باله‌لردن حفاظت قیلووچی تشکیلاتی یا-ده (Save the children)، ینگی‌لیکده وبسایتی گه بیر گزارش ترقه‌تیش بیلن اعلام قیلیشیچه، افغانستان ده قوروقچیلیک و سوو تاشقینلر نینگ تاثیرلری سبب، جاری میلادی ییلده هر ۱۰ باله‌دن اوچ تهسی آچلیک بیلن روپه‌ره بولیشی ممکن.
اوشبو تشکیلات نینگ کوپه‌یتیریشیچه، ۲۰۲۴-ییل افغانستان ده آلتی میلیون ۵۰۰ مینگ باله نینگ شاشلینچ آزیق-اوقت محصولاتی گه نیازی بار.
بیزلرنینگ فیسبوک صحیفه‌میزگه باش اورینگ!
مذکور تشکیلات گزارشی نینگ بیر بولیمی‌ده کیلیشیچه: «افغانستان ده قریب ۶.۵ میلیون باله یا-ده قریب هر ۱۰ باله‌دن اوچ تهسی، بو ییل آچلیک بیلن روپه‌ره بولیشی ممکن؛ چونکه بو مملکت سوو تاشقینلر تاثیرلری بیلن اوزون مدت‌لی قوروقچیلیک نی حس قیلماقده و پاکستان و ایران دن افغانستان‌لیک‌لر نینگ قیتیشی بو قیین‌چیلیک نی کوپهیتیرگن.»
باشقه بیر تاماندن، سوو تاشقینی یوز بیرگن بولیم‌لرده‌گی باله‌لردن قطاری آزیق-آوقت و ایچیملیک سوودن فایده‌لنه آلمسلیک‌دن شکایت قیله‌دیلر.
بغلان ولایتی «کرکر» قیشلاغی یشاوچیسی بولمیش سکیز یاشر مقدس نینگ ایتیشیچه، سونگی نیچه کون جریانیده یوز بیرگن سوو تاشقینلر سبب، آزیق-اوقت محصولاتیدن فایده‌لنه آلمه‌یدیلر.
اونینگ کوپه‌یتیریشیچه: «اوشبو اوی‌گه بوله‌میز؛ آز نان ییه‌میز و باشقه نرسه‌میز یوق؛ بیر قطار کیشی نان‌لری نی بیزلر گه بیره‌دیلر؛ اوی‌ده نرسه‌میز یوق که پیشیرسه‌ک.»
غور ولایتی «گلدره‌ی شیخ‌ها» منطقه یشاوچیسی بولمیش ۱۳ یاشر جاوید نینگ ایتیشیچه، ایچیملیک سوودن فایده‌لنه آلمسلیک سبب، اریق سوولریدن قوللنیش گه مجبور دیر. «سوو تاشقینی برچه نرسه‌میز نی آلیب کیتدی؛ سوو و آزیق-آوقتی‌میز یوق؛ بوندن آلدین خیریه جمغرمه‌لر آزیق-آوقت بیره‌ر ایدی؛ لیکن نیچه وقت بوله‌دی که هیچ نرسه بیرمه‌یدیلر؛ انه شوو سبب سوو یوقلیگی اوچون اریق سوولریدن قوللنیش گه مجبور بولدیک.»
شونینگدیک بدخشان ولایتی تیشکان تومنی یشاوچیسی لطف‌الله نینگ ایتیشیچه، سونگی نیچه هفته‌ده یوز بیرگن سوو تاشقین‌‌لردن باله‌لر کوپراق زیان کورگنلر.
بیزلرنینگ «ایکس» ترماغی ده هم تعقیب قیلینگ
اونینگ کوپه‌یتیریشیچه: «باله‌لر بو تومن‌ده کوپ قیین‌چیلیک بیلن روپه‌ره دیر؛ ییترلی آزیق-آوقت‌لری یوق؛ یقین‌ده‌گی قریه‌لر اولر گه آزیق-آوقت کیلتیره‌دی. آزراق ییمک اولر گه بیریله‌دی که ییترلی ایمس.»
عین حالده، باله‌لردن حفاظت قیلووچی تشکیلاتی گزارشی نینگ باشقه بیر بولیمی‌ده افغانستان ده سوو تاشقینی‌دن زیان کورگن یشاوچیلر گه انسان‌پرورلیک یاردم‌لری ارائه‌سی اوچون بودجه نینگ کمه‌یشی خصوصیده خواطر بیلدیرگن.
