هر تانگ، قویاش حلی شهر تاملری اوستیگه تولیق نور ساچمسدن آلدین بالهسیگه سوت بیرهدی و اونی تینچلنتیرهدی؛ سونگ درس ریجهسینی قولیگه آلیب، مکتب یولیگه توشهدی. اونینگ اوچون مکتب گه باریش فقط بیر ایش کونینینگ باشلنیشی ایمس، بلکی بالهلر اوچون یاروغ کیلهجک قوریش سری بیر سفرنینگ باشلنیشی دیر.
نازنین اوچون اوقیتووچیلیک فقط ایرتهلب باشلنیب کیچقورون توگهیدیگن عادی بیر ایش ایمس؛ اوقیتووچیلیک اونینگ حیاتی هر بیر لحظهسیده آقیب تورهدیگن مهر و اشتیاق دیر. بو مهر شوندهی کوچلی تویغو کی، او بیر یاشلی بالهسیگه آنه بولیب تورگنیگه قرهمی، چرچاق، امکانیتلرنینگ کملیگی و کوپلب قیینچیلیکلر گه قرهمسدن، ینه هم اوز شاگردلری قرشیسیده اشتیاق بیلن تورهدی و اولر گه کیلهجککه امیدنی اورگتهدی.
نازنین متین، انگلیس تیلی و ادبیاتی یونهلیشیده عالی تعلیمنی تماملهگن و ییتی ییلدن بویان دولت مکتبلریدن بیریده انگلیس تیلیدن درس بیرهدی. او شوندهی دییدی: «مکتبنی بیتتیرگندن کیین انگلیس تیلی و ادبیاتی یونهلیشینی اوقیدیم چونکی بو بولیمده قیزیقردیم و حاضر اوشبو بولیمده اوقیتووچیلیک قیلهمن.»
نازنین گه کوره، اوقیتووچیلیک ییللریده او اوز شاگردلری بیلن اینگ یخشی لحظهلر و خاطرهلرنی باشدن کیچیرگن. بو یول کوپلب قیینچیلیکلر گه توله بولگن بولسه-ده، او اوچون هر دایم حیاتینینگ اینگ گوزهل لحظهلری بولیب قالگن. او شوندهی دییدی: «یتتی ییلدن بیری کابل شهریده دولت مکتبلریدن بیریده معلملیک قیلهمن و اوشبو مدت دوامیده کوپ خاطرهلریم بار و جودهیم خورسند من.»
نازنین ایتیشیچه، او هر کونی کیتمه-کیت تورت ساعت دوامیده بالهلر گه اوز فکرلرینی انگلیس تیلیده قندهی افاده ایتیشنی اورگتهدی. اونگه کوره: «حاضرگی کونده مکتبده انگلیس تیلینی اورگتهمن و هر کونی تورت ساعت مکتبده درس بیلن مصروف من، ذکور و اناث بولیملریده تورتینچیدن آلتینچی صنف گچه اوقیتووچیلیک قیلهمن.»
نازنیننینگ کوپهیتیریشیچه، او صنفده درس بیرهیاتگنده کلمه و سوزلرنی اورگتمهیدی، بلکی بالهلر آنگیگه ایشانچ، آرزو و کیلهجککه بولگن اعتقادنی هم سینگدیرهدی. او شوندهی دییدی: «مین هردایم صنفده درس بیریش پیتیده کونی کیلیب بو شاگردلر معلم، داکتر، انجنیر و قاضی بولهدی دیب اویلهیمن و بو ایسه مینی کوپراق قیزیقتیرهدی.»
بو معلم ایسه معاشنینگ کملیگیدن شکایت قیلهدی. اونگه کوره، اوقیتووچیلیک مهم و بیر وقتنینگ اوزیده کوپلب قیینچیلیکلر گه ایگه کسب بولسه-ده، بو یول آرقهلی قولگه کیلتیرهدیگن مادی امتیازلر جوده کمدیر. او شوندهی دییدی: «معلملر حقوقی همه اوچون بیر تور و جودهیم آز و بیر عایله اوچون ییترلی ایمس چونکی بیر اوقیتووچینینگ معاشی جودهیم آز دیر.»
بیر مملکتده تعلیم، برچه قیینچیلیکلر گه قرهمی، هنوزگچه کوپلب عایلهلر اوچون امید چراغی حسابلنهدی، عیال اوقیتووچیلر ایسه بو چراقنی یاقیب توریشده مهم رول اوینهیدی، اقتصادی و اجتماعی معمالر، امکانیتلر ییتیشمسلیگیگه قرهمسدن، اولر هر کونی امید و مسئولیت بیلن مکتب گه باریب، ینگی اولاد کیلهجگینی قوریشگه حرکت قیلهدی. نازنین متین هم انه شوندهی عیاللردن بیری دیر. او ییللر دوامیده مهر و اشتیاق بیلن تعلیم بیریب، اوقیتووچیلیکنی فقط بیر کسب ایمس، بلکی بالهلر کیلهجگینی یاریتیشگه قرهتیلگن بیر مسئولیت دیب بیلهدی.
