شفاکارلردن قطارینینگ ایتیشلریچه، عیاللر آرهسیده طبی قاعدهلر رعایت ایتیلمسلیگی، یخشی آوقتلنمسلیک و ترتیبسیز حیات اسلوبی، عیاللرنینگ بوغیزده اضافی گوشت یا-ده «تانسل» کسللیگیگه چیلینیش عامللریدن بولیب و بوغیز آغریق بو کسللیکنینگ اینگ اونملی نشانهلریدن دیر.
قولاق و بوغیز کسللیکلری بولیمی شفاکاری احمدشاه میرزایینینگ سلاموطندار گه ایتیشیچه، شخصی و اطراف-محیط نظافتیگه توجهسیزلیک و یخشی آوقتلنمسلیک، عیاللرنینگ تانسل گه چلینیشیگه سبب بولهدی.
اونینگ کوپهیتیریشیچه: «بوغیزده اضافی گوشت تاپیلیشی عاملی ریزش و زکام طفیلی اورتهگه کیلهدیگن ویروسلر دیر یا-ده شخصی و اطراف-محیط نظافتیگه توجهسیزلیک نتیجهسیدهگی مکروبلر، تانسل گه سبب بولهدی.»
بیزلرنینگ فیسبوک صحیفهمیزگه باش اورینگ!
شونینگدیک مذکور شفاکارلرنینگ ایتیشلریچه، حیات اسلوبی و آوقتلنیش هم بو کسللیککه چیلینیشده اونملی رول اوینهیدی و بوغیز آغریغی بولگن عیاللر شخصی و اطراف-محیط نظافتیگه توجه قیلیب و بو کسللیکنینگ آلدینی آلیش اوچون چاره-تدبیر کوریشلری کیرهک.
احمدشاه میرزایینینگ اورغولشیچه: «دایم بوغیز آغریققه چلینگن کیشیلر، یاغلیق، اچیق یا-ده شیرینلیگی آزراق بولگن آوقتلردن فایدهلنیشلری کیرهک. شونینگدیک شخصی و اطراف-محیط نظافتینی مراعت قیلیشلری کیرهک که تانسل گه چلینمهسینلر.»
باشقه بیرتاماندن، قولاق، بوغیز و بورون کسللیکلری بولیمی شفاکارلریدن باشقه بیری مرسل الحق گه کوره، کسلگه تانسل کسللیگینینگ سلبی عاقبتلری بولیب و اونینگ حیاتینی قیینچیلیک بیلن روپهره قیلهدی و بوغیز آغریق، ایسیتمه و باش آغریق، عیاللرنی بو کسللیککه چلینتیرهدیگن نشانهلردن دیر.
اونینگ کوپهیتیریشیچه: «کسل تورلیخیل آغریقلرنی تجربه قیلیشی اوچون اونینگ کوندهلیک حیاتیگه تاثیر قیلهدی. افغانستان ده حیات محیطی مناسب ایمس، آوقت پاک ایمس. هفته ایچیده مراجعت قیلهدیگن کسللردن ۷۰ فایزی تانسل گه چلینگن دیر.»
بیزلرنینگ «ایکس» ترماغی ده هم تعقیب قیلینگ!
شوندهی بیرحالده، اوشبو کسللیککه چلینگن عیاللردن ریحانهنینگ ایتیشیچه، شفاکارلر توصیهلرینی رعایت قیلیش بیلن کسللیگی یخشیلنماقده. «علایمی باش آغریق، جان آغریق و بوغیز آغریق دیر. نیچه وقتدن بیری درمان آستیدهمین. شفاکار گه باردیم و شفاکار اچیق و ترش آوقتلردن قوللنمسلیگیمنی ایستهدی. بیر ییلدن بیری دوالنهمن. دوالنیشیم نتیجهسی مثبت ایدی، چونکه پرهیز قیلدیم و حاضر وضعیتیم یخشی و جراحی بولیشگه نیازیم یوق.»
تانسل کسللیگی دوالنیشی اوچون توصیه آلگن کسللردن سهیلا هاشمینینگ ایتیشیچه: «تانسل گه چلینگنیمنی بیلگنیمدن اوچ آی بولهدی. علایمی شو دیر کیم تیز تیز ریزش قیلهمن. کیچهلر اویقوم ناآرام ایدی و آیاغیم آغریر ایدی. شفاکار گه بارگنیمده تیزراق درمانلنیشیمنی ایستهدی.»
تانسل، کینگ شکلده ترقهلگن خلقارا کسللیکلردن بولیب، طبی قاعدهلرگه توجهسیزلیک و یخشی آوقتلنمسلیک سبب اورته گه کیلهدی؛ بیراق افغانستان کبی اوچینچی دنیا مملکتلریده هوا افلاسلیگی و ساغلیق قیینچیلیکلر طفیلی اونینگ ترقهلیشی میزانی کوپ دیر.
