سېویملی اۉقووچیلر!
ظهیرالدین محمد بابر پادشاهنینگ حیاتی و ایجادی بۉییچه معلومات ایستووچیلر و علمی مونوگراف یازهدیگن کۉپلب اۉرتاقلر، افغانستانده تألیف اېتیلگن کتاب و رسالهلر همده باسیلیب چیققن بابر اثرلری حقیده دایم سۉرهب تورهدیلر.
حرمتلی اۉرتاقلر و اۉقووچیلرنینگ التفاتلری اوچون تشکر قیلهمیز. اولرنینگ التماسلریگه کۉره قوییدهگی معلوماتلرنی امانی باریچه تۉلیق فهرست قیلیب تقدیم قیلهمیز. بو موضوع حقیده افغانستان مطبوعاتیده، تورلی سویهده جدا کۉپ مقالهلر ده ترقلگن. بیراق بو فهرستده بیز اساساً بابر اثرلری و بابر و بابریلرگه اتب تألیف اېتیلگن کتاب و رسالهلرنیگینه کۉزده توتکنمیز:
۱. آرامکاه بابر: استاد خلیل الله خلیلی تألیفی.
رسالهده بابرنینگ وصیتیگه کۉره، جنازهسی هندوستاننینگ آگره شهریدن بابر سېوگن شهری کابلگه آلیب کېلیشی واقعهسی چیرایلی بدیعی فارسچه نثرده بیان اېتیلگن. بو رساله بیرینچی قتله “ژوندون” ژورنالی ادارهسی تماندن هجری ۴۰- ییللرده کابلده باسیلیب چیققن. رسالهنینگ سۉنگگی ۶۴-۷۰ نچی بېتلریده، ظهیرالدین محمد بابرنینگ تاریخچی قیزی گلبدن بېگم نینگ “همایون نامه” کتابیدن بابر حیاتینینگ اېنگ سۉنگگی دملری واقعهسی کېلتیریلگن.
بو رساله کاندید اکادمیسین دکتور واحدی اهتمامی بیلن هجری ۷۰- ییللرده مزارشریفده قیته نشر قیلینگن.
۲. ظهیرالدین محمد بابرشاه: پوهاند عبدالحی حبیبی، بیهقی نشریاتی، کابل: هجری ۱۳۵۱.
بو کتابده بابر حیاتی، فعالیتی و ایجادی
هرتمانلمه و کۉپلب مهم منبعلر، أینیقسه بابریلر زمانداشلری، غرب و هند منبعلری اساسیده یاریتیلگن. کتابدهگی معلوماتلر اۉزینینگ نادر منبعلریگه کۉره بابرشناسلیک ترماغیده مهم منبع صفتیده فایدهلهنیب کېلگن. کېینگی ییللرده، بو اثر میوند انتشارات موسسهسی ارقهلی نېچه قتله قیته باسیلیب چیققن.
۳. افغانستان در عهد کورگانیان هند: پوهاند عبدالحی حبیبی، بیهقی نشریاتی، کابل: هجری ۱۳۵۱.
بو کتاب تاریخی اثر بۉلیب، بابریلر حاکمیتی زمانیدهگی حاضرگی افغانستان تاریخی تحقیق اېتیلگن.
۴. دیوان ظهیرالدین محمد بابر: مقدمه، مقابله و تصحیح شفیقه یارقین، افغانستان علوم اکادمیسی نشری، کابل: ۱۳۶۲.
بو کتاب بابر دیوانینینگ تیارلنگن بیرینچی علمی و انتقادی متنی دیر. ۱۳۶ بېتدن عبارت مقدمهده بابر حیاتی و ایجادی حقیده کېنگ معلومات بېریلگن. أینیقسە بابرنینگ ایچکی اینجە تویغولری شعرلری یوزیدن تېکشیریلگنلیگی مراقلی دیر. بو کتاب، بابرشناسلیکده “کابل نشری” آتی بیلن تانیلگن.
۵. دریا در گوهر (بابر دېوانینینگ تۉلیق انتقادی متنی): مقدمه، مقابله و تصحیح دکتور شفیقه یارقین، اطلاعات و فرهنگ وزیرلیگی نشری، کابل: هجری ۱۳۸۷-ییل.
