اسلامی امارت تشقی ایشلر وزیرلیگی نینگ سرپرستی امیرخان متقی ییتکچیلیگیده بیر هیأت، اسلو میزبان‌لیگیده اوتکزیله دیگن ییغینده اشتراک ایتیش اوچون بوگون ناروی ییتیب باردی. گزارش‌لر اساسیده اوشبو ییغینده امریکا، ناروی نماینده‌لری و افغانستان مدنی جماعه‌چیلیک فعال‌لریدن قطاری اشتراک ایتیش‌لری کوتیله‌دی.
اسلامی امارت سوزلاوچیسی نینگ اورین باسری بلال کریمی‌گه کوره، مذکور ییغینده اسلامی امارت رسمی‌لری ناروی نینگ رسمی تکلیفی اساسیده اشتراک ایته‌دیلر. اونینگ ایتیشیچه، دیپلوماتیک مناسبت‌لرنی مستحکم‌لش، افغانستانده سرمایه یاتقیزیش و آمریکا تامانیدن مملکت نینگ توسیلگن پول‌لری آزاد ایتیلیشی اوشبو ییغینده بحث‌گه آلینه‌دی.
بیزلرنینگ فیسبوک صحیفه‌میزگه باش اورینگ!
اسلامی امارت سوزلاوچیسی نینگ اورین باسری‌گه کوره، تشقی ایشلر وزیرلیگی نینگ سرپرستی اروپا اتفاقی نماینده‌لری، افغانستان و باشقه بیرقطار مملکت‌لرنینگ ییریک شخصیت‌لری بیلن اوچره‌شیشی کوتیله‌دی.
بیراق سیاسی ایش بیلرمان‌لر، بوییغینده اسلامی امارت رسمی‌لری نینگ قتنه‌شیشینی یوتوق سیز عنوان قیله‌دیلر.
سیاسی ایش بیلرمان مهدی افضلی نینگ سلام وطندارگه ایتیشیچه، مذکور ییغین نتیجه بیرمه‌یدی؛ لیکن قطر مذاکره‌لر جریانینی تیزلشتیریشی ممکن.
افضلی نینگ اورغولشیچه: «ناروی‌ده اوتکزیله دیگن ییغین ناروی خلقی نینگ تشویش‌گه ساله‌یاتکن سونگی ۲۰ ییل یوتوق‌‌لرنی اعتباردن چیتده قالدیرمسلیک تشبث‌دیر. بو افغانستانده‌گی سیاسی اوزگریش‌لر اوچون جدی عاقبت لری یوق.»
سیاسی ایشلر بوییچه باشقه ایش بیلرمان ویس ناصری نینگ ایشانچی‌گه کوره، اسلو ییغینیده اسلامی امارت نینگ چقیریلیشی اولرنینگ رسمیت‌گه تانیش معناسی ایمس، بیراق اونینگ ایتیشیچه، ناروی اسلامی امارت بیلن کیلیشیب و افغانستان صلح مذاکره‌لری جریانی‌ده رولی بولیشنی ایسته‌یدی.
بیزلرنینگ توییترده هم تعقیب قیلینگ!
عین حالده تشقی ایشلر وزیرلیگی نینگ سرپرستی ناروی سفر قیلیشی بیلن، افغانستان نینگ ناروی‌ده‌گی یشاوچیلریدن بیرقطاری اسلامی امارت و اولرنینگ چقیریلیشی‌گه قرشی ناراضی‌لیک بیلدیرگن‌لر. ناراضی‌لیک نمایش بیلدیرگن‌لر ناروی تشقی ایشلر وزیرلیگی بیناسی یقینیده توپله‌نیب اسلامی امارت‌گه قرشی شعار بیردیلر.
ناروی میزبان‌لیگیده اسلو ییغینی، کون ایرته باشله‌نیب و ایکی کونگچه دوام تاپیشی کوتیله‌دی.
