بدخشان ده دهقانلردن قطارینینگ ایتیشلریچه، اوتگن ییللرگه قرهگنده بو ییل یاغینگرچیلیک منظمراق بولیب، ایکینچیلیک ییرلریگه ایجابی تاثیر قویگن. اولرگه کوره، مذکور ولایتنینگ ییرلریدن کوپینچهسی للمی دیر و سونگی ییللرده یاغینگرچیلیکنینگ کملیگی سبب، بو ییرلر حاصلی کمهیگن.
بدخشان دهگی دهقانلردن بیری نبیاللهنینگ ایتیشیچه، سونگی ییللردهگی قوروقچیلیکلر نتیجهسیده حاصللری کمهیگن؛ لیکن بو ییل یاغینگرچیلیکلر یخشی و وقتیده بولیب و ییرلریگه ایجابی تاثیر قویگن. شونینگدیک او، موسوم دوامیده یاغینگرچیلیکلر ترتیبسیزلیگی احتمالیدن خواطر بیلدیرگن.
اونینگ کوپهیتیریشیچه: «اوتگن ییللرگه نسبت، بو ییل یامغیرلر برابر و منظم دیر. ییرلریمیز گه کوپ فایدهسی بار و ایکینچیلیک اینیقسه سووی بولمهگن للمی ییرلر رواجلنماقده. بدخشان ده للمی ییرلر کوپ دیر. یامغیر سوولری ایکینچیلیک و زراعت اوچون فایدهلی دیر.»
باشقه بیرتاماندن، بدخشان ولایتی درایم تومنیدهگی دهقانلردن باشقه بیری جمعهگلنینگ ایتیشیچه، جاری ییلده وقتیده و منظم یاغینگرچیلیک بولگنی سبب، ایکینیده سیزیلرلی درجهده تغییرلر اورته گه کیلگن. «الحمدالله، بو ییل کوپ یخشی ایدی و یاغینگرچیلیک هم یخشی ایدی. ایکین و زراعت هم یخشی دیر، خدا گه توکل. بیران قیینچیلیک و بیران آفت تاپیلمهگنیده ییرلریمیز یخشی دیر. اوتگن ییلگه نسبت بو ییل جودهیم یخشی دیر.»
بدخشان دهگی دهقانلردن وثیق، مسئوللردن دهقانلر اوچون اصلاح بولگن اوروغلر و ایکینچیلیک دارولر ترقهتیلیشینی سورهگن. اونینگ ایتیشیچه، جاری ییلده محصوللرینینگ وضعیتی یخشی بولیب و کسللیکلردن امان قالیشی توغریسیده امیدوار دیر. «چیگیرتکه یا-ده قورت کبی بیران کسللیک تاپیلمهگنی صورتده، ایکینچیلیکنینگ یخشی بولیشی ممکن. حرمتلی مسئوللردن، دهقانلرگه یاردم بیریب و قیینچیلیکلریگه قولاق سالیشلرینی سورهمیز.»
شوندهی بیرحالده، ایکینچیلیک ایش بیلرمانلر، یاغینگرچیلیکلر کوپهیشینینگ بدخشان ده ایکینچیلیک وضعیتی یخشیلنیشیده مهم عامللردن بیری بیلهدیلر. اولرنینگ ایتیشلریچه، اوتگن اوچ ییلگه قرهگنده یاغینگرچیلیک میزانی کوپهیب و اوتگن قوروقچیلیکلر طفیلی زیانلرنینگ بیر قسمینی جبران قیله آلهدی.
ایکینچیلیک ایش بیلرمانلریدن مودودالحق دایمنینگ ایتیشیچه، مذکور یاغینگرچیلیکلر توپراق نملیگی کوپهیشی و اوسیملیکلر اوسیشی اوچون مناسب شرایط یرهتیلیشیگه سبب بولیب و دوام قیلگنی صورتده، ایکینچیلیک تولیدلرینینگ کوپهیشی ممکن. «الحمدالله بو ییل حاصلات کوپهیشی توغریسیده امیدوارلیکلر بار. اوتگن ییلی ضرر کورگن دهقانلر حاصلاتی هم بو ییل کوپراق بولیشی ممکن.»
شوندهی بیرحالده، بدخشان ایکینچیلیک، سووغاریش و چاروهچیلیک ریاستی سوزلاوچیسی کیکاووس تکسارینینگ ایتیشیچه، جاری ییلده یاغینگرچیلیک میزانی قریب ۸۹۵ ملیمتر گه ییتگن که بو رقم، اوتگن ییلگه قرهگنده سیزیلرلی درجهده کوپهیشنی کورستهدی؛ چونکه بو رقم اوتگن ییلده قریب یریمگه بولگن.
بدخشان ایکینچیلیک ریاستی سوزلاوچیسیگه کوره، مذکور ریاست دهقانلرنی قوللب-قوتلش اوچون یشیل ساحهلر کوچهیشی، اورمانلر قیته تیکلنیشی و کوچت همده اصلاح بولگن اوروغلر ترقهتیلیشی کبی برنامهلری بار. «یاغینگرچیلیکلر کوپراق تومنلرده یوز بیریب و ایکینچیلیک ریاستی اوشبو یاغینگرچیلیکلرنینگ دهقانلر تولیدی سطحی کوپهیشی بولیمیده فایدهلی بولیشی توغریسیده امیدوار دیر.»
بدخشان، افغانستاننینگ تاغلی ولایتلریدن بولیب و اونینگ ایکینچیلیک ییرلریدن بویوک قسمی للمی شکلده دیر. سونگی ییللرده یاغینگرچیلیک کمهیشی بو ولایت دهقانلری اوچون جدی قیینچیلیکلرنی یرهتیب و اولرنینگ زراعتی تولیدلری میزانینی کمهیتیرگن؛ لیکن بو ییلگی منظم یاغینگرچیلیکلر ینه بیر مرته دهقانلر آرهسیده سیر حاصللی بیر ییل امیدینی تیریلتیرگن.
