فلک گردشی حیاتنینگ چرخینی ییللر دوامیده اَیلنتیریب کېلماقده. اوشبو حیات آقیمیده میلیونلب انسانلر توغیلیب، اۉنیب۔اۉسیب، دنیادن اۉتیب کېتماقدهلر. لېکن بیر قطار انسانلر حیات قدریگه یېتیب و حیاتنینگ معنا و توشونچهسینی چوقور انگلب، کېلهجک نسللری اوچون سیاسی، اجتماعی، عمرانی، مدنی و ادبی ساحهلرده اۉزلریدن اۉنیملی اثر قالدیرگنلر و حاضرگی پیتده هم بیر قطار انسانلر کوندهگی شرایطنینگ تۉسیق و معمالریگه قرهمسدن اۉزلریدن اهمیتلی اثرلر قالدیریب کېلماقدهلر. معلومکه بولردن قالهدیگن اثرلر عینن اۉتمیشدهگی عالم و ایجادکارلردن قالگن ایجادلر کبی کېلهسی اولادهلر اوچون ارزشلی تاریخ سنلهدی. اینیقسه منهشو معنویت کاروانیگه قۉشیلگن انسانلرنی نه تاریخ اونوتهدی و نه هم بیلیم قدر۔قیمتیگه توشونگن خلق. چونکه حضرت امیرالکلام میر علیشیر نوایی اَیتگندېک:
کمال اېت کسب کیم عالم اوییدین،
سنگا فرض اۉلمهغای غمناک چیقماق.
جهاندین نا تمام اۉتماق بعینه،
اېرور حمام دین ناپاک چیقماق.
بو معنویت بیلن شغللنگن انسانلر، دنیاگه کېلیب هیچ نرسهنینگ قدریگه یېتالمهی اۉتیب کېتگن انسانلر اېمس، بلکه اولرنینگ هر بیری دنیانینگ هر تامانلمه اۉرگنیشگه حرکت قیلیب، اۉز کوچ۔قوتلریگه یرهشه اۉزلرینی آقلب اۉتکنلر. منهشو سببلی بیلیم و معنویت آدملری عادی انسانلردن تۉله۔تۉگیس فرقلیدیر. شونگه بناً، الله تعالی هم قرآننینگ زمر سورهسینینگ ۹۔ آیتیده قوییدهگیچه بیان قیلگن: «قُلْ هَلْ یَسْتَوِی الَّذِینَ یَعْلَمُونَ وَالَّذِینَ لَا یَعْلَمُونَ ۗ إِنَّمَا یَتَذَکَّرُ أُولُو الْأَلْبَابِ». آیتنینگ خلاصه مضمونی اېسه، «بیلیمدانلر بیلن جاهللر اۉرتهسیدهگی فرقنی بیان قیلهدی؛ الله نزدیده بیلیم اېگهلری یوقاریراق مقامدهلر» دېگن. بو آیتنینگ مضمونینی کېلتیریشیمیزنینگ سببی حقیقتنی آچیقلب، مقدس کتابیمیز بۉلمیش قرآن نقطهی نظریدن بیلیملی بیلن بیلیمسیزنینگ اۉرتهسیدهگی فرقنی کۉرسهتیش دیر.
البته بو متننی یازیشدن مقصد، قریب ییگیرمه ییلدن بیری، اقتصادی، اجتماعی و حتا سیاسی وضعیتلر بیلن مقاومت قیلیب، معنویت کاروانیگه قۉشیلیب کېلهیاتگن، شاعر، رسام و خطاط دوستیم تاجمحمد اېلسېور حقیده بولگن. اېلسېور اۉزینینگ ترجمهی حالیگه کۉره، ۳۹ ییل آلدین هجری شمسی ۱۳۶۵۔ ییلی فاریاب ولایتی، خواجه سبزپوش تومنینینگ غوزاری قیشلاغیده، بیر اۉرتهچه روحانی و کمبغل عایلهده دنیاگه کېلهدی. مکتبنی اۉزینینگ تومنیده توگتگچ، ۱۳۸۵۔ ییلی، کانکور سیناوی آرقهلی فاریاب بیلیم یورتینینگ ادبیات و کیشیلیک بیلیملر فاکولتهسینینگ اۉزبېک تیلی و ادبیاتی بۉلیمیگه یۉل تاپهدی. مېن هم عینن منهشو ییلده اۉزبېک تیلی و ادبیاتی بۉلیمیده اۉقووچی بۉلیب کیریشیب اېلسېور بیلن صنفداش بۉلدیم. بو تاجمحمد ناملی صنفداشیم، طلبهلیک دَورینینگ باشلنغیچ پَیتیده اېلسېور اېمس، «نعیمی» تخلص قیلر اېدی. کېینچهلیک اېلسېور تخصلنی اۉزیگه تنلهدی. البته، مخلصانه و اۉزبېکانه فعالیتلریگه کۉره تنلنگن تخلصی اۉزیگه ماس توشگن. اساسن، بو کیشی بیلن تنیشگنیم و دوست بۉلگنیمده قریب ییگیرمه ییل تۉلدی.
