افغانستان اولاق (اوغلاق) لیگهسی ییتینچی دوریده سرپل اولاق تیرمه جماعهسی قهرمان بولدی. اوشبو دورنینگ فینالی بوگون (۱-جدی/۲۲-دسمبر، دوشنبه) کابل شهری «یکه توت» اولاق میدانیده اۉتکزیلدی و سرپل هیجانلی و بیر تامانلمه اویینده ۷-۰ حسابی بیلن بدخشان گه غلبه قازانیب و قهرمانلیکنی قولگه کیریتدی.
اوشبو مناسبت بیلن افغانستان جسمانی تربیهلش و ملی المپیک کمیته رسمیلری، اولاق لیگهسی اویینلری رواجلنیب و مملکت اولاقچیلری چیت ایل اویینلریده هم افغانستان آتیده افتخار کیلتیریش گه امید بیلدیردیلر.
افغانستان جسمانی تربیهلش و المپیک ملی کمیته باشلیغی احمدالله وثیق شوندهی دیېدی: «اولاق لیگهسی اویینلریده کېلهسی ییل ملَکهلی اولاقچیلر تنلهنیب و دنیا مقیاسیده اۉتکزیلهدیگن اویینلرده افغانستان آتیده افتخار کسب ایتیشنی تیلَکداش من.»
مسابقه یکونیده، سرپل اولاق فدراسیونی باشلیغی محمد داوود ایلخانی، اوشبو جماعه آلدیندن توزگن ریجه و تیارلیگی طفیلی قهرمان بولگنینی معلوم قیلهدی. اونینگ فکریچه، بو ییلگی مسابقهلرده قرغیزستاندن آلیب کیلینگن اولاقچیلر، افغانستانلیکلر گه نسبتن ایلغارلیک کورسهتیش سببینی اولرنینگ تجربهلی بولگنی دیب بیلهدی.
محمد داوود ایلخانی گه کوره: «خارجی چاپندازلرنینگ بیزنی پهلوانلریمیز بیلن بیر آز فرقی بار، اولر کوپ زمینگیر و آسیا اویینلریده کوپراق اشتراک ایتگن و افغانستان چاپندازلریگه قرهگنده تجربهلی راق دیر.»
شونینگدیک، سرپل اولاقچیلریدن بولمیش توفیق امیری، مسابقهدن راضیلیگینی بیلدیریب و کوپینچه سعی-حرکتلر بیلن بو درجه گه ییتگنلرینی بیلدیرهدی. او شوندهی دیېدی: «سرپل خلقی کوپ زحمت چېککن اېدی، آت و پهلوانلرنی آلگندی و ریجه اساسیده بو درجه گه ییتدیک.»
شو بیلن بیرگه، سرپل اولاق تیرمه جماعه طرفدارلری، بو جماعه قهرمان بولیشی حقیده فکر-ملاحظهلرینی شوندهی بیان قیلیشهدی.
سرپل اولاق تیرمه جماعه طرفدارلریدن بولمیش محمدناصر گه کوره: «بو تیم غلبه قازانگنیدن جوده هم خورسند من، بو ییردهگی برچه اولاق جماعهلری بیر مملکتدن بولسهده بیراق هر کیم قیزیقهدیگن جماعهسی غالب بولیشینی اېستهیدی، حاضر جوده هم خورسند من، اویین دوستانه و برادرانه شکلده اوتدی.»
سرپل اولاق تیرمه جماعه طرفدارلریدن باشقه بیری محمدداوودنینگ ایتیشیچه: «تیمیمیز بدخشان بیلن بیللشدی اولرنی ۷-۰ فرقی بیلن ایلتدیک و کپنی اېسه آلیب کیتهمیز بخیر.»
شو بیلن بیرگه، افغانستان اولاق لیگهسی ییتینچی دوریده سرپل بیرینچی، بدخشان ایکینچی و بغلان هم قندوز گه غلبه قازانیب اوچینچی بولدی. بو بیللشوولرده مملکتنینگ تورلی ولایتلریدن مینگلب کیشی اشتراک ایتگن اېدی.
مسابقه یکونیده، بیرینچی، ایکینچی، اوچینچی اولاق جماعهلری گه نقد پول شامل نظرگه آلینگن ساوغهلر تقدیم ایتیلدی.
افغانستان اولاق لیگهسی ییتینچی دوریده ۱۱ جماعه تورت گروهده، قویاش ۱۴۰۴-ییل، ۲۱-قوسده رقابت گه باشلهدی و نهایت قویاش ۱۴۰۴-ییل، ۱-جدی کونی یکونلندی. بو مسابقهلرده فاریاب، سرپل، بلخ، سمنگان، قندوز، تخار، بدخشان، پنجشیر، بغلان و هرات اولاق تیرمه جماعهلری اشتراک ایتگن اېدیلر.
