سلاموطندار تامانیدن چیت ایل تیللرینی اورگنهیاتگن ۲۴ عیال بیلن اوتکزیلگن صحبت نتیجهلری شونی کورستهدی کی، افغانستانده کوپلب عیاللر تعلیم آلیش، ایش تاپیش و مهاجرت قیلیش اوچون چیت تیللرینی اورگنماقده. گزارشده صحبت قیلگن عیاللردن ۱۵ نفری تعلیمنی دوام ایتتیریش و مهاجرت قیلیش اوچون چیت تیللرینی اورگنهیاتگنینی معلوم قیلگن. شو بیلن بیرگه، اوشبو عیاللردن ۲۰ نفری چیت تیللرینی ایش تاپیش مقصدیده اورگنهیاتگنینی ایتگنلر.
میدانوردک یشاوچیسی ۲۶ یاشلی پروین اقبالی، مهاجرت قیلیش و تعلیم گه دوام ایتتیریش اوچون انگلیس تیلینی اورگنهیاتگنینی بیلدیرگن. او شوندهی دییدی: «چیت تیلینی اورگنیشدن مقصدیم ایش تاپیش و خارج ده تعلیمنی دوام ایتتیریش دیر. بونینگ سببی شونده کی افغانستانده قیزلرنینگ اوقیشیگه شرایط یرهتیلمهگن.»
غزنیلیک ۲۵ یاشلی سمیرا احمدی هم تعلیمنی دوام ایتتیریش مقصدیده فرانسه تیلینی اورگنماقده. اونینگ ایتیشیچه: «فرانسه گه باریش اوچون بو تیلنی اورگهنیشگه حرکت قیلدیم او ییر گه تعلیمنی دوام ایتتیریب و ایش تاپیشنی ایستهی من و شونینگدیک ایناغهم فرانسهده او بیلن بیرگه یشش اوچون فرانسه تیلینی اورگنهیپمن.»
گزارشده اشتراک ایتگن بعضی عیاللر، تیل اورگهنیش اولر گه ایش امکانیتلریگه یول آچگنینی ایتیشهدی. کابللیک ۲۲ یاشلی سپوژمی ایسه خبری آژانسلردن بیریده ترجمه بولیمیده ایشلشینی بیلدیرهدی. او شوندهی دییدی: «انگلیس تیلینی اورگنگنیمدن کیین بیر خبری آژانسده ترجمه بولیمیده ایشلهی باشلهدیم و متنلرنی انگلیس تیلیدن پشتو تیلیگه ترجمه قیلهمن.»
بغلانلیک ۲۶ یاشلی فاطمه امیر انگلیس تیلینی اورگنماقده، اونینگ اورگهنیش سببنی خلقارا تیل بولگنی و کینگ کولمده قوللنیشی دیب اتهیدی. اونگه کوره: «خارجی تیلنی اورگنسه انسان ترقی قیلهدی و مینینگ بو تیلنی اورگهنیشیم سببی هم هر ساحهدهگی امکانیتلردن فایدهلنیش دیر.»
کابل یشاوچیسی ۱۹ یاشلی سحر اندرابی، اوزی ترقی قیلیشی مقصدیده چیت تیلنی اورگهنیشنی ایستهیدی. او شوندهی دییدی: «چیت تیلنی اورگهنیشگه قصد قیلگن من؛ بوگونگی دنیاده تیل اورگهنیش بیر کونیکمه (مهارت) دیر و مین اوچون ترقی قیلیش اصلی عاملی حسابلنهدی.»
اقتصادی قیینچیلیکلر، تعلیم اوچون یخشی جای یوقلیگی، آنلاین اوقیش اوچون اینترنت ضعیفلیگی یا کی ییتیشمسلیگی، گزارشده صحبت قیلگن عیاللرنینگ چیت تیل اورگهنیش اونگیدهگی معمالردن بولگن.
کابللیک ۲۰ یاشلی عاطفه شوندهی دییدی: «چیت تیلنی اورگنه آلمهگنیم اوچون ایشانچیم پس توشردی تیلنی اورگنه آلمس ایدیم و کیین ایسه اوزیمنی آرتگه تارتردیم؛ بیراق سعی-حرکت گه دوام بیرر ایدیم. باشقه معما کورسلر ایشیگی یاپیلیشی ایدی.»
