ساغلیق‌نی سقلش وزیرلیگی مسئوللری بوگون (شنبه، ۲۷-اسد)، امارتی اداره‌لر نینگ بیر ییل‌لیک یوتوقلرینی بیان قیلیش برنامه‌سیده ایتیشلریچه، اوتگن قویاش ییل‌ده افغانستان کسل‌خانه‌لریده ۸۷ میلیون ۹۷۸ مینگ ۱۰۴ کسل گه عمومی طبی خذمتلر و بیر میلیون ۹۸۶ مینگ ۶۵۰ کسل گه ایسه بستری خذمتلری ارائه بولگن.
اوشبو وزیرلیک سوزلاوچیسی شرافت زمان امرخیل نینگ ایتیشیچه، اوتگن ییل‌ده کسل‌خانه‌لرده ۲۵۵ مینگ ۳۰۰ بویوک جراحی عملیات هم بجریلگن. اونینگ کوپه‌یتیریشیچه: «۴۲۱۲ ساغلیق مرکزلر آرقه‌لی ۸۷ میلیون ۹۷۸ مینگ ۱۰۴ کسل گه عمومی طبی خذمتلر و بیر میلیون ۹۸۶ مینگ ۶۵۰ کسل گه ایسه بستری خذمتلری ارائه بولگن و شونینگدیک اوتگن ییل‌ده مملکت کسل‌خانه‌لریده ۲۵۵ مینگ ۳۰۰ بویوک جراحی عملیات هم بجریلگن.»
بیزلرنینگ فیسبوک صحیفه‌میزگه باش اورینگ!
ساغلیق‌نی سقلش وزیرلیگی سوزلاوچیسی نینگ کوپه‌یتیریشیچه، اوتگن ییل‌ده ۲ میلیون کیشی گه تورلی‌خیل کسل‌لیک‌لر آلدی آلینشیی خصوصیده آگاهی‌لیک بیریش برنامه‌لری هم یولگه قوییلگن. اونگه کوره، ۸ میلیون‌دن آرتیق باله و حامله عیال اوچون تورلی‌خیل واکسین‌لر تطبیق بولگن. «واکسین قیلیش ۶۵ فایز‌دن ۸۰ فایز گه آشگن و اوتگن ییل‌ده ۸ میلیون ۵۹۹ مینگ ۷۵۰ باله و حامله عیال گه تورلی واکسین‌لر تطبیق بولگن.»
ساغلیق‌نی سقلش وزیرلیگی مسئوللری نینگ ایتیشلریچه، اوتگن ییل‌ده افغانستان نینگ اوزاق منطقه‌لریده‌گی ساغلیق تیم‌لر ۴۲ دن ۹۶ گه کوپه‌یگن. مذکور مسئوللر گه کوره، شونینگدیک افغانستان سیروم ایشلب چیقریش بولیمی‌ده هم خودکفالیککه ییتیشگن.
شوندهی بیرحالده، ساغلیق‌نی سقلش وزیرلیگی نینگ مالی و اداری اورین‌باسری اسحاق صاحب‌زاده، خلق‌ارا نهادلر یاردم‌لری کمه‌یگنی‌دن شکایت قیلیب و مذکور نهاد‌لردن افغانستان ساغلیق بولیمی‌گه یاردم‌لری نینگ دوام بیریشلری نی ایسته‌گن. صاحب‌زاده گه کوره: «چیت‌ایللیکلر بدخشان، هلمند فاطمه بیات، عینو و پکتیا کسل‌خانه‌سی کبی ایکی-اوچ کسلخانه نینگ حمایت قیلیش خصوصیده سوز بیرگنلر که تورت آی اولر گه خذمت ارائه قیلگن و قیته یاردم‌لرینی کیسگن.»
بیزلرنینگ «ایکس» ترماغی ده هم تعقیب قیلینگ!
ساغلیق‌نی سقلش وزیرلیگی مسئوللری، اوتگن قویاش ییل افغانستان ده ساغلیق خذمتلر نینگ ارائه قیلووچی ۱۸۰ موسسه بیلن همکارلیک قراردادلر امضا بولگنی و ساغلیق سکتوری‌ده ۱۸۴ فعال موسسه نینگ ثبت بولگنی بو اداره نینگ باشقه یوتوق‌لریدن عنوان قیلگنلر.
اولر نینگ کوپه‌یتیریشلریچه، اوتگن ییل مذکور وزیرلیک مسئوللری، هماهنگ‌لیک، یوقمه کسل‌لیک‌لر کنترول بولینیشی و خلق‌ارا ساغلیق‌نی سقلش تشکیلات‌لر همکارلیگی مقصد مالیزیا، تایلند، ایران، پاکستان، قطر و سویس گه سفر قیلگنلر.
