کابل شهری‌ده بیر قطار خصوصی باله‌لر باغچهلری مسئوللری نینگ ایتیشلریچه، اوتگن ایکی ییل‌ده مذکور باله‌لر باغچه‌‌لریده باله‌لر سانی، ۸۰ فایز گه کمه‌یگن.
کابل شهری پروژه‌ی تایمنی بیرینچی سرکی‌ده «نهال» خصوصی باله‌لر باغچهسی نینگ مدیرمسئولی ثریا علی گه کوره، اوشبو باله‌لر باغچه‌سیده اوچ تعلیمی صنفی بولیب و هر صنف‌ده کونده ایکی یا-ده اوچ باله ترانه اوقیش، باشلنغیچ تعلیم‌لر و اوینش بیلن مصروف دیر. اونینگ ایتیشیچه، ایکی ییل‌دن بویان اوشبو باله‌لر باغچه‌سیده باله‌لر سانی، ۳۵دن ۶ باله گه کمه‌یگن. نهال باله‌لر باغچهسی مدیرمسئولی نینگ کوپه‌یتیریشیچه: «باله‌لر سانی کوپ ایدی اوتگن‌لرده ۳۰-۳۵ باله بار ایدی، اسلام امیر‌لیگی نینگ قدرت گه ایریشگنی‌دن بویان، ۳۵دن ۸-۶ باله گه ییتیشگن.»
مذکور گزارش‌ده کابل شهری‌ده ۱۰ ته خصوصی باله‌لر باغچهسی مسئوللری بیلن مصاحبه بولگن که، ۸ ته خصوصی باله‌لر باغچهسی نینگ مسئولی، اوشبو باله‌لر باغچه‌سیده باله‌لر سانی نینگ ۸۰ فایز گه کمه‌یگنی و باشقه ایکی باله‌لر باغچه‌سیده ایسه باله‌لر سانی نینگ ۶۰ فایز گه کمه‌یگنی نی ایتگنلر.
«ناز مادر» باله‌لر باغچهسی مسئولی منیره کاظمی نینگ ایتیشیچه، اسلام امیر‌لیگی نینگ قدرت گه ایریشگنی‌دن آلدین، ۱۲۰ باله اوشبو باله‌لر باغچه‌سیده سقلنه‌ر ایکن؛ بیراق حاضر ایسه بو رقم ۲۰ باله گه کمه‌یگن دیر.
بیزلرنینگ توییترده هم تعقیب قیلینگ!
کابل شهری‌ده خصوصی باله‌لر باغچه‌لریدن کوپینچه‌سی نینگ مسئوللری گه کوره، باله‌لر باغچهسی گه باله‌لری نینگ کیلتیره‌دیگن عیاللر خارجی نهاد‌لرده ایش قیله‌ر ایدیلر؛ بیراق عیاللر ایشی برابریده چیکلاو یره‌تیلگنی‌دن کیین، اولردن کوپ قطاری ایش‌سیز بولیب و باله‌لری نینگ باله‌لر باغچهسی گه یوبارمه‌یدیلر.
شونده‌ی بیرحالده، کابل شهری‌ده آنه‌لردن قطاری نینگ ایتیشلریچه، باله‌لر باغچهسی نینگ خره‌جتی نی توللش خصوصیده امکانیت‌لری یوقلیگی سبب، اوزلری باله‌لری نی باقه‌دیلر.
بوندن آلدین خارجی تشکیلات‌لردن بیریده ایشله‌یدگن شمسیه سادات نینگ ایتیشیچه، ایشی نی قولدن بیرگنی‌دن کییم، باله‌لر باغچهسی نینگ خره‌جتی نی توللش گه کوچی ییتیشمه‌گن. اونینگ کوپه‌یتیریشیچه: «ایشی بار ایدی، یخشی درآمدیم بار ایدی، باله‌لریم نی باله‌لر باغچهسی گه یوباریدیم و حاضر ایسه ایش‌سیز بولدیم، تورموش اورتاغیم باله‌لر باغچهسی نینگ پولی نی توللش گه کوچی ییتیشمه‌یدی.»
اوتمیش‌ده ایکی باله‌سی نی باله‌لر باغچهسی گه یوباره‌دیگن سابق دولت ایشلاوچیسی عزیزه رحیمی نینگ ایتیشیچه، حاضر ایسه اقتصادی قیینچیلیک سبب، باله‌لری گه اوزی قره‌یدی. اونینگ کوپه‌یتیریشیچه: «بیر آنه باله‌سی گه اینگ یخشی نرسه‌لر نی ایسته‌یدی. اقتصاد ضعیف‌لیگی کوپ قیین دیر. اقتصادی قیینچیلیک سبب، باله‌م نی باله‌لر باغچهسی گه یوباره آلمه‌یمن.»
بیزلرنینگ فیسبوک صحیفه‌میزگه باش اورینگ!
شونده‌ی بیرحالده، ایش و اجتماعی ایشلر وزیرلیگی سوزلاوچیسی سمیع‌الله ابراهیمی نینگ سلام‌وطندار گه ایتیشیچه، حاضر ایسه کابل شهری‌ده ۱۴ته باله‌لر باغچهسی یشش محیط‌ده، ۱۰۳ته باله‌لر باغچهسی ایش مکانی‌ده و ۱۸ته خصوصی باله‌لر باغچهسی نینگ فعالیتی بار. اونینگ کوپه‌یتیریشیچه: «کابل بویلب ۱۴ته یشش محیط‌ده، ۱۰۳ته ایش مکانی‌ده و ۱۸ته خصوصی باله‌لر باغچهسی نینگ فعالیتی بار.»
ایتیش کیره‌ک که، کابل شهری‌ده خصوصی باله‌لر باغچه‌‌لریده باله‌لر سانی کمه‌یشی، باله‌لر باغچه‌‌لریده اوقیتووچیلردن بیر قطاری نینگ ایش‌دن بوشه‌تیلیشی گه سبب بولگن.
