بامیان فرهنگی‌لریدن یوزلرچه‌سی اوتگن “سه‌شنبه” کونی شام چاغیده بیر اعتراض آرقه‌لی، ۲۰ ییل آلدین بودا نینگ طالبان تامانیدن تخریب ایتیلیشی‌نی قاره‌لب و اوشبو گروه نینگ محکمه قیلینیشی‌نی سورهگنلر.
اولرنینگ ایتیشیچه، بودا مجسمه‌لری ۱۳۷۰- ییل نینگ اداغیده طالبان امیری ملامحمد عمر نینگ فتوا‌سی آرقه‌لی، اوشبو گروه تامانیدن توپ و تانک آرقه‌لی تخریب قیلینگن.
طالبان نینگ اوشبو اقدامی او پیت‌لرده دنیا نینگ جدی واکنش‌لری بیلن دوچ کیلگن ایدی، لیکن طالبان گروهی مذکور واکنش‌لرگه دقت قیلمه‌گن.
طالبان گروهی بامیانده بودا مجسمه‌سی نینگ تخریبی چیککه‌سیده مملکت ملی موزیمی ده بولگن بیرقطار تاریخی آبده‌لرنی هم تخریب قیلگن. بامیان فرهنگی‌لری بودا نینگ طالبان تامانیدن تخریب ایتیلیشی‌نی فرهنگی و اوروش جنایتی عنوان قیلیب و اوشبو گروه‌نی محکمه ایتیلیشی‌نی سورهگنلر.
بامیان ولایتی بوییچه معلومات و مدنیت ریاستی باشلیغی اسحاق موحد نینگ ایتیشیچه: «بیز عدالت ایسته‌یمیز، طالبان گروهی بامیانده فرهنگی و اوروش جنایتی‌گه عیب‌لنگن، اوشبو گروه‌نی ملی و خلق ارا حقوقی نهادلرگه تانیتیلیشی کیره‌ک.»
بامیان فرهنگی‌لریدن بیری زهرا حسینی نینگ ایتیشیچه، طالبان گروهی‌نی بوندن سونگ، فرهنگی جنایت‌گه عیب‌لنمه‌یشی اوچون خلق ارا جماعه‌سیگه تعهد بیریشی لازم.
فرهنگی اعتراضچیلر بیر بیانیه نشر قیلیش بیلن بودا تخریبی‌گه قول‌لری بولگن‌لرنی جزالنتیریب و حکومتدن بامیانده قالگن تاریخی آبده‌لرنی قیته قوریش و حفاظت قیلیشی‌نی سورهگنلر.
شونینگدیک، معلومات و مدنیت وزیرلیگی سرپرستی طاهر زهیر نینگ ایتیشیچه، بودا مجسمه‌سی نینگ تخریب ایتیلیش دوسیه‌سینی خلق ارا محکمه‌سی‌گه تیکشیریلیشی کیره‌ک.
جناب زهیر اوشبو صحبت‌لرنی اوتگن “سه‌شنبه” کونی بامیانده «شبی با بودا» نامیده یولگه قوییلگن فرهنگی-هنری برنامه‌ده آنلاین شکلده بیان قیلگن. اونینگ ایتیشیچه، طالبان گروهی ۲۰ ییل آلدین بامیانده فاجعه‌لی فرهنگی جنایت‌گه عیب‌لنگن.
جناب زهیرنینگ ایتیشیچه: «فرهنگی‌لر، انسان حقوقی فعاللری، حقوق بیلیم‌دانلری و بامیان بیلیم یورتی اوقیتووچی‌لری، بودا مجسمه‌سی تخریب ایتیلیشی نینگ ۲۰- ییل‌لیگی مناسبتی بیلن بیر دوسیه تیارلب معلومات و مدنیت وزیرلیگی‌گه تاپشیرسین‌لر و انه‌شو یول آرقه‌لی اوشبو فرهنگی جنایت‌نی خلق ارا محکمه‌لریده قید و تیکشیره آله‌یدیک.»
عین‌حالده، بامیان حاکمی سیدانور رحمتی نینگ اوشبو ولایتده یولگه قوییلگن فرهنگی-هنری برنامه‌ده ایتیشیچه، اوشبو ولایت محلی اداره‌سی باستانی و تاریخی آثارلردن حفاظت قیلیش‌گه تعهدلی دیر.
بامیانده انسان حقوقی ایرکین کمیسیونی نینگ ساحه‌وی دفتری باشلیغی جواد دادگر نینگ اوشبو برنامه‌ده بودا مجسمه‌سی نینگ طالبان تامانیدن تخریب ایتیلیشی‌نی اوروش جنایتی عنوان قیلیب ایتیشیچه، انسان حقوقی نینگ خلق ارا حجت‌لری اساسیده اوروش جنایت‌لری کیچیریلمه‌یدی.
اونینگ ایتیشیچه، بودا مجسمه‌سی نینگ تخریب ایتیلیش دوسیه‌سینی خلق ارا لاهه محکمه‌سیده تاپشیریلیشی کیره‌ک و بو دوسیه‌نی تیکشیریش اوچون فرصت بار دیر.