قریب ۲۰ عیال بیر ایشخانه گه ییغیلیب، کوپ محنت و دقت بیلن ایلمک اورماقدهلر. اولر رنگگه بویهلگن ایپلرنی آق ایپلر آرهسیدن اَیلنتیریب، چیرایلی نقشلرنی قالین شکلیده یرهتماقدهلر. بو، ایشسیزلیکدن چیقیش و اوز محنتلری بیلن نان قولگه کیلتیریش توغریسیده سعیوحرکت دیر. هوانینگ بیراز یاختی بولیشی بیلن، مذکور عیاللر اویلریدن چیقیب، قویاش باتیشیگه قدر ایش بیلن شغللنهدیلر.
بیر کونی شفاکار بولیشنی آرزو قیلهدیگن ۲۰ یاشر خدیجه، حاضر قالین توقیش بیلن کونینی اوتکزماقده و آینینگ آخریده محنتی عوضیگه اوچ مینگ افغانی درآمد قولگه کیلیترهدی.
خدیجه قالین توقووچیلیک ایشخانهسیگه باریب-کیلیش اوچون هر کونی اوچ ساعت پیاده یول یوریدی. او بو ایشی یانیده، کیچهلر آتهسینینگ ایشلریگه هم یاردم بیرهدی که آتهسی ایرتهسی کونی راحتلیک بیلن ایشلری گه ییتیشسه. «آتهم کوچهلر آرقهسیدن ایسکی کییم-کیچک ساتیب آلهدی و کیچهلر ۱۲ گه قدر، مذکور ایسکی کییملر تیکهمن، اتو قیلهمن و ایرتهسی کون آتهم اولرنی بازار گه آلیب کیتهدی و ساتهدی.»
بیزلرنینگ فیسبوک صحیفهمیزگه باش اورینگ!
خدیجه قالین توقیش آرقهلی قولگه کیلتیرهدیگن درآمدیدن رضایتی یوق؛ لیکن حیاتنینگ بو قیینچیلیگی اونینگ اوچون باشقه بیران تنلاو یولنی قویمهگن.
خدیجهدن بیراز اوزاقراقده، باشقه اوچ ته یاش قیز کتهراق بیر کارگاه آرقهسیده اولتیریب و سرعت بیلن ایلمک اوریشگه مشغول. بو قیزلردن بیری گلالی دیر. اونگه کوره، ایکی ییلدن بیری اوشبو ایشخانهده قشاقلیک و مجبورلیگینی قالین نقشلری آرهسیگه توقیب، ایلمک اورماقده که بو رقم قوللری دایم بوش قالمهسین. گلالی و باشقه ایکی ایشداشی اوچ آیده ۱۲ متره قالیننی توقهدیلر. شونینگدیک او هم ایشینینگ توگهشیدن کیین آلهدیگن درآمددن راضی ایمس. «قالین توقیش توغریسیدهگی محنتیمیز و ایشلریمیزگه قرهگنده قولگه کیلتیرهدیگنیمیز درآمد جودهیم آز دیر و قالین بازاری ارزشی ایسه کم دیر.»
گلالی عایله اعضاسیگه یاردم بیره آلیشی و مدرسهسینینگ خرهجتینی تامینلش اوچون قالین توقیشگه راضی بولگن. بولرگه علاوه، او قالین کارگاهسی آرقهسیده اولتیریشنی اوزی اوچون حیاتنینگ قیینچیلیکلریدن قاچیش دیب تعبیر قیلهدی. «قالین توقیش یخشی دیر. بیر تفریح هم بولهدی. اویده بولیش و افسرده بولیشدن بو ایش یخشیراق. بو ییرده بولگنیمیزده حیات قیینچیلیکلریدن فکریمیز اوزاق بولهدی.»
ایشخانهنینگ باشقه بیر چیککهسیده، اورته یاشلی بیر عیال رنگلنگن ایپلرنی توپلماقده. اسمی بیبیگل و ایکی فرزند آنهسی دیر. او تورت ییلدن بیری بو ییرده ایشلماقده و هر مترمربع قالیننی توقیش بیلن ایکی مینگ افغانی قولگه کیلتیرهدی. اونینگ ایتیشیچه، مذکور پول عایله نیازلرینی تامینلش توغریسیده ییترلی ایمس؛ لیکن اینگ آز حیاتنینگ کوپ قیینلیک بیلن اوتکزه آلهدی. اونگه کوره: «قالین توقیشگه راضی ایمسمن، مجبورمین که کیلیب ایشلسهم. تورموش اورتاغیم ایشسیز دیر.
قالین توقیش افغانستاننینگ قدیمی صناعتلریدن بیری بولیب، قشاقلیک و ایشسیزلیک کوپهیشی بیلن اونینگ بازاری رواجلنهدی؛ لیکن یخشیراق بازار و اونینگ صادراتی اوچون ییترلی آسایشتهلیک یوقلیگی سبب، بو بولیمده ایشلهیدیگنلر اوچون یخشی بیر درآمد منبعسی بوله آلمهگن.
بیزلرنینگ «ایکس» ترماغی ده هم تعقیب قیلینگ!
«ابکر فیشن» ایشخانهسینینگ مالی مدیری سیدامان حسینینینگ ایتیشیچه، مذکور ایشخانه تورت ییلدن بویان فعالیت قیلماقده. حاضر ایسه بو ایشخانه قریب ۲۰ عیال ایش بیلن شغللنیب و شونینگدیک باشقه ۱۲۰ کیشی هم اویلریده مذکور ایشخانه بیلن همکارلیک قیلهدیلر.
حسینی قالین ساتیلیشی بازاریدن شکایت قیلیب ایتیشیچه: «اوتمیشگه قرهگنده ایشلریمیز کمهیگن. بازار یوق. اوتمیشده بیر قالین بیر کونده ساتیلهر ایدی، بیراق حاضر ایسه تورت-بیش کونده بیر قالین ساتیلهدی.»
مذکور ایشخانهدن چیقهمن، لیکن حاضر هم اوشه ییرده قیزلر و عیاللر قالین توقیش بیلن مصروف که بو عیاللر مستقل بولیشنی آرزو قیلهدی و اوز عایلهلرینینگ احتیاجلرینی تامینلش اوچون قولیدن کیلنگونچه حرکت قیلیشهدی.