بو درواقع بیرینچی نشرنینگ هم متنی و مقدمهسیگه کۉره نسبتاً تۉلیق و ینگی انتقادی نشری دیر. اونده بابر دېوانینینگ استانبول یونیورسیتیسی نسخهسیدن بورونغی نشرده بۉلمهگن بابرنینگ اۉزبېکچه و فارسچه شعرلر، معمالر و نامهلری کیریتیلگن. حاضرچه اوشبو نشر، بابر دېوانینینگ اېنگ تۉلیق علمی- انتقادی متنی دیر.
۶. بابرگه ارمغان: شفیقه یارقین اهتمامی بیلن، افغانستان بیلیملر اکادمیسی، ایناغه ملیتلر بۉلیمی نشری، کابل: ۱۳۶۲.
تۉپلمده ۲۶کیشی اۉزبېک و تورکمن شاعری بابر غزللریدن بیریگه ایزداشلیک قیلیب یازگن شعرلری کیریتیلگن.
۷. مجموعه مقالات سیمینار بابر: افغانستان علوم اکادمیسی، کابل: ۱۳۶۲.
رساله بابر توغیلگنینینگ ۵۰۰ ییللیگی مناسبتی بیلن کابلده اۉتکزیلگن علمی سیمینار مقالهلری ییغمهسی دیر.
۸. بابر منگولیگی: توزووچی و مهتمم محمد حلیم یارقین، ا.م.ا. جنبشی، جوزجان فرهنگی کېنگشی نشری، شبرغان: ۱۳۷۲-ییل.
اوشبو رسالهده بابرگه عاید تورلی موضوعلر قطاری بابر مکتوبلری، بابر عایلهسیده شعر و ادب و بابر معمالری کبی افغانستان مطبوعاتیده ینگی معلوماتلر بار. قالهبېرسه، رحمتلی سید محی الدین گوهرینینگ شخصی کتابخانهسیده سقلنهدیگن بابرنینگ دنیا بۉییچه قۉلده بۉلگن عروض رسالهسی نینگ پاریس موزیمی نسخهسیدن سۉنگ، ایکینچی قۉلیازمه بیرینچی قتله تانیتیلگن.
۹. بابرنامه(کابل واقعهلری): نشرگه تیارلاوچی معاون سرمحقق دکتور شفیقه یارقین، افغانستان علوم اکادمیسی، کابل: ۱۳۸۶.
بو نشر کاندید اکادمیسین دکتور واحدی نظری آستیده انتقادی یۉسینده، اعلام فهرستی بیلن تیارلنگن متن دیر.
۱۰. بابرنامه(واقعات کابل/دری): دکتور شفیقه یارقین ترجمهسی، افغانستان علوم اکادمیسی، کابل: ۱۳۸۶.
بو نشر کاندید اکادمیسین دکتور واحدی نظری آستیده انتقادی یۉسینده، اعلام فهرستی بیلن تیارلنگن متن دیر.
۱۱. بابرنامه(واقعات کابل/دری): ترجمه دکتور شفیقه یارقین، به کوشش غلام سخی غیرت، چاپ دوم، نشر انستیتوت دیپلماسی وزارت امور خارجه، کابل: هجری ۱۳۸۸/میلادی ۲۰۰۹.
بو اثر، درواقع افغانستان علوم اکادمیسی ۱۳۸۶- ییللی نشر قیلگن متن نینگ ایکینچی باسقیسی دیر. کتاب ۳۰۰۰ جلدده باسیلیب چیققن.
۱۲. بابرنامه (اصل اۉزبېکچه تۉلیق متن): پوهنیار هدایت الله هدایت اهتمامی بیلن، میرزا اولوغ بېک فرهنگی انجمنی نشری، مزار شریف: ۱۳۸۷.
بو متن، جاپانلیک مشهور بابرشناس عالم پروفیسور ایجی مانونینگ انتقادی متنی اساسیده تیارلنگن. بونگه اعلام فهرستی توزیلمهگن، افسوس.
۱۳. بابری خط: محمد حلیم یارقین تألیفی، افغانستان آیدین فرهنگی انجمنی نشری، الازهر انتشارات مؤسسهسی، پشاور: هجری ۱۳۸۴/میلادی ۲۰۰۵.
بو ایخچم رسالهده تورلی منبعلر اساسیده بابر اختراع قیلگن خط حقیده کېنگ معلومات آلیشینگیز ممکن. اثر، بابری خط بۉییچه مستند و کېنگ معلومات بېرووچی یگانه مستقل رساله دیر.
۱۴. کامران میرزانینگ حیاتی و ایجادی(اۉزبېکچه و فارسچه دېوانینینگ تنقیدی متنی بیلن): دکتور شفیقه یارقین، کابل: هجری ۱۳۸۸/میلادی ۲۰۱۰.
