معارف وزیرلیگی مسئوللری بوگون (چهارشنبه، ۲۱-سنبله)، امارتی اداره‌لر نینگ بیر ییل‌لیک یوتوقلرینی بیان قیلیش برنامه‌سیده ایتیشلریچه، اوتگن بیر ییل‌ده افغانستان بویلب ۳۱۶ ینگی مکتب قوریلگن که مذکور مکتب‌لردن ۱۰۶ ته‌سی دولتی و ۲۱۰ ته‌سی ایسه خصوصی دیر.
اوشبو وزیرلیک نینگ اسلامی تعلیم‌لر بوییچه معینی کرامت‌الله آخوندزاده نینگ ایتیشیچه، اوتگن ییل‌ده محل یشاوچیلری، معارف سیورلر و جمغرمه‌لر همکارلیگی بیلن، مملکت‌ده ۶۵۰ مکتب و مدرسه قوریلیب و ۱۵۰۰ مکتب و مدرسه ایسه قیته قوریلگن. «اوتگن ییل‌ده مملکت بویلب ۳۱۶ ینگی مکتب قوریلگن که بو مکتب‌لردن ۱۰۶ ته‌سی دولتی و ۲۱۰ ته‌سی ایسه خصوصی دیر.»
بیزلرنینگ «ایکس» ترماغی ده هم تعقیب قیلینگ!
معارف وزیرلیگی مسئوللری نینگ ایتیشلریچه، اوتگن ییل‌ده دولتی و خصوصی ۱۵۲ باشلنغیچ مکتب اورته مکتب گه و دولتی و خصوصی ۱۱۹ اورته مکتب ایسه لیسه گه ایلنتیریلگن.
اولر نینگ کوپه‌یتیریشلریچه، ۱۲۳ مکتب و ۱۵۹ محلی صنف کوچی اهالی نینگ باله‌لری گه اختصاص بیریلیب و حاضر ایسه ۴۱ مینگ ۸۰۰دن آرتیق اوقووچی اولرده تعلیم کوریش بیلن شغللنگن.
معارف وزیرلیگی مسئوللری گه کوره، اوتگن ییل‌ده بیرینچی صنف‌دن ۱۲-صنف گه قدر ۱۶ میلیون ۱۸۸ مینگ‌دن آرتیق جلد درسی کتاب چاپ بولگن.
معارف وزیرلیگی نینگ اسلامی تعلیم‌لر بوییچه معینی کرامت‌الله آخوندزاده نینگ ایتیشیچه، ۱۶ مینگ‌دن آرتیق مکتب‌ده تطبیق بوله‌دیگن تعلیمی پلان و تعلیمی مرکزلر، محلی صنف‌لر و سوادخوانلیک برنامه‌لریده، ۲۱ مینگ‌دن‌آرتیق اوقیتووچی نینگ درس بیریش پروسه‌سی نظارت بولگن که بو آره‌ده ۵ مینگ‌دن آرتیق اوقیتووچی گه ظرفیت آشیریش برنامه‌لری یولگه قوییلگن.
کرامت‌الله آخوندزاده نینگ کوپه‌یتیریشیچه: «بیرینچی صنف‌دن ۱۲-صنف گه قدر ۱۶ میلیون ۱۸۸ مینگ ۹۳۹ جلد درسی کتاب چاب و مکتب‌لر گه ترقه‌تیلگن. ۶۱۷ مینگ ۹۷۸ جلد درسی کتاب ایسه اسلامی تعلیم‌لر مرکزلری گه ترقه‌تیلیب و ۲۹۴ مینگ ۶۴۱ جلد سوادخوانلیک کتاب چاپ بولیب و ترقه‌تیلگن.»
باشقه بیر تاماندن، اوشبو وزیرلیک مسئوللری نینگ ایتیشلریچه، اوتگن بیر ییل‌ده ۱۹ مینگ ۶۶۹ مدرسه، ۱۲۷۷ دارالحفاظ، ۱۱۵ دارالعلوم و ۳۹ مهربان‌لیک اوی شامل مملکت‌ده ۲۱ مینگ ۲۰۰دن آرتیق اسلامی تعلیم‌لر مرکزی قوریلگن که ۳ میلیون‌دن آرتیق کیشی مذکور جایلریده اسلامی تعلیم کورماقده‌لر.
بیزلرنینگ فیسبوک صحیفه‌میزگه باش اورینگ!
شونده‌ی بیرحالده، معارف وزیرلیگی سوزلاوچیسی منصوراحمد حمزه، ینه بیر مرته آلتینچی صنف‌دن یوقاری قیز اوقووچیلر یوزیگه مکتب‌لر ایشیگی نینگ کیینگی امرگچه یاپیق قالیشی گه اورغوله‌گن. «مجاهد‌صاحب نیچه مرته بیان قیلگن و بیزلر بونی ییترلی بیله‌میز؛ آلتینچی صنف‌دن یوقاری قیز اوقووچیلر یوزیگه مکتب‌لر ایشیگی کیینگی امرگچه یاپیق دیر.»
معارف وزیرلیگی مسئوللری، ۳ مینگ‌دن آرتیق شکایت نینگ حل قیلینیشی، ۱۲-صنف نی بیتیرگنلر گه ۳۰۳ مینگ قطعه شهادت ترقه‌تیلگنی و باشقه بیر قطار موردلرنی، اوتگن بیر ییل جریانیده‌گی بو وزیرلیک نینگ یوتوقلریدن عنوان قیلگنلر.
