بوگون (دوشنبه ۱۴- میزان) ایرته‌لب مملکت جمهوررئیسی محمداشرف غنی، یوقاری مرتبه‌لی بیر هیأت نینگ ییتکچیلیگیده کویت و قطر مقصدی گه کابل نی ترک قیلگن.
جمهوررئیس‌لیک سرایی تامانیدن ترقه‌تیلگن بیر خبرنامه‌ده کیلیشیچه، جناب غنی و اونینگ همراه‌لیک قیله‌دیگن هیأت کویت سابق امیری شیخ صباح الاحمد الجابر الصباح نینگ فاتحه مراسمی ده اشتراک قیلیب و مذکور مملکت حکومت و اهالیسی بیلن غم‌شریک‌لیک قیلگنیدن کیین قطر پایتختی دوحه کیته‌دی.
جمهوررئیس غنی دوحه‌ده، قطر امیری شیخ تمیم حمد بن آل ثانی، قطر باش وزیری شیخ خالد بن خلیفه بن عبدالعزیز آل ثانی، افغانستان تینچلیگی بوییچه آمریکا خاص نماینده‌سی زلمی خلیل‌زاد، افغانستان ده ناتو و آمریکا حربی‌لری نینگ قومندانی جنرال اسکات میلر و وافغانستان مذاکره‌چی هیأت اعضالری بیلن اوچره‌شی ممکن.
بیراق قطر ده طالبان سیاسی دفتر اعضاسی عبدالحق وثیق نینگ سلام‌وطندارگه ایتیشیچه، طالبان نینگ اشرف غنی بیلن اوچره‌ش اوچون هیچ بیر برنامه‌سی یوق و اولر صحبت اوتکزمه‌سی ممکن. جناب وثیق نینگ ایتیشیچه: «جناب غنی نینگ قطر گه سفر قیگلنیدن کیین دولتی نینگ برنامه‌سی بیللی بوله‌دی.»
جمهوررئیس‌لیک سرایی تامانیدن ترقه‌تیلگن خبرنامه‌ده کیلیشیچه، جناب غنی قطرلیک رسمیلر بیلن تورلی بولیم‌لرده ایکی مملکت همکارلیک‌لری و علاقه‌لری کوپه‌یشی اوستیگه بحث قیله‌دی و شونینگدیک دوحه انستیتیوتی ده دیپلوماتلر، اوقیتووچیلر، دانشمندلر و طلبه‌لرنینگ حضوری گه نطق سوزلشی ممکن.
جمهوررئیس قطر مملکتی تامان سفر قیلگن بیرحالده، مذکور مملکت پایتختی دوحه ده افغانستان‌لیکلرارا سوزلشوولر باشلنگنیدن کمیده بیر آی اوتیشی بیلن، طالبان و افغانستان دولتی نینگ تماس گروه‌لری سوزلشوولرنینگ برابریده‌گی قیینچیلیک‌لرنی حل قیله آلمه‌گن.
شونینگدیک ایکی تامان تماس گروه‌لری نینگ ییغین‌لری نیچه کوندن بویان توخته‌تیلگن و بو جنجللرنی حل قیلیش اوچون دیپلوماتیک سعی و حرکتلر باشلنگن.
مذکور سفر ده، جمهورلیک ریاست بیرینچی اورین‌باسری امرالله صالح، تشقی ایشلر وزیرلیگی سرپرستی محمدحنیف اتمر، ملی خوفسیزلیک مصلحتچیسی حمدالله محب، جمهورلیک ریاست عالی مقام دفتری نینگ عمومی باشلیغی محمدشاکر کارگر، ایشلر اداره‌سی عمومی باشیلغی فضل‌محمد فضلی، عالی اوقوو وزیرلیگی سرپرستی عباس بصیر، معارف وزیرلیگی سرپرستی رنگینه حمیدی، اقتصاد وزیرلیگی سرپرستی کریمه حامد فاریابی، نماینده‌لر کینگش اعضاسی اجمل رحمانی، سنا کینگش نماینده‌سی عبدالطیف نهضت‌یار و کویت و قطر بوییچه افغانستان ایلچی‌لری جمهوررئیس غنی نینگ همراه‌لیک قیله‌دی.
