ناتو باش کاتبی نینگ ایتیشیچه، مذکور تشکیلات حربی‌لری نینگ افغانستاندن چیقیشی توغریسیده حاضرگچه نهایی قرار آلینمه‌گن.
بوگون (پنجشنبه ۳۰- دلو) ناتو باش کاتبی ینس استولتنبرگ مذکور تشکیلات مدافعه وزیرلری نینگ ایکی کونلیک ییغینی اداغیده بیانات بیریب اورغولشیچه، ناتو بیرلیشک‌لری افغانستان وضعیتی نی تیکشیرماقده و طالبان نینگ هر قنده‌ی زوروانلیگی افغانستان وضعیتی نی اوزگرتیریشی ممکن. او طالبان گروهیدن زوروانلیک‌لرنی کمه‌یتیریب و تینچ بیر یول آرقه‌لی موضوع‌لرنینگ حل قیلیش‌لرینی سوره‌گن.
اوتگن کون و بوگون ناتو مدافعه وزیرلری نینگ ییغینی آنلاین شکلده یولگه قوییلدی کیم مذکور ییغینده ناتو گه اعضا مملکت‌لرنینگ افغانستان و عراق ده حضوری توغریسیده سوزله‌شیلگن.
جناب استولتنبرگ نینگ ایتیشیچه، حاضر افغانستان ده ناتو گه تیگیشلی ۱۰ مینگ حربی موجود؛ اونگه کوره، بو حضور شرط‌لرگه باغلیق دیر.
حاضر افغانستان ده ناتو نینگ ۹ مینگ و ۵۹۲ حربی‌سی بار. مذکور حربی‌لردن ۲ مینگ و ۵۰۰ ته‌سی آمریکالیک، ۱ مینگ و ۳۰۰ ته‌سی آلمان‌لیک، ۸۹۵ ته‌سی ایتالیالیک و ۷۵۰ ته‌سی ایسه بریتانیالیک دیر.
جناب استولتنبرگ نینگ کوپه‌یتیریشیچه، ناتو کیسکین‌لیک بیلن افغانستان تینچلیک پروسه‌سیدن حمایت قیله‌دی و حضوری نی مذکور پروسه نینگ بیر بولیمی صفتیده تنظیم قیلگن.
ناتو باش کاتبی مذکور تشکیلات مدافعه وزیرلری نینگ ییغینی یولگه قوییلمسدن آلدین بیر بیانات آرقه‌لی، حربی بیرلشیک‌لریدن هیچ بیری لازم زمان دن آرتیق افغانستان ده قالمه‌سی اوستیگه اورغوله‌گن ایدی؛ بیراق توغری بیر زمان دن آلدین افغانستان نی هم ترک قیلمه‌سی ممکن.
شونده‌ی بیرحالده، طالبان گروهی دوحه کیلیشوونامه‌سی اساسیده چیت‌ایللیک کوچلرنینگ چیقیشی اوستیگه اورغوله‌گن. بیراق ناتو باش کاتبی گه کوره، طالبان زوروانلیک‌لرنی کمه‌یتیرمه‌گن و شونینگدیک کیلیشوونامه گه بیریلگن وعده‌لرنی هم عملی قیلمه‌گن.