اېندی اېلسېور حقیده بۉلگن خاطرهلریمنی بیان قیلیش اوچون اصلی مقصدگه اۉتسم: فاکولتهنینگ تۉرت ییل جریانیده برچه صنفداشلریمیز بیلن گاه قیزهریب، گاه اورشیب، گاه سۉکیشیب، گاه هزللشیب و گاه یرهشیب تۉرت ییلنی اۉتکزدیک. هیچ زمان بیر۔بیراویمیز بیلن دواملی خفه بۉلمهگنمیز، اصلیده اۉشه تارتیشگنلریمیز سببلی هر بیریمیزنینگ دوستلیگیمیز حاضرگچه دواملی و مستحکم دیر. تۉغریسی انهاۉشه محصللیک دَوریمیز آلتین دَورلریمیز اېکن، افسوسکه قیته تکرار بۉلمهیدی، بیز اوچون فقطگینه اونوتیلمس خاطره بۉلیب قالدی۔یو بس. محصللیک پَیتیمیزده یالغیز مېن اېمس، بلکه برچه صنفداشلریمیز هم، اېلسېورنینگ صاف کۉنگیللیگی، صادقلیگی، سادهلیگی و حقیقتگویلیگی اوچون صمیمی هزللشر اېدیک. اېلسېور اېسه، بیز بیلن گاه قیزهریب جهلی چیقر اېدی، گاه کۉلیشیب، «مېن مست و ملنگ آدممن، مېنی عذاب بېرمنگلر اۉرتاقلریم»، دېب اۉزینی قوتقرماققه حرکت قیلر اېدی. بری۔بیر هزللریمیزنینگ حاضرگهقدر هم دوامی بار. منه شو هزللر و شوخطبعلیکلر باعث اېلسېور، برچه صنفداشلری اوچون صمیمی انسان، برچهمیز اونی، بیمقصد یخشی کۉرهمیز، بو یخشی کۉریشیمیز البته که، اېلسېورنینگ اۉزیگه هم قویاشدېک انیق بۉلسه کېرهک. الله تعالی مهر۔عاقبتیمیزنی صنفداشلریمیز بیلن بیمقصد و مخلصانه دواملی قیلسین.
