افغانستان استراتژیک مطالعات انستیتیوتی «اهالی نینگ کرونا گه قرشی عمل‌لری و اونینگ افغانستانده هرتامانلمه تاثیری» نامی‌ده ینگی تدقیقات نتیجه‌سینی نشر قیلگن. اوشبو تدقیقات‌ده مملکت ۳۴ ولایتیده ۲ مینگ و ۹۰۷ کیشی بیلن یوزمه‌یوز مصاحبه اوتکزیلگن.
مذکور تدقیقات گه کوره، حاضرده مملکت بوتون یشاوچی‌لری اینیقسه سوادی بار کیشی‌لرنی کرونا ویروسی و اونینگ تاثیری و ساغلیک وزیرلیگی نینگ رهنمودلری خصوصیده معلوماتی بار، لیکن اوشبو ویروس‌نی جدی آلمه‌یدیلر و اونگه قرشی بی‌فرق یانده‌شه‌دیلر.
ساغلیق‌نی سقلش وزیرلیگی مصلحتچی‌سی و اوشبو تدقیقات یازووچی‌سی نرگس نیازی نینگ ایتیشیچه، یشاوچی‌لردن ۵۰% کرونا ویروسی‌نی خداوند نینگ گناه‌کارلر اوچون غضبی نینگ نشانه‌سی بولگنی‌گه ایشانه‌دیلر.
ساغلیق‌نی سقلش وزیرلیگی مصلحتچی‌سی نینگ کوپه‌یتیریشیچه: « قولگه کیلگن معلومات‌لرگه کوره، بیر ییلدن سونگ، اهالی نینگ کرونا ویروسی خصوصیده‌گی معلومات‌لری یوقاری کیتگن، لیکن اهالی نینگ دانش و عملی آره‌سیده خلا موجود. بوتون یشاوچی‌لرنی معلوماتی بار، بیراق ۳۵% اهالی ماسک دن فایده‌لنه‌دی.»
مذکور تدقیقات گه کوره، یشاوچی‌لردن ۵۰% کرونا ویروسی‌گه چلینمه‌گن و ۲۲% نی کرونا واکسین‌نی و درمان‌لش خصوصیده معلوماتی یوق.
اوشبو تدقیقات‌گه کوره، یشاوچی‌لردن ۶۰% اساسی نیازلرینی تامین‌لش خصوصیده قیین‌چیلیکلر بیلن روپه‌ره بولگنلر و قرنطینه عایله‌وی زوروانلیکلر کوپه‌یشی‌گه سبب بولگن.
تدقیقات گه ایتیلیشیچه، اهالی نینگ کرونا ویروسی خصوصیده دقت‌سیزلیگی وضعیت نینگ یمان بولیشی‌گه سبب بولگن. شونینگدیک، خلق ارا ساغلیک تشکیلاتی نینگ آگاه‌لنتیریشیچه، دقت‌سیزلیک دوام قیلگن صورتده، وضعیت‌نی یمان بولیشی ممکن.
عین‌حالده، ساغلیق‌نی سقلش وزیرلیگی مسوول‌لری نینگ کرونا ویروسی‌گه قرشی کوره‌شیش اوچون امکانیت کم‌لیگی دن خبر بیریب ایتیش‌‍لریچه، وضعیت یمان بولگن حالده، اوشبو وزارت ده مجادله قیلیش کوچی یوق دیر.
اوشبو تدقیقات گه ساغلیق‌نی سقلش وزیرلیگی دن کرونا ویروسی‌گه قرشی کوره‌شیش اوچون جدی برنامه‌لر قولگه آلیشی و اهالی معلوماتی‌نی یوقاری آلیب باریش اوچون سعی و حرکت قیلیشی سوره‌لگن.