سلام‌وطندار نینگ معلوماتی اساسیده، مملکت بویلب ۱۷۶ میلیارد افغانی‌لیک ۴۹۰ دن آرتیق ترقیاتی پروژه ایشی توخته‌گن.
ترقیاتی پروژه‌لر گه دایر سلام‌وطندار نینگ تیکشیروی گه کوره، مذکور ۴۹۲ پروژه باشقه مینگلب فرعی پروژه‌لرنی اوز ایچیگه آلیب و دنیا همجمعیت تامانیدن مالی حمایت بولردی و تطبیق ایتیلیش ایشلری ۱۴۰۰_مالی ییل بودجه‌سی گه کیریتیلیب و عملی ایشلری هم باشلنگن ایدی، بیراق اسلام امیرلیگی حاکمیتی و دنیا همجمعیت افغانستان نی ترک ایتیشیدن کیین، اوشبو پروژه‌لر نینگ ایشی یریم قالگن.
۱۴۰۰_مالی ییل بودجه‌سی گه کیریتیلگن پروژه‌لردن یالغیز ۲۲ ته‌سی ینگی پروژه بولیب و اوتمیش ییل‌لردن قالگن ۴۷۰ پروژه، ۱۴۰۰ییل بودجه‌سی گه کیریتیلگن ایدی.
سلام‌وطندار نینگ معلوماتی اساسیده، مذکور پروژه‌لر اوچون نظر گه آلینگن پول دن یالغیز ۵۷ میلیارد افغانی یا ده ۳۲ فایزی صرفلنگن.
برچه‌سی بیلن، مملکت ده سونگی سیاسی اوزگریش دن کیین اوشبو پروژه‌لر ایشی یریم قالگن. شو بیلن بیرگه، اسلام امیرلیگی اقتصاد وزیرلیگی مسئوللری نینگ ایتیشلریچه، ایچکی درآمد دن قوللنیب مذکور پروژه‌لردن بیر قطاری نینگ ایشلرینی باشلش اوچون سعی‌وحرکت قیلماقده‌لر.
آلتی مینگ ۵۰۰ فرعی پروژه نی اوز ایچیگه آلگن شهروندلیک میثاقی ملی برنامه‌سی اوشبو پروژه‌لردن بیری بولیب و دنیا بانکی تامانیدن مالی حمایت بولردی، لیکن حاضر اوشبو پروژه‌لر ایشی توخته‌گن.
شهروندلیک میثاقی ملی برنامه‌سی، ۲۰۱۶_ییل ده باشله‌نیب و ۲۰۲۶_ییل گه قدر اوچ باسقیچ ده عملی بولیشی کوتیلر ایدی.
مذکور برنامه دن اساسی مقصد، طبیات ساحه‌سیده خذمت کورسه‌تیش، تعلیم و تربیه، برق ییتکیزیش، سوولرنی باشقریش، شهرلر و قیشلاق‌لرنی بیر_بیری گه باغلش و دهقان‌لر اوچون کیچیک آست قورمه‌لرنی قوریش دن عبارت بولیب و اونچه‌لیک رواجنلمه‌گن منطقه‌لرده عملگه آشیریلیشی ریجه‌لنتیریلگندی و افغانستان حکومتی و دنیا بانکی تامانیدن مالی حمایت بولر ایدی.
سلام‌وطندار نینگ معلوماتی اساسیده، حاضرگی کونده مذکور پروژه‌لر نینگ ایشی قیته باشله‌نیشی یا ده ایشلری یریم قالگن پروژه‌لر نینگ ایشینی بیتتیریش اوچون هیچ برنامه آلینمه‌گن و دنیا بانکی سرپرست حکومت نینگ خواست‌لری گه حاضرگچه مثبت جواب قیتیرمه‌گن.
ایتیلیشیچه، شهروندلیک میثاقی ملی برنامه‌سیده ایشله‌گن قطار ایشلاوچیلر نینگ نیچه آی‌لیک حقوقی تولنمه‌گن و اسلام امیرلیگی قیشلاق‌لرنی رواجلنتیریش و قیته قوریش وزیرلیگی، مذکور پروژه‌لر نینگ ایشلری دنیا بانکی تامانیدن قیته باشله‌نیشگه امیدوار دیر.
سلام‌وطندار نینگ معلوماتی اساسیده، ۵۰ فایز ایشلری آلغه آلیب باریلگن اکثر پروژه‌لر ایشی بوزیلیش عرفه‌سی گه قرار تاپگن و دقت بولمه‌گن تقدیرده، صرفلنگن برچه سرمایه‌لر هدر کیتیشی ممکن.
مذکور پروژه‌لر نینگ ولایت‌لرده احوالی قنده‌ی؟
سلام‌وطندار، دنیا همجمعیت تامانیدن مالی حمایت بوله‌دیگن ۱۲ ولایت ده ایشی یریم قالگن پروژه‌لرنی تیکشیرگن.
اوشبو پروژه‌لر ۱۳۹۹و ۱۴۰۰_مالی ییل‌لر گه تیگیشلی بولیب و ایشلری اوشبو ییل‌لرده باشلنگن ایدی.
مذکور ولایت‌لردن بیری بامیان دیر، ۳۰ میلیارد ۵۰۳ میلیون ۵۸۰ مینگ ۷۹۱ افغانی‌لیک ۳۱ پروژه ایشی اوشبو ولایت ده باشلنگن ایدی و ۴۴.۱۴ فایز ایشی عملی بولگندی، بیراق حاضرگی کونده مذکور پروژه‌لر ایشی توخته‌گن.