فاکولتهنینگ بیرینچی صنف دَوریدن بوگونگه قدر اېلسېور بیلن دۉستمن و اۉزیمگه یرهشه بو کیشینینگ احوالی قندهیلیگینی بیلمهمن و تنییمن، چونکه مېن بیرینچی صنفدن تۉرتینچی صنفگچه، صنفنینگ کیپتانی (اول نمرهسی) بۉلگنیم اوچون صنفیمیزنینگ نمایندهسی اېدیم، نماینده بۉلگنیم باعث صنفداشلریمنینگ اقتصادی احوالیدن انچه۔مونچه خبردار اېدیم. خبردار بۉلیشیمنینگ سببی هم، هر سمسترنینگ درسلیک کتابلری، استادلریمیز آرقهلی ینگی-لشر اېدی، مېن ینگیلشگن درسلیک کتابلرنی چاپخانهده چاپ قیلدیریب، صنفداشلریمدن درسلیک کتابلرنینگ پولینی ییغیشتریب چاپخانهگه بېرر اېدیم، پول ییغیش جریانیده صنفداشلریمنینگ اقتصادی وضعیتینی بیلیب آلگن اېدیم. شو جملهدن اېلسېورنینگ اقتصادی وضعیتی یخشی اېمس اېدی. پولی بۉلمهگنی اوچون مېنگه قرهب: «قووانچ صاحب دوستیم! چپتر(درسلیک کتاب) آلمهیمن، چپترینگیز یوزیدن قول بیلن یازیب آلهمن»، دېیر اېدی. حقیقتن هم تۉرت ییل جریانیده چپترنی قۉل بیلن یازیب آلگنیده شاهدمیز. سۉنگ نېگه چپتر آلمهیسیز دېسم، پولیم یۉق دېر اېدی. سوریشتیریب کۉرسک، اَیتگنیدن کۉره هم اقتصادی وضعیتی یامانراق اېکن. کمبغللیگینی سېزگنیمدن سۉنگره، کۉپ پیتلرده اېلسېوردن پول آلمسلیککه حرکت قیلر اېدیم. عینن باشقه صنفداشلریمیز هم اۉزلریگه یرهشه اېلسېورنی اقتصادی جهتدن قۉللب۔قوتلشگه اورینر اېدیلر. سۉنگ بیر۔بیراونینگ احوالیدن خبردار بۉلیش مقصدیده تېز-تېز گورونگلشر اېدېک، بو کیشی مدرسه اۉقیگنی اوچون کۉپ کیشیلردن فرقلیراق اېدی. اۉزیگه کۉره بیلیمی بار اېدی، بیرینچی صنف طلبه-لیک َدوریده هم شعر یازر اېدی، کم۔کم رساملیک و خطاطلیک هم قیلر اېدی. کونلردن بیر کونی حیاتیدهگی اچچیق حقیقتلرنی تۉلیق آچدی، تۉغریسی گپلرینی اېشیتیب نهایت متأثر بۉلدیم. حقیقتن اقتصادی وضعیتی یخشی بۉلمهگن، حیاتیدهگی برچه معمالرینینگ برچهسینی بو کیچیک مقالهده ایضاحلش ممکن اېمس.
اېلسېورنینگ عایلهسی تاریخیده، شاعر، یازووچی، خطاط و چیزووچی انسالر بۉلمهگن، چونکه اونینگ عایلهسی قیشلاق سطحیگه کۉره دینی سواد گه اېگه بۉلگن روحانی و دهقانکار بیر عایله بۉلگن. اېنگ قیزیغی بو که، منه شوندهی وضعیتده، بیلیم آلیش اوچون عایلهسیدن باش کۉتریب، قیشلاغی، تومنی و ولایتینینگ بیلیم اهلی آرهسیده یاش شاعر، خطاط و رسام صفتیده شهرت قازانه دی، البته بو تنیلیشی حضرت نوایینینگ اَیتگنیدېک:
اۉز وجودینگگه تفکر ایلهگیل،
هر نه ایسترسنگ اۉزینگدن ایستهگیل.
درواقع، اېلسېور کمغبللیک احوالیگه قرهمسدن عایلهسینینگ بار امکانیت و حمایتیدن فایدهلنیب، کۉپراق اوزینینگ شخصی تشبثی بیلن منه شونچه کمالگه یېتیشگن. هیچ بیراو هم قۉلیدن توتیب، منه سېن، خطاط، شاعر و رسام بۉلگین دېب، درس اۉقیشگه کېلتیریب قۉیمهگن، فقطگینه اۉزی حرکت قیلیب کۉپ چقمه۔چوقور یۉللرنی یوریب، بوگونگی منزلگه یېتیب کېلگن. منه شونچه مشقتلی زحمتلری طفیلی اېلسېور بوگون، ولایتیدن تشقری کۉپ خلقلر آرهسیده شاعر، خطاط و رسام صفتیده تنیلگنینی تن آلیش کېرهک. بولرنینگ برچهسی اۉزینینگ زحمتلری ثمرهسی دیر.
