افغانستاننینگ ایریم قسملری اینیقسه سمنگان و بلخ ولایتلریده یوز بیرگن زلزله، اوشبو ولایتلر یشاوچیلریگه کوپینچه زیان یېتکزگن.
سمنگان ولایتی طبیعی آفتلر گه قرشی کورهش ریاستی بیر بیانیه ترقهتیب، بو ولایتنینگ دره صوف پایین تومنی یشاوچیلری، زلزله عاقبتیده جانی تلفات کوریشگه قۉشیمچه، کوپینچه مالی زیان کورگنلرینی بیلدیرگن.
بیانیه گه کوره، ۱۱-عقرب، کیچه ساعت ۱:۰۰ اطرافیده ییر قیمیرلشی طفیلی فقط درهصوف پایین تومنیده بیر کیشی هلاک بولیب و ۱۴ کیشی یرهلنگن.
شو بیلن بیرگه، زلزلهده اوشبو حدود ده ۱۱۰ یشش اوی بوتونلی و ۵۲۷ اوی قسمی شکلده بوزیلگن.
محلی منبعلر معلوماتی گه کوره، زلزلهده جبرلنگن عایلهلر گه دولت و انسان سیورلیک نهادلر تامانیدن هلیکچه یاردم کورسهتیلمهگن. اولر قیش عرفهسیده کیچهلرنینگ ساووغیده باشپنهسیز قالیب تورلی قیینچلیکلر بیلن دوچ بولگنلرینی اېتهدیلر.
زلزله طفیلی جبرلنگن عایلهلر، کیچهلر ساووغیده بالهلری و عایله اعضالری کسل بولمسلیک و احوال بوندن آرتیق چتاق بولمسلیک اوچون جدی توجه قیلیشلرینی سورهیدیلر.
