پروان ولایتی نینگ جبل‌السراج تومنی یشاوچی‌لریدن اونلرچه‌سی اوشبو تومن بیر یشاوچی‌سی نینگ ملی مصالحه کینگشی مصلحتچی‌سی تامانیدن اولدیریلگنی‌گه قرشی اعتراض بیلدیرگن‌لر.
اعتراضچی‌لر ملی مصالحه کینگشی باشلیغی عبدالله عبدالله و اونینگ مصلحتچی‌سی نورمحمد سکندری نینگ صورت‌لرینی اوت‌گه تارتیب ادعا قیلیش‌لریچه، نورمحمد سکندری ۲۲ یاشیده بولگن بیر کیشی‌نی اوتگن کونی شام چاغیده جبل‌السراج تومن بناسی‌ده اوققه توتیب اولدیرگن.
اعتراضچی‌لرنینگ تاکید قیلیش‌لریچه، اوشبو قتل عاملی قولگه آلینمه‌گن صورتده، اعتراض‌لریگه دوام بیرهدیلر و کابل-شمال قتناو یولی‌نی ترافیک یوزیگه آچمه‌یدیلر.
عین‌حالده، جبل‌السراج محلی مسوول‌لری نینگ ایتیش‌لریچه، پولیس کوچلری اوتگن کوندن بویان وضعیت‌نی کنترل قیلیش اوچون سعی و حرکت قیلماقده‌لر.
جبل‌السراج ولسوالی محمدهاشر رووفی نینگ سلام‌وطندارگه ایتیشیچه، ایکی کیشی جناب سکندری تامانیدن بیرقطار حربی تجهیزات بیلن امنیتی کوچلرگه تاپشیریلگن و باشقه ۴ شبهه‌لی کیشی هم پولیس کوچلری تامانیدن قولگه آلینگن، بیراق اعتراضچی‌لرنینگ غضب‌لری دوام قیلماقده.
جبل‌السراج ولسوالی نینگ تاکید قیلیشیچه، پروان محلی مسوول‌لرینی محلگه کیلیب اعتراضچی‌لرگه قناعت بیریش‌لری کیره‌ک.
بیراق، اعتراضچی‌لرنینگ ایتیش‌لریچه، اوشبو یاش نورمحمد سکندری تامانیدن اولدیریلگن و جناب سکندری قولگه آلینمه‌گن صورتده، اعتراض‌لریگه دوام بیرهدیلر.
بوتوغریده ملی مصالحه کینگشی مصلحتچی‌سی نورمحمد سکندری نینگ فکرینی آلیش اوچون سعی و حرکت قیلدیک، لیکن موفق بولمه‌دیک.
لیکن، نورمحمد سکندری نینگ میدیالرگه ایتیشیچه، اولدیریلگن کیشی اونی ترور قیلیش‌گه قصد قیلگن و مقصد گه ییتیشمسدن آلدین قوروقچی‌لری تامانیدن اولدیریلگن.