اېنگ مهمی اېسه، اېلسېور شاعرلیک، خطاطلیک و رساملیگینی گپده اېمس، علمده ثابت قیلگن انسان دیر. اونینگ بیرینچی شعری تۉپلمی «بیر قولتوم سوو» نامی آستیده، هجری شمسی ۱۳۹۲۔ ییلی، فاریاب ولایتینینگ تنیقلی شاعر و یازووچیلریدن استاد تاشقین بهایی، استاد حمیدالله بوتون، استاد محمداشرف شریفی و محمدهاشم همدم فاریابیلرنینگ تقریظ و کیریش سۉزلری بیلن چاپدن چیقیب ترقهتیلگن. ایککینچی شعری تۉپلمی اېسه هجری شمسی ۱۳۹۴۔ ییلی «اېل سایتیگه کېلگن ایمیللر» نامیده دوکتور عزیزالله ارال، استاد محمدعالم کوهکن و استاد محمدکاظم امینیلرنینگ مقدمه و تقریظلری بیلن چاپ اېتیلیب، مخصوص احتفال آرقهلی کابل و فاریاب ولایتلریده کۉرکزمهده قۉییلیب، معنویتسېورلرگه ترقهتیلدی. همده، هجری شمسی ۱۳۹۶۔ ییلی، افغانستان تورکلری (اۉزبېک۔تورکمنلری)نینگ سیاسی شخصیتی دوستیمنینگ تېرمه تصویرلری و سۉزلرینی ییغیشتیریب، هر بیرینی ایری۔ایری چیرایلی رساملیک و خطاطلیک قیلیب، «صد تصویر و صد سخن» عنوانی آستیده، خلق اشتراکی بیلن میمنه شهریده کتته محفل اۉتکزیلدی، اوشبو محفلده نقاشلیک قیلینگن تصویرلر و خطاطلیک قیلینگن سۉزلر تابلولری خلق حضوریده نمایشگه قۉییلدی. ینه بیر بار اوشبو تصویرلر و سۉزلر، شبرغان شهریدهگی تاریخی احتفال و قاشیق بازلیک رقصی کېچهسی نمایشگه قۉییلگنیگه گواهمیز. اوزاق مدتلردن حاضرگه قدر اېلسېورنینگ اۉزبېک تیلیده بۉلگن نثری حکایهلری هم حیاتدهگی حقیقی اجتماعی موضوعلربیلن اجتماعی ترماقلر اینیقسه «هشت صبح» و «بی بی سی» الکترون گزیتهلریده نشر اېتیلیب کېلینماقده. بوندن تشقری اېلسېورلرنینگ انچه شعری پرچهلری تورلی گزیتهلر، ژورناللر، تذکرهلرده نشر اېتیلیب کېلینماقده. اېلسېور اۉز کوچیگه یرهشه معنویت ساحهسیده، کۉپ نشریهلر، مجلهلر و کونده لیکلرگه یاردمچیلیک قیلگن، عینن شعر، خطاطلیک و نقاشلیک فنینی اۉرگهتیش اوچون بیر قطار یاش۔ییگیتلرگه دایما رهنما بۉلیب، صمیمی یۉل کۉرستگن.
حقیقت شو که، خلقمیزنینگ اوشبو کادری اۉز ولایتیده چېکلهنیب قالمهی، بیر لقمه نان تاپیش اوچون بابا۔اجدادی بۉلمیش، شاهرخ میرزا، گوهرشاد بېگیم، لطفی هروی، ابوالقاسم بابر، ابو سعید میرزا، امیر علیشیر نوایی و سلطان حسین بایقرالر یورتیگه باریب، استقامت قیلیب، حیات چرخینی ایلنتیریش یانیده، مشهور خطاط و رسام بهزادنینگ یۉلیدن باریب، خطاطلیک و رساملیک بۉییچه ایجاد قیلیب کېلماقده. اونینگ ینگیدن قیلگن ایجادیاتی یقین آرهده شاعرلر، ادیبلر، تنیقلی خطاطلر و رساملر مسکنی هرات شهریده نمایشگه قۉییلیشیگه گواه بۉلهمیز.
سۉز سۉنگیده اوشبو ایشچن، زحمشکش، اېلسېور و تیلسېور یاش کادریمیزگه اولکن موفقیتلیکلر الله تعالی درگاهیدن ایستب، اوزاق عمر و ساغلام حیات آرزو قیلهمن، ایجادیاتیگه آمدلر.
