قوراللی هجومچیلر نینگ کابل بیلیم یورتی اوستیده‌گی هجومیدن بیر کون اوتگنیدن کیین، اسلامی همکارلیک و ناتو تشکیلات‌لری اوشبو هجوم نی جدی شکلده قاره‌لگن.
بوگون (سه شنبه ۱۳- عقرب) اسلامی همکارلیک تشکیلاتی نینگ کاتب‌خانه‌سی بیر اعلامیه ترقه‌تیب، اوشبو تشکیلات هرقنده‌ی زوروانلیک، ترورچیلیک و افراطیت نی محکوم قیلیشی نی بیلدیرگن.
انه‌شوحالده، ناتو تشکیلاتی نینگ باش‌کاتبی ینس‌استولتنبرگ، اوتگن کونی یوزبیرگن هجوم‌ده قربان بولگنلرنینگ عایله‌سیگه اوز قیغوداشلیگی نی بیلدیریب و داعش گروهی برابریده بیر‌لیکده کوره‌شیش نینگ اهمیتی اوستیگه اورغوله‌گن.
بوندن آلدین، اورپابیرلیگی نینگ نماینده‌لیگی و بریتانیا بویوک ایلچی‌لیگی مذکور هجوم برابریده عکس‌العمل کورسه‌تیب، بیراغ‌لرینی یریم کوتارگن ایدیلر.
افغانستان دولتی بوکون (سه شنبه ۱۳- عقرب) نی ملی ماتم اعلام قیلگن. شونینگدیک افغانستان بیراغی بوتون سیاسی نماینده‌لیکلرده یریم کوتاریلگن.
قوراللی عصیانچیلر تامانیدن کابل بیلیم یورتی اوستیگه اویوشتیریلگن هجوم برابریده اولکه یشاوچیلری هم جدی شکلده عکس‌العمل کورستگنلر. بو هجوم ده طلبه‌لردن کوپینچه‌سی نینگ جان بیرگنی باعث، کابل بیلیم یورتی نینگ اوقووچی‌لری عکس‌العمل کورسه‌تیب و بیلیم یورت ایشیگی برابریده توپله‌نیش بیلن طالبان گروهی بیلن دوام ایته یاتگن تینچ‌لیک مذاکره‌سینی نینگ توخته‌تیلیشی نی سوره‌شگن.
افغانستان دولتی، اوشبو هجوم‌نی طالبان‌گه نسبت بیره‌دی. جمهور رئیس بیرینچی اورین باسری امرالله صالح نینگ ایتیشیچه، قولگه کیلگن سندلر اساسیده، اوشبو هجوم طالبان تامانیدن انجام بیریلگن.
لیکن طالبان گروهی، مذکور هجوم دن بیر ساعت اوتگنیدن کیین بو هجوم ده قوللری بارلیگی نی رد قیلگن.
بیراق اسلامی دولت دیب نام‌لنگن داعش گروهی اوشبو هجوم مسوولیتی نی اوز بوینیگه آلگن.
قوراللی عصیانچیلر تامانیدن کابل بیلیم یورتی اوستیگه صورت تاپگن هجوم‌ده، ۱۹ کیشی هلاک و ۴۲ کیشی یره‌لنگن.
مملکت تشقی ایشلروزیرلیگی نینگ ایتیشیچه، اوشبو هجوم ۴۲ اولکه تامانیدن قاره‌لنگن.
