوچون ایشلش یانیده اوقیماقدهلیکلرینی معلوم قیلهدی.
غزنی یشاوچیسی ۲۴ یاشلی محمدضیا انوری، اوقیش یانیده ایشلهیدی، بو تجربه اونینگ اوچون قیمتبها فرصت و آسان بیر مسئولیتدن آرتیق ایکنینی بیلدیرهدی. او شوندهی دییدی: «مصرفیمنی اوقیتیش بیلن چیقرهمن و اوشبو پولنی مکتب یولیگه هم صرفلهی من، درس یانیده ایشلهیمن، آنلاین و حضوری طرزده انگلیس و چین تیللرینی اورگتهمن و بیر آز عایله گه هم یاردم بیره آلهمن. چونکی بعضی پیتلر اویده یاردم بیره آلهمن. بیر پیتده ایشلش و اوقیش مین اوچون یخشی.»
لغمان یشاوچیسی و ژورنالیزم بولیمی طلبهسی ۲۲ یاشلی عبدالواحد نظری گه کوره، بیر پیتده ایشلش و اوقیش قیین بولسه-ده، بیراق ممکنسیز ایمس. اونینگ ایتیشیچه: «بیر پیتده اوقیش و ایشلش جودهیم قیین، مینی فکریمچه ترتیب و زماننی باشقریش بیلن بو ایشنی بجریش ممکن، بولر انساننی مسئولیتلی شخصیت توزهتهدی، خورسندلیک بیلن اوقیش گه دوام ایتتیرماقده من، بیراق انده-سنده کابل شهریده اتاق اجاره پولینی تولش و صرف-خرهجتلرنی تأمینلشدن تشویش قیلهمن.»
بیراق، بیلیم یورت اوقیتووچیلریدن بیرقطاری، اوقیش گه نسبتن ایشنی اوستون کوریش، اوقیش صفتی گه سلبی تأثیر قیلیشی حقیده آگاهلنتیرهدیلر.
بیلیم یورت استادی حکمتالله میرزاده، طلبه بیر پیتده ایکی جایده بولسه، اگر ایشنی اوستون قرار بیرسه اونینگ اوقیشی گه سلبی تأثیر قوییشینی ایتهدی.
اونگه کوره: «طلبهنینگ فکری ایکی جایده بولهدی، بیری ایش میدانی و ینه بیری هم اوقیش، طلبه اوچون اوقیش و ایشلش اورتهسیده قیسی بیرینی اوستون قرار بیریش قیین افغانستان فقرالری کمبغل و یاشلر کوپراق اقتصادنی اوستون کوریشهدی شونینگ اوچون اوقیش میدانی وقت اوتیشی بیلن ضعیف و بوش بولهدی.»
عکسینچه، اقتصادشناسلردن بیرقطاری، اوقیش یانیده ایشلشنینگ مثبت تامانیگه تأکیدلشهدی.
اقتصاد شناس شاکر یعقوبی، اوقیش یانیده ایشلهگن کیشیلر، یخشی سرمایه گه ایگه بولیشلری ممکن دییدی. اونینگ ایتیشیچه: «عملی ایش قیلمسدن فقط اوقیش، انده-سنده بیلیم یورت و ایش بازاری اورتهسیدهگی مصافهنی کوپهیتیرهدی، عکسینچه بیر پیتده اوقیب و ایشلش، مسئولیت پذیرلیک، وقتنی باشقریش کبی مهارتنی آشیرهدی.»
روانشناس محمدالله بلوچنینگ فکریچه، بیر پیتده تعلیم و ایشلهیدیگن یاشلر، یوقاری انگیزه گه ایگه بولیب و کیلهجککه نسبتن امیدوار دیر. او شوندهی دییدی: «بیر پیتده ایشلهیدیگن و هم اوقیدیگن یاشلر روحی نقطهی نظردن یوقاری انگیزه گه ایگه، بولر اوقیش و ایش کیلهجگیگه نسبتن امیدوار.»
برقرار اقتصاد طلبهلرنینگ موفقیتی گه سبب بوله آلهدی، چونکی طلبهلرنینگ اقتصادی قیینچیلیگی بولمسه، خاطر جمعلیک بیلن اوقیشلریگه دوام بیره آلهدیلر. شو بیلن بیرگه، بیرلشگن ملتلر تشکیلاتینینگ میلادی ۲۰۲۵ ییل آخرلری و ۲۰۲۶ ییل اوللریدهگی گزارشلریگه کوره، افغانستانده قشاقلیک کوپهیگن و ۶۴ فایز یشاوچیلر اقتصادی تورلی قیینچیلیک بیلن دوچ.
