معارف وزیرلیگی سرپرستی رنکینه حمیدی، نماینده‌لر کینگشی‌دن ایجابی آواز قولگه کیریتمه‌گن، لیکن سونگی پیت‌لرده کمیده ۱۵ مصلحتچی‌نی اصلاحات کیلتیریش نامیده اوشبو وزارت دن چیکلنتیرگن.
چیکلنتیریلگن مصلحتچی‌لردن بیرقطاری نینگ ایتیش‌لریچه، معارف وزیرلیگی سرپرستی اوشبو وزارت‌نی باشقه زمان‌لرگه قره‌گنده کوپراق سیاسی قیلگن. اولرنینگ ایتیش‌لریچه، خانم حمیدی ینگی‌لیکده اوز یقین‌لریدن بیرقطارینی معارف وزیرلیگی‌گه جایلشتیرگن.
بوندن آلدین معارف وزیرلیگی ده قومی تصفیه قیلیش و خویش‌خورلیک بولگنی خصوصیده بیرقطار گزارشلر نشر قیلینگن ایدی، بیراق حاضر ده قطار مصلحتچی‌لرنینگ رنگینه حمیدی تامانیدن چیکلنتیریلگنی سبب، تنقیدلر کوپه‌یگن.
معارف وزیرلیگی نینگ چیکلنتیریلگن مصلحتچی‌سی حمیرا قادری نینگ سلام‌وطندارگه ایتیشیچه، باشقه زمان‌لرگه قره‌گنده حاضرده مملکت معارفیده قومی، سمتی و زبانی بحث‌لر کوپه‌یگن.
خانم قادری گه کوره، معارف وزیرلیگی سرپرستی نماینده‌لر کینگشی تامانیدن ایجابی آواز قولگه کیریتمه‌گن و ینگی‌لیکده اوزی نینگ خصوصی مکتب دن بیرقطار سیمالرنی اوشبو وزارت ده جایلشتیرگن. اونینگ ایتیشیچه، بیلیم و اداری تخصصی بولمه‌گن کیشی‌لرنینگ استخدام ایتیلیشی مملکت معارفی برابریده بولگن قیین‌چیلیکلرنی کوپه‌یشیگه سبب بوله‌دی.
خانم قادری نینگ کوپه‌یتیریشیچه، مملکتده چیکلاو تعینلنگنی سبب، معارف وزیرلیگی فلج بولگن و انه‌شو باعث، کتاب‌لرنینگ چاپی کیینگه قالگن.
بیراق، معارف وزیرلیگی سوزلاوچیسی نجیبه آرین نینگ اوشبو ادعالرنی رد قیلیب ایتیشیچه، اصلاحات کیلتیریش و تشکیلات تورمی‌گه توسیق بولیش اوچون مصلحتچی‌لر چیکلنتیریلگن. اونینگ ایتیشیچه، هر بیر اداره گه اصلاحات کیلتیریش بیر اصل دیر و اوشبو چیکلنتیریلیش‌لر تعصب، سیاسی و شخصی موضوع‌لر سبب، صورت تاپمه‌گن.
معارف وزیرلیگی سوزلاوچیسی نینگ کوپه‌یتیریشیچه، بوندن آلدین ۲۰ دن آرتیق مصلحتچی اوشبو وزارت گه فعالیت قیلهریدی و اولردن کمیده ۱۵ ته‌سی اصلاحات کیلتیریش و تورم تشکیلاتی‌گه توسیق بولیش اچون چیکلنتیریلگن.