بونگه علاوه، مذکور ولایت ده شهروندلیک میثاقی برنامه‌سیگه تیگیشلی قریب ۱۰۰ پروژه ایشی حاضر توخته‌گن.
دایکندی، باشقه ولایت‌لردن بولیب بیر میلیارد افغانی‌لیک قریب ۱۱۰ پروژه نینگ عملی ایشی توخته‌گن.
غزنی ولایتیده ۵۰ میلیون امریکالیک دالرلیک تخمیناً ۲۵۰ ترقیاتی پروژه ایشی توخته‌گن، مذکور پروژه‌لر ایشی توخته‌شی بیلن قریب تورت مینگ کیشی ایش‌سیز بولگن.
غور، باشقه ولایت‌لردن بولیب سونگی ۲۲ آی دن کیین (۱۴۰۰_ییل ۲۴ اسد و ۲۰۲۱_ییل ۱۵ آگست) اوشبو ولایت ده ۱۷ میلیارد ۷۰۴ میلیون ۴۶۹ مینگ ۱۰۶ افغانی‌لیک قریب ۱۴ پروژه ایشی توخته‌گن. اکثر پروژه‌لر نینگ ایشی قریب ۶۰ فایز عملگه آشیریلگن، اوشبو پروژه‌لر نینگ تطبیق ایتیلیشی بیلن ۱۸ مینگ ۲۸۰ کیشی مستقیم روشده فایده‌لنیش‌لری ممکن.
هرات ده حاضرگی کونده، ۷۱۶ میلیون ۴۵۸ مینگ ۳۹۹ افغانی‌لیک ۴۵۷ شهروندلیک میثاقی پروژه ایشی توخته‌گن.
بونگه قوشیمچه، کاپیسا ولایتیده، ۶۶۰ پروژه جمله دن شهروندلیک میثاقی گه عاید ۴۱۰ پروژه ایشی تخمیناً ۲۷ فایز عملی بولگندی توخته‌گن، نتیجه ده بیر مینگ ۲۱۰ کیشی ایش‌سیز بولگن.
لغمان ده هم ۱۰ ترقیاتی پروژه ایشی توخته‌گن، بیراق سلام‌وطندار بو حقده‌گی معلومات نی ییغیش گه اولگورمه‌گن.
میدان‌وردک باشقه ولایت‌لردن بولیب حاضرگی کونده اوشبو ولایت ده ۵۲۹ میلیون افغانی‌لیک ۳۱۹ شهروندلیک میثاقی پروژه ایشی توخته‌گن و شونینگدیک، نورستان ده شهروندلیک میثاقی گه عاید بیش پروژه شامل ۱۱۹ پروژه ایشی توخته‌گن.
بولر گه علاوه، پنجشیر ده ۲۲۴ میلیون ۹۶۸ مینگ ۹۳۷ افغانی‌لیک ۸۵ پروژه ایشی توختب و ۹۷۱ کیشی ایش‌سیز بولگن و پروان ده ۳۱ میلیون ۵۸۹ مینگ ۵۱۷ دالرلیک ۳۱ پروژه ایشی توخته‌گن.
و نهایت ده، بغلان ده ۳۰۰ میلیون افغانی‌لیک ۴۸۹ پروژه ایشی توختب و ۲۲۰ کیشی ایش‌سیز بولگن.
سلام‌وطندار نینگ معلوماتی اساسیده، تیکشیریلگن ۱۲ ولایت ارا یالغیز بیش ولایت (غزنی، غور، کاپیسا، پنجشیر و بغلان) ده پروژه‌لر ایشی توخته‌شی باعث ۷۴۰۰ کیشی ایش‌سیز بولگن و شو بیلن بیرگه مملکت بویلب ترقیاتی پروژه‌لر ایشی توخته‌شی عاقبتیده مینگلب کیشی ایش‌سیز بولگن.
مذکور پروژه‌لر قیسی نهادلر و مملکت‌لر تامانیدن حمایت بولر ایدی؟
بوندن آلدین سرپرست حکومت مالیه وزیرلیگی مسئوللری سلام‌وطندار بیلن اوتکزگن صحبت‌لریده، ایشی توخته‌گن ترقیاتی ۳۰ بویوک پروژه دنیا بانکی تامانیدن حمایت بولیشینی ایتگن ایدیلر.
بونگه علاوه، بیرلشگن ملت‌لر تشکیلاتی نهادلری همده هندوستان کبی اولکه‌لر گه باغلیق یونیسف، یو‌اس‌ای‌آی‌دی، یو ان‌دی‌پی کبی نهادلر، ایشی یریم قالگن مذکور پروژه‌لر نینگ مالی حمایت قیلووچیلریدن ایدیلر.
مذکور پروژه‌لر ایشی عملگه آشیریلیشی مملکت اقتصادی اوستیگه مستقیم روشده تأثیر قیله‌دی، عین‌حالده اسلام امیرلیگی حاکمیتیدن کیین دنیا همجمعیت تامانیدن انسان پرورلیک میلیون‌لرچه دالر افغانستان گه یاردم بیریلگن.
ایتیش کیره‌ک که، سلام‌وطندار اوشبو گزارش ده ۱۴۰۰ مالی ییل بودجه سندی ده کیریتیلگن ترقیاتی بویوک ۴۹۲ پروژه حقیده معلومات ییققن و ولایت‌لرده تیکشیریلگن پروژه‌لر ۱۳۹۹ و ۱۴۰۰ ییل‌لرده ایشی باشلنگن پروژه‌لرده عبارت دیر.