بو کتابده بابرنینگ اۉغلی کامران میرزا حیاتی و اونینگ اۉزبېکچه و فارسچه شعرلری حقیده کېنگ و هرتمانلمه معلومات بېریلگن.
۱۵. شهنشاه سخنور: عبدالله کارگر، انتشارات الازهر، کابل: ؟.
بو کتابده بابر حیاتی و ایجادی حقیده معلومات بېریلگن.
۱۶. شبهای پرستاره(رومان): پیریمقول قادروف، ترجمۀ برهان الدین نامق، نشر بنیاد انتشارات “قیزیل چوپان”، کابل:
بو اثر اۉزبېکستان خلق یازووچیسی پیریمقول قادروفنینگ یولدوزلی تونلر رومانینینگ اۉزبېکچهدن دری تیلگه ترجمهسی دیر.
۱۷. حکومت بابر در کابل و هند: صباحت عظیم جانوا، ترجمه سید ابراهیم قیصاری، انتشارات “تاک”، کابل: ۱۳۹۱-ییل.
بو اثرنی اۉزبېکستانلیک تانیقلی عالم رحمتلی صباحت عظیم جانوا، بابرنینگ کابل و هندوستان یورتلریده کېچکن کېزلر حیاتی و فعالیتلری حقیده روسچهده یازگن.
۱۸. باغ بابر: محقق محمد اکبر امینی، جای نشر؟، تاریخ نشر؟
بو اثر کابلده “بابر باغی” حقیده کېنگ و مستند تحقیقی کتاب دیر. اونده بابر باغی همده بابر قورگن باغلر و چیقرگن اریقلر حقیده قیزیقرلی معلوماتلر بار.
۱۹. مبین: ظهیرالدین محمد بابرشاه، عبدالغفور دستیار اهتمامی بیلن، کابل: ۱۳۹۸.
بو منظوم رسالهده، بابر اسلام فقهی قاعده و بویروقلرینی شرح و بیان قیلگن.
۲۰. بابرنامه: ظهیرالدین محمد بابرشاه، وهاب رحمان و کرامت ملا خواجهیوالرنینگ حاضرگی اۉزبېکچه ترجمهسی، یازوو اۉگیرووچیسی تاشقین بهایی، بابر انتشاراتی، واژه باسمهخانهسی، کابل: هجری ۱۳۹۹/میلادی ۲۰۲۰-ییل.
بو متن اصل اۉزبېکچه علمی متن اېمس، بابرنامهنینگ عامهباب اۉزبېکچه نشری دیر.
۲۱. بابر حقیده (مقالهلر تۉپلمی): رحیم ابراهیم تألیفی، تعلیمی انتشارات مؤسسهسی، نشر ییلی: ۱۳۹۶/میلادی ۲۰۱۸.
تۉپلمده بابردن نظم و نثر پرچهلر، بابرنینگ قیزی گلبدن بېگمنینگ “همایون نامه”سیدن اۉرنکلر و بابر حقیدهگی بیر عده قلمکشلر مقالهلری باسیلگن.
۲۲. نوایی و بابر تولدی اوچون (مقاله و شعرلر تۉپلمی): مهتمملر: محمد کاظم امینی و تاشقین بهایی، اېزگو انتشاراتی، چۉلپان باسمهخانهسی، میمنه-فاریاب: هجری ۱۳۹۴-ییل.
بو رسالهده نوایی و بابرگه بغیشلب یازیلگن مقاله و شعرلر باسیلگن.
۲۳. یولدوزلی تونلر: پیریمقول قادروف، یازوو اۉگیرووچی نورالله آلتای، کابل: ۱۳۹۷-ییل.
بو اثر، پیریمقول قادروف بابر حیاتی حقیده یازگن جدا قیزیق رومان دیر. بو رومان بیر نېچه تیلده اۉگیریلگن و او اساسده درامه، فیلم و سریال توزیلگن.
۲۴. بابرنامه (تنقیدی متن)، رحیم ابراهیم، تعلمی انتشارات موسسهسی، مزارشریف: هجری ۱۴۰۱/م. ۲۰۲۳
۲۵. بابر سۉزلیکی، رحیم ابراهیم، حالی چاپ بولمهگن.
اېسلتمه: حرمتلی اۉقووچیلر! سۉنگگی ییللرده چاپ بۉلگن و اوشبو فهرستدن قالگن اثرلر بۉلسه ده، لطف اېتیب بیز بیلن شریک قیلینگیز!