بلخ یشاوچیسی ۲۰ یاشلی نرگس شوندهی دییدی: «اینگ کتته معما شو کی انگلیس تیلینی اورگهنیش اوچون جای یوق. تیلنی اورگهنیش مین اوچون بیر معما ایدی.»
گزارش معلوماتلری شونی کورستهدی کی، ایش همده رسمی تعلیم آلیشگه بولگن چیکلاولر یانیده، چیت تیللرینی اورگهنیش و ینگی امکانیتلردن فایدهلنیش عیاللر اوچون یگانه یونهلیش حسابلنهدی.
تعلیم و تربیه ساحهسیده بیلرمانلرنینگ ایتیشیچه، عیاللرنینگ چیت تیللرینی اورگهنیشگه قیزیقیشی، افغانستانده حاکم اجتماعی شرایط و تعلیم گه بولگن چیکلاولر گه مستقیم باغلیق.
تعلیم و تربیه بوییچه بیلرمان جمالالدین سلیمانی، مکتبلر ایشیگی یاپیلیشی و تعلیم گه بولگن چیکلاولر، کوپینچه قیزلرنی چیت تیللرینی اورگهنیش تامان یونهلتیریشگه آلیب کیلگنینی بیلدیرهدی.
او شوندهی دییدی: «قیزلر خارج تیللرینی اورگهنیش بیلن تحصیلی بورسیهلرنی آلیش امکانیتینی یرهتیشهدی و خلقارا تیللر اینیقسه انگلیس تیلی جهان اقتصاد تیلی حسابلنهدی و بو یول آرقهلی قیلیشه آلهدی اوز همده عایلهلرنینگ اقتصادیگه یاردم بیرسهلر.»
شو بیلن بیرگه، تیل اوقیتووچیلریگه کوره، سونگی ییللرده تعلیم و ایشگه بولگن چیکلاولر، افغانستانلیک خاتین-قیزلرنی خارج تیللرینی اورگهنیش گه قیزیقیشینی آرتیرگن.
انگلیس تیلی آنلاین اوقیتووچیسی نرگس سراج شوندهی دییدی: «اوتمیش گه قرهگنده افغانستانلیک خاتین-قیزلرنینگ خارج تیللرینی اورگهنیشگه قیزیقیشی کوپهیگن. کوپینچه قیزلر تعلیم و ایشگه بولگن چیکلاولر سببلی خارج تیللرینی اورگهنیش آرقهلی آنلاین تعلیمی ینگی فرصتلر، تحصیلی بورسیهلر یا کی آنلاین ایش تاپیشگه سعی-حرکت قیلیشماقده.»
اقتصاد شناس عبدالظهور مدبر، خارج تیللرینی اورگهنیش ایش و اقتصادی ترقیات گه یاردم بیریشی ممکن دییدی. اونگه کوره: «آدملر قنچه مهارتنی کوپ بیلسه شو درجهده ایش بازاریده تأثیرچن بوله آلهدی. چیت تیللرینی بیلیش، ایچکی و تشقی بازارلر بیلن علاقه قوریب و اقتصادی فرصتلردن یخشی فایدهلنیش امکانیتینی یرهتهدی.»
روانشناس محمدالله بلوچنینگ ایتیشیچه، تیل اورگهنیش تعلیم گه بولگن تأثیریگه قوشیمچه، عیاللرنینگ روحی سلامتلیگی و ایشانچی آرتیشیگه آلیب کیلهدی. اونگه کوره: «بیر کیشی نیچته تیلنی بیلسه، باشقهلر بیلن علاقه قوریش اوچون ایشانچی کوپ بولهدی. قیزلر اوچون تعلیم روحی جدی احتیاج دیر.»
افغانستانده تعلیم وضعیتی گه دایر یونسکو و یونیسف تامانیدن میلادی ۲۰۲۵ ییلده ترقهلگن گزارش گه کوره، اوسمیر قیزلر اوچون جامعه حمایتی بیلن آنلاین اوقیش، مهارتلرنی اورگهنیش کبی یوللر ضروری حسابلنهدی.
اوشبو گزارشده صحبت قیلگن عیاللرنینگ تجربهسی شونی کورستهدی کی، چیت تیللرنی اورگهنیش ایریم عیاللر اوچون تعلیم بیلن علاقهنی سقلش، ایش مهارتلرنی آشیریش و ایچکی همده تشقی بازارلردهگی ینگی امکانیتلرنی قیدیریش گه ایلنگن.
